1 Yisu ayeni hu isyelo hya Olive. 2 Tsumba a ngwali, nde afutihi hu nzo a Nzambi, na baatu boosi baayidi huli nde. Nde atsahili na akalongese bo.

3 Bafarisi na milongisi mi Mikele, baabehili nde mukaasu mumosi wu baakangi mu usa mayamba. Bo baasuusi nde ŋa butima bwa baatu boosi, 4 na baaleeli Yisu: «Mulongisi, bamiikaanga mukaasu mo wunuuwu mu usa mayamba. 5 Mutso Mikele, Moose atuma bisu mu uduba mu mamanya✝, bakaasu ba we nde. Ka we buni leeli?»

6 Bo baaviidi nde hyuhu mo hiina mu utehele nde mweto, mana bakese nde. Ka Yisu abaandimi, na nde akasonehe mu mulembo mu toto. 7 Bu bo baavatini mu uva nde byuhu, Yisu ateleme, aleeli bo: «Tso ŋa hati la benu hu li na muutu wu avelesa lisumu, abaandiha ulanga nde manya.» 8 Nde abwebandama mu usonehe mu toto. 9 Bu bo baayuhi buuna, bo baavyasuhi mumosi mumosi, ubaandiha mu bakuutu. Yisu asaali siha na mukaasu wu aba ŋa butima bu litandala ŋaana.

10 Yisu abweteleme, aleeli nde: «Mukaasu, ba bakakese we ka ba bo? Muutu tso mumosi a hatsundisi we ve?» 11 Mukaasu ni ufutala ti: «Muutu ve, Pfumu.» Na Yisu aleeli nde: «Me kaka a utsundasa we ve. Yene! Ka umata loloyi, a habwesumaha.»]

12 Yisu abweleele konge a baatu: «Me ni liyalala la tsi✝. Muutu wu uduukala me a hu udyata mu piipidi ve, ka nde sa abaha liyalala la moonyi.»

13 Titswene Bafarisi baaleeli nde: «We, we ubaata imbangi mu we mwakulu. Ni mu buuna imbangi hya we a hili hya mbuli ve.» 14 Yisu afutili bo: «Tso me ndi mu uta imbangi mu me mwakulu, imbangi hya me hili hya mbuli. Mu tooni ati, me nzaabi hu me amata, na hu me ndi mu unzyene. Ka benu a liyaabi hu me amata, na hu me ndi mu unzyene ve. 15 Benu libaatsundasa mu imuutu. Ka me a handi mu utsundasa muutu ve. 16 Ka tso me ndi mu utsundasa, tsundusu a me yili yi yaafwana. Mu tooni ati, me ndi itwadi na Taata wu atsindaha me. Tso me tsundisi, me a hutsundasa siha ve. 17 Baasonehe mu Mikele mya benu ti tso baatu boole baatiidi imbangi ni hyo imosi, imbangi hya bo hili hya mbuli✝. 18 Me umbaata imbangi mu me mwakulu, na Taata wu atsindaha me, ubaata kaka imbangi mu me.» 19 Na bo baafuuli nde: «Taata a we huni a li?» Yisu afutili: «Benu a layaaba me ve, tso Taata a me ve. Kini benu layaaba me, benu likiiyaaba kaka Taata a me.»

20 Yisu haleeli mambu mo maana, ŋa nde haba mu ulongese mu nzo a Nzambi, bebele na iswehili hi bungodu. Muutu tso mumosi a hakangi nde ve, mu tooni ati taangu a nde aba kini a yatoodi ve.

21 Yisu abweleele bo: «Me aka mu unzyene, benu sa lisaha me, ka benu sa likwa mu masumu ma benu. Benu a luutwala uyene hu me ndi mu unzyene ve.» 22 Bayudaayo baakalelesene: «Nde li mu uleele ti: "Benu a lutwala uya hu me ndi mu unzyene ve." Be nde ka linyutu huduba?» 23 Yisu afutili: «Benu lili baa ŋa toto, me ndi wa hu yulu. Benu lili baa tsi mo yiniiyi. Me a handi wa tsi mo yiniiyi ve. 24 Ni mu buuna, me ndeeli ti benu luukwa mu masumu ma benu. Ka tso benu ali siidi imiinu ve ti "me, me ndi✝", benu sa likwa mu masumu ma benu.» 25 Bo ni ufuula nde: «We na we li?» Yisu afutili: «Me ndi muutu wu li mu uyabisa benu lo umata mbandu. 26 Me ndi na ma manzuhisini ma uleele mu benu, na ma manzuhisini ma utsundasa benu. Ka wu atsindaha me ubaaleele imbuli, na me umbandeele huli baatu boosi mambu ma me umbanzuha huli nde.»

27 Bo abaatsikihi ve ti nde mu Taata a nde hakatoyo. 28 Ni mu buuna Yisu habweleele: «Ŋa benu lusyenolo Mwana a Muutu, ŋaana ni ŋa benu luuyaaba ti "me, me ndi". Mu taangu mo yiina, benu luutsikaha ti, me a handi mu utsa pasi dyaambu mu me mwakulu ve. Ka me ndi mu utoyo ndulu ma Taata a me haalongese me. 29 Wu atsindaha me li itwadi na me. Nde a hasiisa me siha ve. Mu tooni ati, me umbaapanga taangu yoosi ma nde ubaatondo.» 30 Bu Yisu hakatoyo buuna, ba banzuhisini baasiidi imiinu mu nde.

