1 «Mu mbuli, mu mbuli me ndi mu undeele benu, muutu wu ukoto mu mumbu mameme, hwavele uvyohele ŋa ikotili, ka nde alendoho mumbu, nde wuuna li mwibi na mutsali. 2 Ka muutu wu li mu uvyohele mu ikotili, nde li mukeelisi mameme. 3 Keedi a mumbu ubaadibula ikotili mana mukeelisi mameme akoto. Mameme mu baayuha ndaha a nde. Nde ubaateele mameme, pasi lo mu nduhi a lo, na nde ubaabita mo hu mbadi. 4 Bu nde amipalisa mameme ma nde moosi, nde ubaayene ŋa busu bwa mo. Mameme mu baaduukala nde mu tooni ati, mo maayaaba ndaha a nde. 5 Mo a muuduukala mwenyi tso hoole ve. Ka mo sa mabata nde lala, mu tooni ati mo a maayaaba ndaha a byenyi ve.»

6 Yisu atiidi bo kuma mo yiina, ka bo a baatsikihi ma nde haakaleele bo ve. 7 Yisu abweleele bo: «Mu mbuli mu mbuli me ndi mu undeele benu, me, ni ikotili hya mumbu mameme. 8 Boosi ba baateehili me, bali biibi na baataani✝. Ka mameme a maayuhili bo ve. 9 Me, ni ikotili. Tso muutu vyohili mu me, nde sa afuuha. Nde sa akoto na upala na bunyanga, na nde sa abaha byudya. 10 Mwibi ubaaya ndulu mu uyiba, mu uduba na mu utsala. Ka me anza, mana mameme mabaha moonyi, moonyi wu afulala.

11 Me, me ndi mukeelisi mameme wu mubwe. Mukeelisi mameme✝ ubaayeholo moonyi a nde mu mameme ma nde. 12 Muutu wu ubaasala ndulu mu ubaha mbongo, a hali mukeelisi mameme wa mbuli ve. Bu mameme maavele ma nde, nde ubaatiimba mo na ubaabata bu nde amiimono miinzi. Na minzi ubaakanga mameme, na utsala mo. 13 Muutu mo wunuwu ubaasala ndulu mu ubaha mbongo, ka a mu ukeelese mameme ve. Mu tooni ati, nde a hali na tsimi a mo ve. 14 Me, me ndi mukeelisi mameme wu mubwe. Me anzaaba mameme ma me, na ma me kaka maayaaba me. 15 We bu Taata hayaaba me, me kaka anzaaba Taata. Na me umbaanzyeholo moonyi a me mu mameme ma me. 16 Me ndi na mameme makima ma maavele mutso a mumbu mo wunuwu. Me apfwana ubita kaka mo. Mo sa mayuha ndaha a me, na sa maba ndulu konge mameme mosi, mukeelisi kaka mumosi.

17 Ni buuna, Taata hatondo me. Ka tso Taata hatondo me, mu tooni ati, me umbaanzyeholo moonyi a me, mana me mbwembaha nde wu munyatihi. 18 A hu li na muutu wu umaasa me nde ve. Ka me umbaanzyeholo nde mu litondo la me mwakulu. Me ndi na matwala ma uva moonyi, na me ndi na matwala ma ubwevolo nde. Buuna ni bu Taata a me hatuma me.»

19 Kabuhili yabwemonehele ŋa hati li Bayudaayo, mu tooni a mikuma mo miina. 20 Ba banzuhisini ŋa hati la bo baakaleele: «Nde na livupu la tengo ali. Nde na ladi. Mu hima benu libaayuhala nde?» 21 Bakima baakafutala: «Mambu mo maniima a mali ma nga livupu la tengo ve. Nga livupu la tengo utwala udibula miisu ma binzimana?»

22 Baakavyoso mukungi a tsyemili a nzo a Nzambi* hu Yeruselemi. Aba mu taangu a mutubu. 23 Yisu akataangila mu lipombo la Salomooni, hu litandala la nzo a Nzambi. 24 Bayudaayo baayadiinga nde na baaleeli nde: «Natee ki taangu we usiisa bisu hutso idiba? Tso mbuli we ni Kristo, yabisa bisu paayalala.» 25 Yisu afutili bo: «Me amiindeele benu lo, na benu a lili mu usiila me imiinu ve. Mavaanga ma me ndi mu utsa mu nduhi a Taata a me, mali mu utiila me imbangi. 26 Ka benu a lili mu usa imiinu ve, mu tooni ati benu a lili mameme ma me ve. 27 Mameme ma me mu baayuha ndaha a me. Me nzaabi mo, na mo mali mu uduukala me. 28 Me ndi mu unzyeholo mo moonyi wu bilima na bilima: mo a muukwa ve. A hu li na muutu wu utwala upatula mo ŋa kaka la me ve. 29 Taata a me wu ava me mameme, aluutala boosi mu bunene. A hu li na muutu wu utwala upatula pasi hyo ŋa kaka la Taata ve. 30 Bisu a Taata lili muutu mumosi.»

31 Bayudaayo baabwetolo mamanya mu ulanga nde. 32 Yisu abweleele bo: «Me amweese benu mavaanga ma mabwe, mu matwala ma Taata. Benu mu ki vanga lilibwe benu litondi uduba me mu mamanya?» 33 Bayudaayo baafutili nde: «A mu tooni a vanga lilibwe bisu luuduba we ve. Ka mu tooni a bu we li mu usafula bungidi bwa Nzambi. Na we wu li ndulu muutu, we li mu ubilumana ti we Nzambi✝!»

34 Yisu afutili bo: «Mu Mikele mya benu a baasonehe ve ti: "Me ndeeli, benu lili banzambi✝"? 35 Hutso Mabuuku ma Ngidi, Nzambi li mu uteele baatu ba baayaki mambu ma nde: "banzambi". Ka muutu tso mumosi, utwala ufwinzala Mabasonehe ma Ngidi ve. 36 Na me, Taata asoolo me na nde atsindaha me mu tsi. Ni mu buuna, me ndeeli ti: "Me ndi Mwana Nzambi." Ka buni benu lili mu uleele ti me ndi mu utsafula Nzambi? 37 Tso me a handi mu utsa mavaanga ma Taata a me ve, a laasiila me imiinu! 38 Ka tso me ndi me utsa mo, tso bu benu luvelesiila me imiinu, saani imiinu mu mavaanga mo maniima. Yaabaani na tsikahaani ti, Taata li mu me na me ndi mu Taata.» 39 Bo baabwesaha ukaanga nde, ka nde apatuhi ŋa myoho mya bo.

40 Yisu abweyene hu simu liina la Yolodani, ŋa mbuha yi Yowani habaandihi utondehe na nde atsahili huuna. 41 Baatu ba banzuhisini baayidi huli nde, na baakaleele: «Yowani a hasiidi iliimbu hya kimuhili tso imosi ve. Ka moosi ma nde haleeli mu bahala mo linili, maaba ma mbuli.» 42 Na huuna, ba banzuhisini baasiidi imiinu mu Yisu.