1 Buuna Pilaato atumi mu ubita Yisu, na mu ufwinza nde bikooti. 2 Masadaadu maatungi mutata wu matsyende. Mo maasuusi nde ŋa yulu mutswe a Yisu na maalwatisi nde libita li libenge. 3 Titswene bo baakayasusaha ŋa pedu a nde na ubaaleele: «Bwehe, mutumi Bayudaayo!» Na bo baakatete nde mapali. 4 Pilaato abwepala hu mbadi, na aleeli huli Bayudaayo: «Monwaani, me ka mu umbehele benu nde hu mbadi, mana benu liyaaba ti me a hamono pasi dyaambu li utsundasa nde ve.» 5 Titswene, Yisu apali hu mbadi na mutata matsyende ŋa yulu mutswe, na libita li libenge mu nyutu. Na Pilaato aleeli bo: «Monwaani muutu mo ndyowunuuwu!» 6 Bu bakuutu ba bangaanga ba Nzambi na bakeedi baamoni nde, bo baafulihi: «Komene nde ŋa muti! Komene nde ŋa muti!» Pilaato aleeli bo: «Volwaani na komenaani nde benu mwakulu ŋa muti. Me a handi mu umono dyaambu li utsundasa nde ve.» 7 Bayudaayo, baafutili nde: «Bisu lili na Mikele, na Mukele mumosi ubaaleele ti, nde afwana mu ukwa. Mu tooni ati, nde miibilumana "Mwana a Nzambi✝".»

8 Bu Pilaato hayuhi mambu mo maana, boomo bwa nde bwafulili. 9 Nde akoti hu nzo a tsundusu na nde afuuli Yisu: «We huni amata?» Ka Yisu a hafutili nde mvutu ve. 10 Buuna, Pilaato ni uleele nde: «We bisi ufutala me mvutu? We yaabi ti, me ndi na matwala ma unyahula we, na ma ukomene we ŋa muti.» 11 Yisu afutili: «We a hakiiba na matwala mu me ve, tso mo a mamati huli Nzambi ve. Ni mu buuna, wu yehuli me huli we, bahi tooni yi lisumu lilinene hwafulala we.»

12 Umata taangu mo yiina, Pilaato akasaha unyahula Yisu. Ka Bayudaayo baakafulaha: «We unyahula nde, we a hali mbaahi a mutumi Kayisaali ve. Pasi muutu wu ubaabilumana pfumu a tsi, li muboho a Kayisaali.» 13 Bu Pilaato hayuhi mambu mo maana, nde abiti Yisu hu mbadi, na atsahili ŋa itsiha hi mutsundisi, ŋa mbuha yi bubaateele: «Mbuha yi baayala Mamanya», mu Ibeleho ubaateele «Ngabata». 14 Aba ilumbu hi hyakatehele pangimisi mukungi a Paake, hupedu a mwangulu. Pilaato aleeli huli Bayudaayo: «Pfumu a benu, ndyowunuuwu!» 15 Na baabwi mu ufulaha: «Duba! Duba! Komene nde ŋa muti!» Pilaato afuuli bo: «Me komene pfumu a benu?» Bakuutu ba bangaanga baa Nzambi ba baafutili: «Bisu a lili na pfumu mukima ve, ŋa yulu a mutumi Kayisaali.» 16 Bunuubu, Pilaato ayehuli bo Yisu, mana bayakomene nde ŋa muti.

17 Yisu abiti muti a kuruwa nde mwakulu na apali mu musyenge, mu uyene hu mbuha yi bubaateele: «Mbuha yi Ibanga», mu Ibeleho: «Ngolongota». 18 Ni huuna, bo baakomini Yisu ŋa muti na baatu boole bakima, ba baakomini mu bakuruwa ba bo. Mumosi baakomini hu mbahala, na wuna hu kaasu na Yisu ŋa hahati. 19 Pilaato atumi ubaandiha baya ŋa kuruwa a Yisu. Baya li baaba baasonehe bunuubu: «Yisu musi Nazareti, Mutumi Bayudaayo.» 20 Bayudaayo ba banzuhisini baataangi bisono mo biina, mu tooni ati mbuha yi baakomini Yisu yaaba ŋa pedu musyenge. Bisono bi baasonihi aba mu ndaha Ibeleho, mu Ingereke na mu Ilatino. 21 Bangaanga ba Nzambi baatsomi baa Bayudaayo, baaleeli huli Pilaato: «A hasonehe: "Mutumi Bayudaayo", ka sonehe: "Muutu mo wunuuwu aleeli ti: Me ni Mutumi Bayudaayo."» 22 Pilaato afutili: «Bi me miitsonehe, me miitsonehe byo nzyeni.»

