1 Yeisu wa fa abaayi wa lo əwo əzhi n kwnusnu n wo amwutuyii. 2 She Sibyiwyi ɓə si, wa ya nyawu dna n Ayahudiyibwokwnu, jesnu ca wo aza bəgyé n ɓa ɓə kna wo ɓədagbma tnubwa nyi.

Ɓa nyaɓo, "Əza ye ɓə ɓwa aɓo ye n nanu a? Knyi wyemwai nu nyi n a la ga wo a? Knyi atuzè yaakwo nu n wo gnyi woi zhni nyi a? 3 Əza ye nu to zhni kafyinta m? Əwo nu to zhni Mariyamwu nugwnu, Jemyis zado n Yusufui, Yahuda ɓədo n Simai m? Əwo amapwi to kwnusnu lo n yii n ya m?" Nlonu ɓaa əɓo ɓwa n woi.

4 Yeisu wa gna ɓa, "Sheɓəgwognayi to lo ntna mwamwa m, akpəge dna n əwohni əzhi, dna n əwohni azaje atasni jesnu n əwo pwuwai." 5 To wa wu atuzè dəhodəhoi n ɓo m, akpəge əwo aɓwa n wo ɓə ɓwa kpe n anyasnayi fyewyi jesnu ɓa gwo kágna. 6 Ca wo wo she wo ɓə gye əɓa tnagaiciyaganunui.

Nlonu Yeisu wa zna laɓa woi wunya, woi vyi azhi gbmanyi, gbmanyi. 7 Wa yì ngwnu-awoceaba yi ga əwohni, wa ya ɓa tnutnu tnú əɓa ngwnu-aba, aba, wa ga ɓa ikwo tu n azafnu ajegbmiyi tukwo.

8 Aɓo ye nu ɓə zhni əwo aɓəgbega: "Fye to la nyahonyahoi ntu əzna ɓo m, akpəge bwusi, fye to la biledi, gwnuma, kwo gyiwye dna n əfye ashnipa nya m. 9 Fye kwu abwada fyi n apita, ama fye to kwu əjekpe baayi m. 10 Əsahosahoi n fya lofyi n pwuwa, fye kwu fyi n ɓo nya əsa n fye ɓa kwnu n əzhi yi. 11 Nlonu abahobahoi n ɓa to gwo fye kwo ɓa kna fye tnubwa m, fye kwnuya n abaayi, fya lu aɓwutukwnu ya n əfye apitabwada, kwaa zè ɓəgbmi tu n əɓa tukwo."

12 Ɓa kwnuya ɓa lo ɓa zhni waazi nge aza ɓa yeabwi. 13 Ɓa kwnu ase ya n mwa bəgyé jesnu ɓa pmya anyasnayi bəgyé omi, ɓa ká ɓa gna.

14 Əsu Hiridusu wa wo Yeisu əɓo ntuge əwo əye ɓəə la lapwi. Azaho ɓə zhi ɓai gna, "A la Yohana Batizimazhniyi nu laka n əfyi, cenuzhni ikwo atuzè nya ɓai vyi wo."

15 Azaje ɓa gna, "Əwo nu zhni Iliya."

Dudulonu, azaje ɓa gna, "Wo zhni sheɓəgwognayi nu, wo wulo ngye sheɓəgwognayi sapa nya ho nu."

16 Ama shi Hiridusu ɓə wo ɓəye, wa gna, "Yohana, əza n mi ɓə kpe wo tukwo nyi, a la əwo nu laka n əfyi!"

17 Ntuge Hiridusu nu əwohni tukwoi n wo ɓə ga əgbe nge a wna Yohana, wa zhni a pa wo jesnu aa wo dna n zhalu. Wo ɓə zhni dəye ntu Hiriduya əɓo nu, əwodo Fyilibwus nyikwo, n wo ɓəə la wo gwo wo nyi. 18 Ntuge Yohana ɓə zhni woi gna Hiridusu, "Owa to ncei ye lo, ha la əho ədo nyikwo m." 19 Ntulonu Hiriduya ɓə n nuwnui dna n Yohanai jesnu wo ɓə ncei pma wa wu wo. Ama to wa myi n wo wu m, 20 ntuge Hiridusu ɓə zhni woi wo Yohana ədna, woi kna wo, shikwonyi wo ɓə kpəge wo zhni ɓəfyeceyi nu jesnu əza gyigyiyi. She Hiridusu ɓə wo Yohana ɓəda, wa kwu jeje n mwa; dudulonu wo ɓə ncei pma wa kna wo ɓəda tnubwa.

