1 Titswene, aba na mukungi mumosi wu Bayudaayo, na Yisu akumi hu Yeruselemi. 2 Ŋa pedu ikotili hi musyenge, ikotili hi «Mandombo», hwaba na idiinga imosi hi bubaateele mu ndaha Bayudaayo: «Betsata». Hwaba na mapombo mataanu mamanene, ma maaba maadinga idiinga. 3 Hu tsina mapombo mo maana, hwaba hwalambama koonge babeedu: binzimana, banga matsode, na ba baavolo binama. [Bo baakakeele ti mamba manyingama, 4 mu tooni ati, pofi a Pfumu akakulamana matangu makima na akanyingasa mamba ma idiinga. Watsomi mu babeedu mu usutaha mu mamba ma bamiinyingasa, akabeeloho, mu pasi bubeedu.]

5 Hwaba ŋaana, na bahala limosi li laakabeele, umata bilima maku matatu na pwombo (38). 6 Yisu amoni nde alaambama na ayaabi ti nde aba mu iteesi mo hiina umata beleve. Yisu aleeli nde: «We tondi ubeeloho?» 7 Mubeedu ni ufutala nde: «Pfumu, me a handi na muutu wu ubwadiha me mu idiinga ŋa mamba mali mu unyingama ve. Mu taangu yi me tondi uyene huuna, mukima amiiteehele me.» 8 Yisu aleeli nde: «Teleme, volo ikala hya we, na yene.» 9 Mawasa-mawasa, bahala mo linili laabeeluhi, lo laavoli ikala hya lo na laayeni. Maana maakavangama mu ilumbu hya saba.

10 Bayudaayo ni uleele huli bahala li laabeeluhi: «Loloyi ti ilumbu hya saba, we a hali na muswa mu ubita ikala hya we ve✝.» 11 Nde afutili bo: « Muutu wu beelusi me leeli me: "Volo ikala hya we na yene."» 12 Bo ni ufuula nde: «Na wuuna leeli we: "Volo ikala hya we na yene"?» 13 Ka bahala li Yisu habeelusi a laakayaaba wu abeelusi nde ve. Mu tooni ati, Yisu avyasuhi ŋatso a konge a baatu ba baaba ŋaana.

14 Humbisa, Yisu amoni bahala mo li nde habeelusi, mu litandala la nzo a Nzambi. Na aleeli lo buunuubu: «Mono! We miibeeloho. A habwesa masumu, mana dyambu li laafulala bunono a libwila we.» 15 Bahala mo laayayabisa huli Bayudaayo ti muutu wu abeelusi nde aba Yisu. 16 Bayudaayo baakabingasa Yisu, mu tooni ati nde hakasa mavaanga mo maana mu ilumbu hya saba. 17 Ka Yisu afutili bo: «Taata a me li mu usala taangu yoosi, na me kaka ndi mu utsala.» 18 Bu Bayudaayo baayuhi buuna, piinga a bo yi uduba Yisu yaafulili. Bo baakasaha uduba nde, ndulu a bu nde hakavelekiinza ilumbu hya saba ve, ka fula-fula, bu nde hakateele Nzambi Taata a nde na ubaamonehele we itsiitsa hya nde.

19 Yisu ni ufutala huli Bayudaayo: «Mu mbuli, mu mbuli me ndi mu undeele benu, Mwana utwala usa pasi isiha mu nde mwakulu ve. Ka Mwana ubaasa ndulu bi nde ubaamono Taata mu usa. Na byosi bi Taata ubaasa, Mwana kaka ubaakuhasa byo usa. 20 Bu Taata hatondo Mwana, nde ubaamweese Mwana byosi bi nde ubaasa. Na nde umweese nde mavaanga ma maalutala bunene na ma benu laateehili umono, mana benu likimuha. 21 We bu Taata ubaasuula babaakwa na ubaava bo moonyi, ni bumosi kaka Mwana ubaava moonyi huli muutu wu nde atondi. 22 Taata a hali mu utsundasa pasi muutu ve, ka nde ava lituma li utsundasa huli Mwana. 23 Nde hasa buuna, mana boosi babaakiinza Mwana, we bu bo bali mu ukiinza Taata wu atsindaha nde. Mu tooni ati, muutu wu avelekiinza Mwana, a hali mu ukiinza Taata ve.

