1 Bu nde hamani uleele buuna, Yisu na bayihi ba nde baayeni na baasabuhi hu simu lina la mbeenge a Sederoni. Huuna hwaba na ngundu miti mosi hu Yisu hakoti na bayihi ba nde. 2 Yuda, wu akuti mu usumbasa Yisu, aba ayaaba mbuha mo yiina. Mu tooni ati, Yisu na bayihi ba nde baaba na ipfu hi ubaapfutana huuna. 3 Ni mu buuna, Yuda habiti kabu li balwani, na bakeelisi, ba bakuutu ba bangaanga ba Nzambi na Bafarisi baatsindihi, na ayeni na bo hu ngundu miti. Bo baaba na bilwanili, na miinda, na minyangi.

4 Bu Yisu haba hayaaba moosi ma maakayiila nde, nde ayidi na aleeli bo: «Na benu lili mu usaha?» 5 Bo bafutili: «Yisu, musi Nazareti.» Yisu ni uleele bo: «Me ndyowunuuwu!» Yuda wu akasumbasa nde ni ŋaana haba na bo. 6 Ŋa Yisu haleeli bo ti: «Me ndyowunuuwu», bo baafutihi mambimbisa, na baabwiidi ŋa toto. 7 Yisu abwefuula bo: «Na benu lili mu usaha?» Bo baafutili: «Yisu musi Nazareti.» 8 Yisu afutili bo: «Me ndeeli benu ti "me ndyowunuuwu." Tso ni me benu lili mu usaha, nyahaani bana bayene.»

9 Aba mu tooni ukuhasa mikuma mi nde haleeli: «Me a hanyambasana muutu tso mumosi mu ba we ava me ve.» 10 Simoni Peetelo wu aba na sabila apalisi nde, na ateti musalili a mukuutu bangaanga ba Nzambi, na akesi nde tswi la mbahala. Nduhi musalili mo wuuna aba Malakusi. 11 Ka Yisu ni uleele Peetelo: «Futala sabila a we hutso isupu hya nde. We li mu utsima ti me a hunywa mbuungu yi mapasi, yi Taata hamiivangimasa mu me ve?»

12 Kabu li balwani na mukuutu a lo, na bakeedi baa Bayudaayo, baakangi Yisu na baahadi nde mikudu mu myoho.

13 Bo baamabita nde huli Ane, wu aba buko bwa Kayifa. Kayifa aba mukuutu bangaanga ba Nzambi mu ilima mo hiina. 14 Ka Kayifa ni wu aviidi ndoongi mo yiniiyi huli bakuutu ba Bayudaayo: «Hu li bubwe ti muutu mumosi kwidi ŋa mbuha a buli.»

15 Simoni Peetelo na muyihi mukima baakaduukala Yisu. Muyihi mukima wuuna, aba ayabaana na mukuutu bangaanga ba Nzambi watsomi. Ni mu buuna, nde hakoti nzila mosi na Yisu hutso litandala la nzo mukuutu mo. 16 Ka Peetelo asaali humbadi litandala, bebele na ikotili. Muyihi wu aba ayabaana na mukuutu mo, apali na atoyi na mukaasu wu akakeelese ikotili. Titswene, nde atumisi ukotese Peetelo. 17 Buuna, mukaasu wu abakeedi ikotili afuuli Peetelo: «We kaka a hali mumosi mu bayihi ba bahala mo linili ve?» Nde aleeli: «Naana, a me ve!»

18 Basalili na bakeedi ba baaba ŋaana, baaduuki mbaahu mu makala, yi bo baakayoto mu tooni a piyu. Peetelo kaka aba na bo na akayoto mbaahu.