21 N kpmasnu, Hiriduya bwugba ɓəmwi nunu əsa, kwa ɓe. N əwyii n Hiridusu mama nyipyei ɓə shegwnudo, Hiridusu wa yì awyefna ntu əwo atnutnuyi aza adnagbmai ɓo ɓədo n akwnuyi abəzhei jesnu n aza ayaakwoi ń Gəlili. 22 She Hiriduya nyigwnu ɓə lo ɓe wa nyanya, əkwo ɓo kwa kwu da Hiridusu ɓədo n əwo wyeshe nyagyi azhiɓeyii.

Əsu wa gna əɓyinyikwoi yi, "Nya mi nyahonyahoi əɓo n ho ye jesnu mi ɓa ga ho kwo." 23 Wa shi wo əɓəgbe n nyasíi, "Nyahonyahoi n ha nya mi əkwo ɓo, mi ɓa ga ho, kwo ngye əmi əbemi tokwnu nu."

24 Wa gbmiya lo wa nya əwo əya, "Mi ɓa nya knyiyi nu ɓo a?"

Wa dna wo ɓəgbe, "Yohana Batizimazhniyi tukwo."

25 N əsagbmanyii əɓyinyikwoi wa lo da əsu wolowolo wa gna wo: "Mi n cei pma nsaiye a ga mi Yohana Batizimazhniyi tukwo tu n fnyitala."

26 Bwugba kwaa əsu wnu n mwa, ama ntu əwo nyasí ɓo ɓədo n əwo wyeshe nyagyi azhiɓeyii, to wa ye wa na wo əkwo əɓo m. 27 Ntulonu, nsayisayii əsu wa tnú əzawuyi n əgbei, nge wo ɓe n Yohana tukwoi. Əza yi wa lo wa kpe Yohana tukwo dna n zhalu, 28 jesnu wa ɓe n əwo tukwoi tu n fnyitala. Waa kwo ga əɓyinyikwoi yi, wa lo əwo əya ncei. 29 Shi Yohana amwutuyi ɓə wo nlonu, ɓa ɓe, ɓa la əwo nayi ɓaa kwo byidna n vnyigwo.

30 Atnutnuyi ɓa yezhi n shegwnu Yeisu jesnu ɓa wu wo aɓo vnyanya n ɓa ɓə kwu zhni n nyawui n ɓa ɓə wu. 31 Nlonu, ntuge aza bəgyé ɓə gnyi ɓai ɓe jesnu ɓai lo, ntucenu, to ɓa ɓwa əsa n ɓa ɓá gyi nyagyi m. Wa gna ɓa, "Fye vyi mi əfyehnifyehni ya lo aba n wyiɓe to lo m, yii kwu snu."

32 Ntulonu ɓa kwuka əɓahniɓahni ɓa lofyi n əya nuwnanya ɓa lo aba n kwo ɓə gnyi pyipyipyi. 33 Ama aza bəgyé n ɓa ɓə gye ɓa ɓai kwuka ɓa kwu ɓa kpeye, ɓa bwusi lo n apitai ɓai kwnu n azhimi vnyanya jesnu ɓa kwu si n ɓo n əɓa abye. 34 Əsa n Yeisu ɓə gbmitu n əkpma wa gye deeji yaakwo, wa gye ɓa snusnu, ntuge ɓa ɓə zhi ngye aknyi nu ntna knayi. Ntulonu wa ya ɓa nyawu n mwa bəgyé.

35 Nsayii, wyeshe ɓə la she, ntulonu əwo amwutuyi ɓa ɓe da wo ɓa gna, "Zhabwi nu gnyi n ya, jesnu wyeshe n la lu she. 36 Gna aza ami nabai ɓa lo azhi n ɓa shegwnu laɓa nyi ɓədo n azhigbai ɓa lo ɓəə si nyagyi ga əɓahni ɓa gyi."