31 Yisu aleeli huli Bayudaayo ba baasiidi imiinu mu nde: «Tso benu likwilili mu mikuma mya me, mu mbuli benu lili bayihi ba me. 32 Benu sa liyaaba imbuli, na imbuli sa hiva benu bunyanga.» 33 Bo baafutili nde: «Bisu lili ba imbisa hya Abrahami. Bisu kini a laabeedi baviha ba muutu ve. Buni we utwala uleele ti: "Benu sa liba bunyanga"?» 34 Yisu afutili bo: «Mu mbuli mu mbuli me ndi mu undeele benu, pasi muutu wu usumaha, nde li muviha lisumu. 35 Muviha a hali musi ibaandu ve. Ka mwaana ubaakwilala mu hyo. 36 Ka tso Mwana viidi benu bunyanga, benu sa liba bunyanga bwa mbuli a mbuli. 37 Me nzaabi ti benu lili baa imbisa hya Abrahami. Ka benu lili mu usaha manzila ma uduba me. Mu tooni ati, benu a lili mu usiinga mikuma mya me ve. 38 Me ndi mu undeele ma me amono huli Taata a me. Ka uto ti benu, saani ma benu laayuhi huli taata a benu.»

39 Bo baafutili: «Taata a bisu Abrahami.» Yisu ni uleele bo: «Tso benu lili baana ba Abrahami, benu likiisa mavaanga ma nde. 40 Ka bunuubu, me wu ndi mu undeele benu imbuli hi me anziha huli Nzambi, benu lili mu usaha uduba me. Abrahami a hasiidi buuna ve. 41 Benu lili mu usa mavaanga we ma taata a benu.» Bo ni uleele nde: «Bisu a lili baana ba baabuta mu mayamba ve. Bisu lili na Taata ndulu mumosi, ni Nzambi.»

42 Yisu afutili bo: «Tso Nzambi li mu mbuli Taata a benu, benu likiiba na litondo mu me. Mu tooni ati, me mu Nzambi apala na, ni mu nde me ndi. Me a hanza mu matsimi ma me mwakulu ve, ka mu ma wu atsindaha me. 43 Benu laaveletsikaha biyambilili bya me, bu benu laaveletwala uyaka mikuma mya me. 44 Taata a benu mukuyi. Na benu litondi ukuhasa ma taata a benu ubaatondo usa. Nde li mudubi umata mbandu. Nde a hali hutso imbuli ve, mu tooni ati imbuli a hili mu nde ve. Ŋa nde ubaasuunda mapfuta, mo maakwelene na mbiili a nde. Mu mbuli nde ni mupfuti, na nde li taata mapfuta. 45 Ka me, bu me ndi mu undeele imbuli, benu a lili mu usiila me imiinu ve. 46 Na mu benu utwala umweese ti me amiitsumaha? Na tso me ndi mu undeele imbuli, mu hima benu laavelesiila me imiinu? 47 Muutu wu li wa Nzambi, ubaayuha mambu ma Nzambi. Benu a lili mu uyuha ve, mu tooni ati benu a lili baana ba Nzambi ve.»

48 Bayudaayo baafutili: «Bisu a lili na mbiinga mu uleele ve ti we musi Samariya, nga livupu la tengo?» 49 Yisu afutili bo: «Me a handi na livupu la tengo ve. Ka me umbaakiinza Taata a me, na benu lili mu upenye me. 50 Me a handi mu utsaha muyusu a me mwakulu ve. Hu li na mumosi wu ubaasahila me muyusu, ni nde wuuna wu ubaatsikaha misamu na bukuhu bwosi. 51 Mu mbuli, mu mbuli me ndi mu undeele benu, pasi wu ukeelese mikuma mya me a humono lipfu ve ka sa akwilala.»

52 Bayudaayo baafutili: «Bunuubu, bisu limiisilasa ti we na livupu la tengo! Abrahami akwidi, mimbihuli kaka myakwidi, na we li mu uleele: "Pasi muutu wu ukeelese mikuma mya me, nde a humono lipfu ve, na nde ukwilala mu bilima na bilima." 53 We alutaala taata a bisu Abrahami wu akwidi? Mimbihuli kaka myakwidi. Ka we na li? We hima tondi umweese?» 54 Yisu afutili bo: «Tso me ndi mu unzuusa me mwakulu, muyusu a me a hali na tsongo ve. Ka Taata a me ni wu ubaamweese muyusu a me. Benu lili mu uleele ti: "Nde li Nzambi a bisu". 55 Benu a liyaabi nde ve, ka me, me nzaabi nde. Tso me ndeeli ti me a hanzaabi nde ve, me umba mupfuti we benu. Ka me nzaabi nde, na me umbaakeelese mikuma mya nde. 56 Abrahami, taata a benu asalumini mu kinya, mu tsimi yi umono ilumbu hya nziili a me. Nde amoni hyo na nde aluuli mu kinya.» 57 Bayudaayo baaleeli nde: «We a hakuhasa tso maku mataanu (50) ma bilima ve, na we leele ti: "Me amoni Abrahami"?» 58 Yisu afutili bo: «Mu mbuli mu mbuli me ndi mu undeele benu, tswamina babuta Abrahami, "me, me ndi".» 59 Humbisa uyuha mambu mo maana, bo baatoli mamanya mu ulanga nde, ka Yisu aswemi na apali mu nzo a Nzambi.