1 Hwaba na bahala limosi, ŋa hati li Bafarisi, nga nduhi a Nikodemo. Nde aba mumosi mu bakuutu ba Bayudaayo. 2 Nde ayamono Yisu hutso butsuhu na aleeli nde bunuubu: «Rabi, bisu liyaabi ti we ni wu Nzambi hatsindaha mu ulongese bisu. Mu tooni ati, muutu tso mumosi utwala usa biliimbu bya kimuhili bi we li mu usa, tso Nzambi a hali na nde ve.» 3 Yisu afutili nde bunuubu: «Mu mbuli, mu mbuli me ndi mu undeele we, muutu utwala umono ipfumu hya Nzambi ve, hwavele ubwebuta nde.» 4 Nikodemo akaali: «Buni mukuutu bahala mbii me, utwala ubwebutama hu unyatihi? Nde utwala ubwekoto mu moonyi a ngu a nde na ubutama butama la yoole ve.» 5 Yisu afutili nde bunuubu: «Mu mbuli, mu mbuli me ndi mu undeele we, hwavele ubuta muutu mu mamba na mu Livupu, nde utwala ukoto mu ipfumu hya Nzambi ve. 6 Hi himiibutama mu musunya hili musunya, na hi himiibutama mu Livupu hili Livupu. 7 A hakimuha ve bu me ndeeli we ti: "Hwafwana huli benu mu ubwebutama." 8 Livupu lili we ifula. Lo libanyingasa hu lo litondi. Muutu ubaayuha kele a lo, hwavele uyaaba huni lo lili mu umata, tso huni lo lili mu uyene. Hu li bumosi kaka mu pasi muutu wu miibutama mu Livupu.» 9 Nikodemo aleeli nde: «Buni buuna buutwala uvangama?» 10 Yisu afutili nde: «We li Mulongisi wu li mu ulongese Isereli, we a hayaabi mambu mo maana ve! 11 Mu mbuli, mu mbuli me ndi mu undeele we, bisu ubaaleele ma bisu layaaba, na bisu ubaata imbangi mu ma bisu laamono, ka benu a lili mu uyaka imbangi hya bisu ve. 12 Benu a laasiila me imiinu ŋa me toyili benu misamu mya toto ve. Buni benu luusa imiinu ŋa me utoyele benu misamu mi mayulu? 13 A hu li na muutu wu avaata hu yulu ve, vengo Mwana a muutu, wu akulamana umata hu mayulu✝! 14 Hu kumu, Moose abandihi na asyenuli taadi ŋa yulu muti*. Ni bumosi kaka, Mwana a Muutu bafwana ubaandiha, 15 mana boosi ba bali mu usiila nde imiinu, babaha moonyi wu bilima na bilima. 16 Ka mbi bu Nzambi hatondi tsi, nde atsindihi Mwana a nde wu livingu, mana pasi nde wu usiila nde imiinu, avele bungana, ka nde sa abaha moonyi wu bilima na bilima. 17 Nzambi a hatsindihi Mwana a nde mu utsundasa baatu ve, ka mu tooni ati baatu bayoboho mu nde. 18 Woosi wu li mu usiila nde imiinu amiipala mu tsundusu. Ka woosi wu avelesiila nde imiinu, amiikoto mu tsundusu, mu tooni ati nde a hasa imiinu mu nduhi a Mwana a Nzambi wu livingu ve.

19 Mono buni tsundusu yuvangama: liyalala laayidi mu tsi, ka baatu baatondi hwa bo piipidi na baatiimbi liyalala, mu tooni ati mavaanga ma bo mali ma mabi. 20 Pasi muutu wu ubaavanga ma mabi abelele liyalala, na nde ubaatahuha na lo. Nde ubaasa buuna, mana mavaanga ma nde ma mabi a mayabana. 21 Ka nde wuuna wu ubaasalila imbuli, nde li mu uya hu liyalala, mana bayaaba ti mavaanga ma nde mali ma litondo la Nzambi.»

22 Humbisa a maana, Yisu ayeni na bayihi ba nde hu itaanzi hya Yude. Huuna, nde avyosi na bo mwa bilumbu, na nde akatondehe baatu. 23 Yowani kaka akatondehe hu bula bwa Enoni, hu pedu a bula bwa Salimi, mu tooni ati huuna hwaba na mamba ma malahi. Na baatu baakaya huli Yowani mu uyaka tondihili. 24 Mu taangu mo yiina, Yowani aba kini a hakoti kondayi ve.

25 Ka bayihi ba Yowani bakima, baabaandihi imoho na Muyudaayo mumosi mu tooni bipfu bya tsyemili a nyutu. 26 Bo baayamono Yowani na baaleeli nde bunuubu: «Rabi, we li mu uyibwala moonyi mu muutu wu aba na we hu simu lina la Yolodani, wu we atiili imbangi? Ka bunuubu nde aka mu utondehe, na baatu boosi bali mu uyene huli nde!»

27 Yowani afutili bo: «Muutu utwala usa pasi isiha ve, tso Nzambi a haviidi nde muswa ve. 28 Benu mwakulu lili mu uta imbangi ti me andeeli: "Me, me a handi Kristo ve, ka baatsindihi me ŋa busu bwa nde✝." 29 Wu abaha mukadi na? Ni mulumi a nde! Ka mu mukungi makweele, mbaahi mulumi ni wu ubaatsahala ŋa pedu mulumi, na ubaayuhala nde. Nde ubaamono kinya yindahi mu uyuha ndaha mulumi. Kinya mo yiina ni ya me, na yo yili yi yaakuha. 30 Nde Kristo afwana usyenoho, na me apfwana ukulamana.

31 Muutu wuuna wu amata hu yulu, afulala baatu boosi tsongo. Ka muutu wu li wa toto, li wa toto, na nde ubaatoyo mu bya toto. Buuna, muutu wu li mu umata hu yulu, [nde afulala baatu boosi tsongo]. 32 Nde ubaata imbangi mu ma nde hamono na hayuha, ka muutu tso mumosi a hali mu usiinga imbangi hya nde ve. 33 Muutu wu li mu usiinga imbangi hya nde, li mu usilasa ti Nzambi li imbuli. 34 Muutu wu Nzambi hatsindaha, ubaaleele mambu ma Nzambi. Mu tooni ati, Nzambi ubaava nde Livupu mu iteesi hi hyafulala. 35 Taata ubaatondo Mwana, na amiiva bisiha byosi ŋa myoho mya nde. 36 Muutu wu ubaasiila Mwana a Nzambi imiinu, li na moonyi wu bilima na bilima. Ka wu uveleyuhala Mwana a Nzambi, a hubaha moonyi mo ve. Na kesi a Nzambi sa yiba ŋa yulu a nde.»