24 Mu mbuli, mu mbuli me ndi mu undeele benu, muutu wu li mu uyuha mambu ma me, na li mu usa imiinu mu wuuna wu atsindaha me, nde li na moonyi wu bilima na bilima. Nde a hukoto mu tsundusu ve, ka nde amiimata mu lipfu na uvyoho hu moonyi. 25 Mu mbuli mu mbuli me ndi mu undeele benu, ngunga yili mu uya, na yaamiito, yi babaakwa buyuha ndaha a Mwana a Nzambi. Ba buyuha yo, sa baba moonyi. 26 We bu Taata ali na moonyi mu nde mwakulu, ni bumosi kaka nde hava Mwana muswa mu ubaha moonyi mu nde mwakulu. 27 Bu nde ali Mwana a Muutu, Taata aviidi nde lituma li utsundasa baatu. 28 A likimuha mu tooni a maana ve. Ngunga yili mu uya, yi boosi ba bali mu mangila buuyuha ndaha a nde, 29 na sa bapala mu mangila ma bo. Boosi ba baasiidi ma mabwe sa basuuha mu ubaha moonyi. Ka boosi ba baasiidi ma mabi sa basuuha mu uyaka tsundusu a bo✝. 30 Me utwala usa pasi isiha mu me mwakulu ve. Me ubaatsundasa we bu Taata ubaatuma me, na tsundusu a me yili ya tsiitsa. Mu tooni ati, me a handi mu utsaha usa litondo la me mwakulu ve, ka mu ukuhasa litondo la Taata wu atsindaha me.»

31 «Tso me ndi mbangi a me mwakulu, imbangi hya me a hili hi hyasungama ve. 32 Ka, hu li na muutu mukima wu ubaatiila me imbangi, na me nzaabi ti imbangi hi nde ubaatiila me, hili hi hyasungama. 33 Benu bakuutu ba Bayudaayo, benu laatsindihi bayihi ba benu huli Yowani, na nde atiidi imbangi mu imbuli hya me. 34 Me a handi na nzala ati batiila me imbangi ve. Ka me ndi mu undeele maana, mana benu liyoboho. 35 Yowani aba we mwinda wu bali mu ubaangisa, mana nde ayalusa baatu boosi. Mu mwaana taangu hoole, benu laamoni kinya mu liyalala la nde.

36 Ka me ndi na imbangi hi hyafulala hya Yowani bunene. Mu tooni ati, mavaanga ma Taata hava me mu ukuhasa, ni mavaanga mo maana me ndi mu utsa. Mo mali mu utiila me imbangi ti Taata ni wu atsindaha me. 37 Na Taata wu atsindaha me, li mu utiila me kaka imbangi. Ka benu kini a laayuhi ndaha a nde ve, tso umono hiinzi hya nde. 38 Na mukuma a nde a hali mu ukwilala mu benu ve. Mu tooni ati, benu a lili mu usa imiinu mu wuuna wu nde hatsindaha ve.

39 Bu benu libaatsima ubaha moonyi wu bilima na bilima, benu lili mu ukengese bubwe-buwe Mabuuku ma Ngidi. Ka mo ni ma mali mu utiila me imbangi. 40 Benu ti a lili mu utondo uya huli me mu uyaka moonyi wa mbuli ve!

41 Me a handi mu utsaha ubaha muyusu wu ubaamata huli baatu ve. 42 Ka me nzaabi benu: Benu a lili na litondo mu Nzambi mu mitima mya benu ve. 43 Me anza mu nduhi a Taata a me, na benu a laayaka me ve. Ka tso mukima yidi mu nduhi a nde mwakulu, benu sa liyaka nde. 44 Buni benu luutwala usa imiinu mu me? Benu baa libaayusasana, na baa lavelesaha muyusu wu ubaamata huli Nzambi siha. 45 A litsima ve ti me tsa kese benu huli Taata. Wu li mu ukese✝ benu Moose, wu benu laasuusala hiitu hya benu. 46 Tso benu libasiila Moose imiinu, benu likiisiila me kaka imiinu, bu nde hasonehe mu tooni a me✝. 47 Ka benu livelesa imiinu mu maambu ma nde hasonehe, buni benu luutwala usa imiinu mu mambu ma me?»