37 Ama wa dnaɓəgbe, "Fye ga ɓa nyaho ɓa gyi."

Ɓa gna wo, "Gye kwo ɓaa du gwodogwo gyiwye əye tokwnu nya ya! Yi ɓa lo yii wu gyiwye n snulai kpe biledi ntuge ya ga ɓa ɓá gyi?"

38 Wa nyaɓo, "Fye n biledi aknanai shi lo ngwnu aknyiyi nu a? Fye lo fye kawye."

She ɓa ɓə kwu gyewye, ɓa gna, "Ngwnu-atnu nu n abmyai ngwnu-aba."

39 Nlonu Yeisu wa ga ɓa əgbe nge ɓa gna aza vnyanya ɓa kwu sase n akwu-akwui kpe n agbegbe-pwutu. 40 Ntulonu ɓa kwu sase zhi n akwui, tagyi-tagyi nya ɓədo n shiitnu-shiitnu nyai. 41 Shi wo ɓə gwo biledi aknana ngwnu-atnu n abmyai ngwnu-aba yii wa kpe əwye wu n əshe, wa sa Shekwoyi ami jesnu wa sa biledi aknana yii ya. Nlonu wa ga əwo amwutuyi ɓa gnaya ga aza. Jesnu wa gna abmya ngwnu-aba yi ya fyi n əɓa vnyanya atasni. 42 Əɓa vnyanya ɓa gyi jesnu nubwo kwa kwu ɓa fwu 43 Amwutuyi ɓa kwu biledi n abmya awyiwoi, acekwnu ngwnu-awoceaba. 44 Azanugbai n ɓa ɓə gyi nyagyi yi nyi ɓa ɓə nyi adugwu-atnu nu.

45 Nsayisayii, Yeisu wa zhni əwo amwutuyi ɓa lofyi ń əya nuwnanya jesnu ɓa kwu gyilo n abye ɓai lo Betsaida, wo ɓəye cegnyi woi gna deeji ami. 46 Woi la laka n əɓa aba, wa gwnutu lo n əpe, wo zhniaduwa.

47 N əsado dna n sukwoi, əya ɓə dnalo n nuwna-znudna atasni, jesnu woi ce tu əwo gbmanyi n əkpma. 48 Wa gye amwutuyi fyi ɓai gyeazhnì n əya dna nyai, ntuge əse to ɓə ci ɓe n awyei ce n əya nuwnanya nu. N fyegyi ɓwai, wa lo da ɓa, woi znazna tu n nuwna-znudna. Wo ɓə ye wa du ɓa ya nu, 49 ama she ɓa ɓə gye wo woi znazna tu ń nuwna-znudna, ɓa zhninubwo nge wo zhni nyasnuɓwui nu. Ɓa fyiakwu, 50 ntuge əɓa vnyanya ɓə kwu wo gyewye jesnu ədna kwa kwu wo ɓa.

Nsayisayii, wa daɓo n ɓai wa gna, "Fye kwu agwumyizhi! Əmi nu. Ədna to wo fye m." 51 Nlonu wa lodna n əya nuwnanya n kwnusnu n ɓai jesnu əse kwaa nazhi. Əɓo yi kwa wo ɓa n mwa kwokwo, 52 ntuge ɓa to ɓəə ɓwa awyega biledi nya m; ntuge əɓa abwugba ɓəə kwu shni.

53 She ɓa ɓə la piya, ɓa kwnukpe n Genezareti əknyi jesnu ɓaa əya nunwanya gyima n ɓo. 54 Shi ɓa ɓə zo n kakazhii n əya nunwanya, aza ɓa kwu Yeisu kpeye. 55 Ɓa zna laɓa n səpayi vnyanya ɓai kwu anyasnayi kpe n apəce ɓai lo abahobahoi n ɓa ɓə kwu wo nge wo gnyilo. 56 Njesnu abahobahoi n wo ɓə la lo; azhi, azhimi kwo azhigba; ɓa ɓə la anyasnayi kwnuzhi n adubayaakwo. Ɓa ɓà wo nge wo fa ɓa to, kwo əwo əjegbe nu əɓwa, jesnu aza vnyanya n ɓa ɓə kwu kwo toɓwa nyi, ɓa kwu kágna ɓwa.