1 Tswamina mukungi a Paake, Yisu ayaabi ti taangu a nde yi usiisa tsi mo yiniiyi, mu uyene huli Taata aba yaamiito. Nde aba atondo ba nde ba baaba mu tsi. Nde aba afula utondo bo natee hu tsukusu. 2 Bu Yisu na bayihi ba nde baakadya ilaambu hya tsitsaha, Mukuyi aba amiikotele mutima a Yuda, mwaana a Simoni Isikariyoti, mu usumbasa Yisu. 3 Yisu ayaabi ti Taata aviidi byosi mu lituma la myoho mya nde, na ti huli Nzambi nde hamati. Ka nde yaabi kaka ti nde ufutaha huli Nzambi. 4 Nde ateleme ŋa metse, amaasi muroopo* a nde, na avoli ileembe hya tsanda hi nde hapoti mu luungu la nde. 5 Titswene, nde ayitili mamba ŋa ikoombe, na abandihi uswaha miilu mi bayihi ba nde na ukombolo myo mu ileembe.

6 Yisu ato ŋa busu bwa Simoni Peetelo, Peetelo aleeli nde: «We wu li Pfumu, we swaha miilu mya me?» 7 Yisu afutili nde: « We a hali mu utsikaha ma me ndi mu utsa ve. Ka we sa bangula mo hu busu.» 8 Peetelo aleeli nde: «Naana, we a huswaha miilu mya me ve.» Yisu afutili nde: «Me upeletswaha miilu mya we, we a huba itwadi na me ve.» 9 Simoni Peetelo aleeli nde: «Bunuubu Pfumu, a haswaha ndulu miilu, ka swaha napa myoho na mutswe.» 10 Yisu abweleele: «Muutu wu miiyobo mamba a hali na nzala ubweyobo nyutu yoosi ve. Peleve uswaha miilu, mu tooni ati nde li wu atsyeme woosi. Benu lili baa laatsyeme, ka a benu boosi ve.» 11 Yisu aba ayaaba ti Yuda usumbasa nde. Ni mu buuna nde haleeli ti: «Benu lili baa laatsyeme, ka a benu boosi ve.»

12 Bu nde hamani uswaha bo miilu, Yisu abwevolo muroopo a nde, abwefutaha ŋa metse, na aleeli bo: «Benu limiitsikaha ma me miitsiila benu? 13 Benu libaateele me "Mulongisi" na "Pfumu", na benu lili na mbiinga, mu tooni ati buuna ni bu me ndi. 14 Ni mu buuna, tso me wu ndi Pfumu na Mulongisi a benu, me miitswaha benu miilu, benu kaka lafwana uswahasana miilu. 15 Me miimweese benu ifwaani, mana benu kaka lisa we bu me tsiidi mu benu. 16 Eye, me ndeele benu, ni mbuli: musalili a hubaalutala pfumu a nde ve. Na bumosi kaka, iluumbi a hyalutala wu miitsindaha nde ve. 17 Bunuubu, benu limiiyaaba lo, benu sa liba mu kinya tso benu lisalili lo.»

18 «Me a handi mu undeele mu benu boosi ve. Me nzaabi ba me atsoolo. Ka hwafwana ti Mabasonehe mu Mabuuku ma Ngidi matswiha: "Wu akakabasana lipa na me, amiikinguhala me✝." 19 Me mbaandiha uleele benu lo, bu dyaambu kini a laavangimi ve, mana ŋa lo luuvagama, benu lisa imiinu ti "me, me ndi". 20 Eye, me ndeele benu lo, ni mbuli: Pasi muutu wu uyaka wu me utsindaha, ni me nde ayaki; na pasi muutu wu uyaka me, yaki kaka wu atsindaha me.»

21 Ŋa yulu a mambu mo maana, Yisu amoni lingebe li lilahi, na ayabisi paayalala: «Eye, me ndeele benu, ni mbuli, mumosi mu benu sa asumbasa me.» 22 Bayihi baatalisini, hwavele uyaaba mu na nde hakaleele maana. 23 Mumosi mu bayihi, wu Yisu haba hatondo, aba atsahala ŋa pedu a Yisu. 24 Simoni Peetelo avesi nde mu buyedi, mu ufuula Yisu, mu na nde hakatoyo. 25 Buuna, muyihi mo wuuna abaandimi ŋa tulu a Yisu na afuuli nde: «Pfumu, na wuuna?» 26 Yisu afutili: «Me tsa tuba itini hi lipa hutso a byudya. Wu me upa hyo, ni nde wuuna.» Na Yisu avoli itini hi lipa, atubi hyo hutso a byudya, na aviidi hyo Yuda, mwaana a Simoni Isikariyoti. 27 Bu Yuda havoli itini hi lipa, Saatana akoti mu nde. Yisu aleeli nde: «Mambu ma we li na mo mu uvanga, vanga mo mawasa!» 28 Muutu tso mumosi mu ba baaba ŋa metse, a hatsikihi mu hima nde hakaleele nde buuna ve. 29 Bu Yuda haba ikanga-koome hya mbongo, ba banzuhisini baatsimi ti Yisu nde hakatuma mu uyasuumba bi bo baakisalila mu mukungi, buuve mu uyakabila mbongo huli biyaha. 30 Yuda avoli itini hi lipa, na apali mu mawasa. Aba aka butsuhu.

31 Bu Yuda hapali, Yisu aleeli: «Bunuubu muyusu a Mwana a Muutu miimonehele, na muyusu a Nzambi li mu umonehele mu nde. 32 [Na tso muyusu a Nzambi li mu umonehele mu Mwana,] Nzambi mu nde mwakulu kaka, sa ayusa Mwana a nde. Nde sa atswihasa lo mu mawasa. 33 Baana ba me, me ndi na benu ndulu mu mwaana a taangu hoole, humbisa benu luuyehele usaha me. Ka me ndi mu undeele benu ma me andeeli huli bakuutu ba Bayudaayo: benu a luutwala uyene hu me ndi mu unzyene ve. 34 Me miipa benu mukele wu munyatihi: tondosonwani. Benu lafwana utondosono, we bu me atondi benu. 35 Tso benu libaatondosono, buuna boosi sa bayaaba ti benu lili bayihi ba me.»

36 Simoni Peetelo afuuli nde: «Pfumu, we huni li mu uyene?» Yisu afutili nde: «We a hutwala uduukala me hu me ndi mu unzyene ve. Ka we sa duukala me mu matangu ma hubusu.» 37 Peetelo aleeli nde: «Pfumu, mu hima me upelendukala we mawasa ma? Me wu apangama ndi, mu ukwa mu tooni a we!» 38 Yisu afutili nde: «We amiivangama mu ukwa mu tooni a me? Ka nyaha me ndeele we, mu mbuli: tswamina tsusu akohele, we sa utunala me tunala tatu.»