Maria

Pofi miiyabisa mbutili a Yisu

26 Bu yimi la Lisabeti laakuhisi batsungi basamunu, Nzambi atsindihi pofi wa nduhi Ngabiyeli hu Nazareti, musyenge a Ngalili. 27 Nde atsindihi pofi huli nuumba yi baakateele Mariya. Nde aba mutangula a Yosefi, muutu wu imbisa hya pfumu Davidi. 28 Pofi akoti huli nde na aleeli: «Bwehe! Ba mu kinya mu tooni ati, Pfumu amiisa we hyese, na nde li na we.»

30 Pofi aleeli Mariya: «A baa na boomo ve! Mu tooni ati, we miibaha hyese ŋa busu bwa Nzambi. 31 Mono, we ubaha yimi, we ubuta mwaana wa bahala, na we uluha nde nduhi Yisu. 32 Nde uba wu munene, na bu ukaateele nde Mwana a Nzambi a Pungu. Pfumu Nzambi uva nde itsiha hi ipfumu hya Davidi, kaaha a nde. 33 Nde utuma ŋa yulu ibaandu hya Yakobi mu bilima na bilima, Ipfumu hya nde a hyufwa ve.»

Mbutili a Yisu

18 Mono buni mbutili a Yisu Kristo yaaba. Mariya ngu a nde aba mutangula a Yosefi. Ka tswamina bo bapfuuta nzo, Mariya abahi yimi mu matwala ma Livupu la Ngidi.

Dymbu la Mariya

46 Titswene Mariya aleeli:

«Muvumu a me yusa Pfumu,

47 na livupu la me lili mu kinya mu Nzambi, Muyobili a me.

48 Mu tooni ati, nde amiisusa miisu

ŋa yulu musalili a nde wu mukaasu wu akulamana.

Eye, bunuubu, baatu ba matungi moosi bu ukaaleele me:

nga hyese.

49 Mu tooni ati, Nzambi nga Matwala miisa me mavaanga mamanene.

Nduhi a nde yili ya ngidi.

50 Kwili lingebe a Nzambi, yi baaba taangu yoosi mu matungi na matungi.

Nde ubaava yo huli boosi ba bubaakiinza nde.

51 Nde miimweese mifudi mya hoho hwa nde.

Nde miitsala boosi ba babeedi na matsimi ma isaayi mutso mitima mya bo.

52 Nde miikulamasa banga matwala ŋa yulu makiti ma bo ma ipfumu,

ka nde miisyenolo banga bulembo.

53 Banga nzala, nde miiywatisa bo mu ma mabwe,

ka miifutala bisina myoho bunyanga.

54 Nzambi amiiyobolo Isereli musalili a nde,

a havusana baa bubaasalila nde ukwila lingebe ve.

55 Ni mu buuna, Nzambi hamisa nzuhisini huli bakaaha ba bisu,

huli Abrahami na imbisa hya nde mu bilima na bilima.»

4 Yosefi kaka ayeni hu musyenge a Nazareti hu tsi a Ngalili. Nde ayeni hu musyenge a Betelemi hu tsi a Yuda. Nde hasiidi buuna, mu tooni ati nde aba muutu a bula mo buuna, na musi ibaandu hi mutumi Davidi. 5 Nde ayasonehe nduhi buna a Mariya mutangula a nde. Mariya aba na yimi.

6 Bu bo baaba huuna, taangu a Mariya yi ubuta yatoodi. 7 Nde abuti mwaana a nde watsomi wa bahala. Nde apoti nde tsanda na alaasi nde mu idiili hi biboodi, mu tooni a bu baavelibaha itini mu nzo a byenyi.

19 Mariya akayibwala moonyi mu maana moosi, na akatsima mo hutso mutima a nde.

34 Simeyoni asyemi bo na aleeli Mariya ngu a Yisu: «Mwana mo wunuwu miiya mu ubwisa na mu utelemese ba banzuhisini mu Isereli. Nde uba iliimbu hya Nzambi, ka baatu bu unyanza nde. 35 Matsimi ma mitima mi milahi mu uyabaana. Na we mo, mutima a we umono pasi we muutu wu sabila amiikotelele.»

48 Bu babuti ba nde baasooli nde, bo baakimuhi. Na ngu a nde aleeli nde: «Mwana a me, mu hima we vaangi la pila yiina huli bisu? Mono, bisu a taata a we lili mu usaha we na boomo.»

49 Yisu afutili bo: «Mu hima benu lili mu usaha me? Benu liyaabi ti me apfwana ubaaba mu nzo a Taata a me.» 50 Ka bo a baatsikihi ma Yisu hakaleele bo ve. 51 Titswene nde afutihi na bo hu Nazareti na nde akayuhala bo bubwe. Ka ngu a nde akakeelese misamu myosi hutso mutima a nde.

3 Bu malamu maafwidi, ngu a Yisu aleeli nde bunuubu: «Bo a basaali na malamu ve.» 4 Yisu afutili nde: «Mukaasu*, ki lo ŋa hati la we na me? Tangu a me kini a yaatoodi ve.» 5 Ngu a Yisu aleeli huli basalili: «Vaangaani moosi ma nde hutuma benu.»

25 Ŋa muvanga a muti a kuruwa a Yisu, hwaba hwateleme: bangu ba nde boole, Mariya mukadi a Kolopasi, na Mariya musi Magadala. 26 Yisu amoni ngu a nde na muyihi wu nde hakatondo, ateleme ŋa pedu a nde. Yisu aleeli huli ngu a nde: «Maama, mono mwaana a we.» 27 Titswene, nde aleeli huli muyihi a nde: «Mono, ngu a we.» Na umata taangu mo yiina, muyihi avoli Mariya na akatsahala na nde.

Ikuta hya mbuli hya Yisu

31 Ngu na baana ba ngu a Yisu baayidi. Bu baaba baateleme ŋa mbadi, baatsindihi muutu mu uyateele Yisu. 32 Koonge a baatu yi yaaba yadiinga Yisu maatsahala, yaaleeli nde: «Mono, ngu a we na baana ba ngu a we hu mbadi bali, bo bali mu usaha we.» 33 Yisu akaali: «Ngu a me ni na? Na baana ba ngu a me ni ba na?» 34 Titswene bu nde hatali baatu ba baaba baadiinga nde maatsahala, nde aleeli: «Monwaani ngu a me, na baana ba ngu a me! 35 Mu tooni ati, woosi wu li mu ukuhasa litondo la Nzambi, wuuna ni mwana a ngu a me, wuuna ni kedi a me, na wuuna ni ngu a me.»

55 Wunuuwu a ni mwana a salapandi ve? Mariya a ni ngu ande ve? Yaki, Yosefi, Simoni na Yude, a bali baana ba ngu a nde ve? 56 Bakedi ba nde a bali boosi ŋa hati la bisu ŋaaniŋa ve? Nde matwala mo maniima moosi huni mamiimatila nde?»

14 Boosi mu matsimi mamosi, baakapfutana taangu yoosi mu usambila Nzambi. Itwadi na bakaasu bakima, Mariya ngu a Yisu, na baana ba ngu a Yisu.