19 Mukuutu bangaanga ba Nzambi watsomi afuuli Yisu mu bayihi ba nde, na mu ndongisili a nde. 20 Yisu afutili nde: «Me akatoyo paayalala huli baatu boosi. Me akandongese taangu yoosi mu manzo ma lisambulu li Bayudaayo, na mu nzo a Nzambi hu Bayudaayo boosi bubaapfutana. Me a handeele pasi dyaambu mu tswehi ve. 21 Mu hima we li mu uva me hyuhu mo hiina? Fuula boosi ba baayuha ma me anzabisa bo. Bo bayaabi moosi ma me andeele.» 22 Yisu amana uleele buuna, mumosi mu bakeedi ba baaba ŋaana, ateti nde lipali na aleeli: «Buuna ni bu hwafwana mu ufutala mukuutu bangaanga ba Nzambi?» 23 Yisu afutili nde: «Tso me miitoyo bubi, mweese ti ma me miindeele a mafwana ve. Na tso me miitoyo bubwe, mu hima we miitete me?» 24 Na Ane atsindihi nde wu bahada mikudu, huli Kayifa mukuutu bangaanga ba Nzambi.

25 Simoni Peetelo aba ŋa litandala ŋaana mu uyoto mbaahu. Baafuuli nde bunuubu: «We kaka, we a hali mumosi mu bayihi ba nde ve?» Nde atuni na aleeli: «A me ve.» 26 Mumosi mu basalili ba mukuutu, ikuta hya wu Peetelo hakesi tswi, aleeli: «Me a hamoni we na nde hutso a ngundu miti ve?» 27 Peetelo abwetunala nde. Na mu mawasa, tsusu akohili.

28 Bamata hu nzo a Kayifa, bo baabiti Yisu hu nzo mutumi ŋa hati a ngwali. Ba baabiti nde, a baakoti mu nzo ve, mu uvelesumaha na mu tooni udya Paake. 29 Ni mu buuna, mutumi Pilaato hasusihi hupedu a bo humbadi. Nde afuuli bo: «Mu ki dyaambu benu lili mu ukese bahala mo linili?» 30 Bo baafutili nde: «Tso nde a hali muvaangi a mambu ma mabi ve, bisu a likiibehele we nde ve.» 31 Ŋa yulu a ŋaana, Pilaato aleeli bo: «Benu mwakulu, volwaani nde na tsundasaani nde we bu hu li Mikele mya benu.» Bayudaayo baafutili nde: «Bisu a lili na muswa mu uduba muutu ve.»

32 Aba mu ukuhasa ma Yisu haleeli, bu nde halahi mu ki pila lipfu nde hukwila. 33 Pilaato akoti mu nzo a nde, ateeli Yisu na afuuli nde: «We ni mutumi Bayudaayo?» 34 Yisu afutili: «We mu we mwakulu leeli lo, vo ti bu bakima baaleeli we lo mu tooni a me?» 35 Pilaato ni ufutala nde: «Me kaka Muyudaayo ndi? Baatu ba tsi a we, na bakuutu ba bangaanga ba Nzambi bamiiyasumbasa we huli me. We ki dyaambu asa?» 36 Yisu ni ufutala: «Ipfumu hya me a hili hya tsi mo yiniiyi ve. Tso ipfumu hya me hikiiba hya tsi mo yiniiyi, kini basalili ba me bamiikalana me, mana bavelevahula me huli bakuutu ba Bayudaayo. Ka a buuna ve, ipfumu hya me a hili hya tsi mo yiniiyi ve.» 37 Pilaato aleeli nde: «We mutumi we li?» Yisu afutili: «Ni we li mu uleele ti me "mutumi" ndi. Ka baabuta me, na ni me anza ŋa tsi mu utiila imbangi imbuli. Muutu wu abaambana na imbuli, ubaayuha ma me ndi mu undeele.» 38 Pilaato afuuli nde: «Imbuli ni hima?»

Pilaato amana uleele buuna, nde ayeni huli Bayudaayo na nde aleeli bo: «Me a handi mu umono dyaambu tso limosi li ukotese nde ikondaayi ve. 39 Ka benu na ipfu hya ti, pasi mukungi a Paake me ukaanyahula benu kondaayi mumosi. Benu litondi ti me nyahula benu mutumi Bayudaayo?» 40 Na bo baabwefulaha: «Naana, a nde ve! Nyahula bisu Barabasi!» Kaahu Barabasi aba mutaani.