23 Bu masadaadu maamani ukomene Yisu ŋa muti a kuruwa, mo maavoli bikutu bya nde na maasiidi makabu mana, kabu limosi mu pasi lisadaadu. Masadaadu maavoli kaka ikutu hya talu*, hi hyaba mu tsanda mosi, umata hu yulu natee hu tsina. 24 Masadaadu maalelisini: «linyahaani ukasula hyo, ka litaani hyo ngodo, mu uyaaba na ubaha hyo.» Aba mu tooni ati, Mabasonehe mu Mabuuku ma Ngidi matswiha:

«Bo baakabisini bikutu bya me,

na bo baatidi ikutu hya me ngodo✝.»

Mono mambu ma masadaadu maavaangi.

25 Ŋa muvanga a muti a kuruwa a Yisu, hwaba hwateleme: bangu ba nde boole, Mariya mukadi a Kolopasi, na Mariya musi Magadala. 26 Yisu amoni ngu a nde na muyihi wu nde hakatondo, ateleme ŋa pedu a nde. Yisu aleeli huli ngu a nde: «Maama, mono mwaana a we.» 27 Titswene, nde aleeli huli muyihi a nde: «Mono, ngu a we.» Na umata taangu mo yiina, muyihi avoli Mariya na akatsahala na nde.

28 Hu mbisa a mambu mo maana, Yisu aba ayaaba ti moosi mamiikuha. Ka mu tooni a Mabasonehe mu Libuuku la Ngidi mavangama, Yisu aleeli: «Me aka na peyu a mamba✝.» 29 Hwaba ŋaana na itehili hi hyaba hyaluula mu vinye a nganyi. Masadaadu maabotihi mukamuna mutso a vinye✝, bo baakatisi nde mu itini hi muti hya isopi na baayasuusala hyo mu munywa a Yisu. 30 Bu Yisu habiimbi vinye a nganyi, nde aleeli: «Moosi mamiitswiha!» Titswene, nde abohili likingu na amani muvumu.

31 Hwaba ilumbu hi hyakatswamina mukungi a Paake. Bo a baatondi unyaha nyutu bamvumbi ŋa yulu bakuruwa mu ilumbu mo hiina ve, mu tooni ati, ilumbu hya Saba mo hiina aba ilumbu hya tsongo. Buuna, batumi baa Bayudaayo baavondi muswa huli Pilaato, mu uboholo miilu mi bavumbi na usutasa nyutu a bo. 32 Ni mu buuna, masadaadu maayidi mu uboholo miilu mya watsomi wu baakomini itwadi na Yisu, titswene bo baabohili mya waboole. 33 Ka, bo bayato mu Yisu, bo a baabohili miilu mya nde ve. Mu tooni ati, nde aba amiikwa. 34 Lisadaadu limosi laapihi nde kongo mu libanzi. Mu mawasa, makila na mamba byapali mu nyutu a nde. 35 Muutu wu amoni moosi ma maavyohi, atiidi imbangi na imbangi hya nde hili hya mbuli. Nde yaabi ti, mambu ma nde haleeli ni mbuli. Ka nde haleeli mambu mo maana, mana benu kaka lisa imiinu. 36 Mambu mo maana maavangimi, mana Mabasonehe mu Libuuku la Ngidi matswiha: «A buboholo visi la nde tso limosi ve✝.» 37 Na tsyelo kima, Libuuku la Ngidi lili mu ubweleele: «Bo sa batala huli wu bo baapihi nde libanzi✝.»

38 Humbisa a maana, Yosefi musi Arimate, wu aba muyihi a Yisu, ayavolo nyutu a nde. Nde ayavondo muswa huli Pilaato mu usutasa nyutu a Yisu. Nde asiidi lo mu tswehi, mu tooni a boomo bu Bayudaayo. Pilaato aviidi muswa huli Yosefi mu usutasa mvumbi.

39 Nikodemo wu ayamono Yisu hutso butsuhu, ayidi kaka na abehi nyafi yi baavanga mu miire na alowesi. Nyafi yaakaleme bebele na bakilu maku-matatu (30).

40 Bo baboole baavoli nyutu a Yisu na baapoti yo mu birende bya tsanda ya lino. Baapuhili yo nyafi, we bu hwaba bipfu bya ndihili huli Bayudaayo. 41 Hwaba na wooto ŋa ibiingi hya mbuha yi baakomini Yisu ŋa muti a kuruwa. Na hutso a wooto aba na ngila yi nyatihi, yi yaaba kini a baadihi muutu ve. 42 Bu hwaba ilumbu hi hyakatswamina mukungi a Paake, na bu ngila yaba bebele, bo baasusi nyutu a Yisu hutso a ngila mo yiina.