1 «Me, me ni muti a vinye✝ wa mbuli na Taata a me ni musali a ngundu. 2 Pasi itabi hi hyakangama mu me na hi hyavele na mbutu, Taata ubaatsakula hyo. Na pasi itabi hi hili na mbutu, nde ubaatsyemese hyo, mana hyo hibwefulala ubuta mbutu. 3 Ka benu, benu laamiitsyeme mu tooni a mikuma mi me anzabisa benu. 4 Kangamaani mu me, we bu me akangama mu benu. Itabi hi muti a vinye utwala ubuta mbutu mu hyo mwakulu ve, tso hyo a hyakangama na muti a vinye ve. Ni bumosi kaka, benu utwala ubuta mbutu, tso benu a laakangama mu me ve.

5 Me ni muti a vinye, benu lili bitabi. Muutu wu akangama mu me, na wu me akangama mu nde, ubaabuta mbutu yindahi, mu tooni ati me uvele, benu utwala usa pasi isiha ve. 6 Ka muutu avelekangama mu me, sa babwaha nde hu mbadi we itabi hi muti, na humbisa hyo hibaakanya. Bu bamiimana utolo bitabi bi byakanya, bubaabwaha byo hu mbaahu na byo bibaanyenge. 7 Tso benu likwilili mu me, na mambu ma me makwilili mu benu, vondwaani pasi hi benu litondi, benu sa libaha hyo. 8 Ŋa benu luubuta mbutu yindahi, na ŋa benu luumonehele bayihi ba me, ni ŋaana muyusu a Taata a me humonehele.»

9 «We bu Taata hatondo me, me kaka atondo benu. Kwilalaani mutso litondo la me. 10 Bu me atsiingili matumili ma Taata a me, me ndi mu ukwilala hutso litondo la nde. Bumosi kaka, benu lisiingala matumili ma me, benu sa likwilala hutso litondo la me.»

11 «Me miindeele benu mambu mo maana, mana kinya a me yiba mu benu, na kinya a benu yiba yi yasupahana✝. 12 Mukele a me ni wunuuwu: tondosonwani we bu me atondo benu. 13 Litondo li laalutala, ni ukwa mu tooni bambaahi. 14 Benu lili bambaahi ba me, tso benu lili mu usa ma me ndi mu utuma benu. 15 Me a handi mu umbweteele benu basalili ve. Mu tooni ati musalili a hubaayaaba ma pfumu a nde ubaasa ve. Ka me ndi mu uteele benu bambaahi, mu tooni ati me unzabisa benu moosi ma me anziha huli Taata a me. 16 A benu laasoolo me ve, ka me ni wu asoolo benu. Me miipa benu tumili mo yiniiyi: yenaani, butaani mbutu yi yukwilala. Buuna, pasi hi benu luuvondo huli Taata mu nduhi a me, nde sa ava benu hyo. 17 Dyambu li me ndi mu utuma benu, ni utondosono.»

18 «Tso baatu ba tsi baabelele benu, yaabaani ti bo baatswamini ubelele me. 19 Tso benu laakiiba baatu ba tsi mo yiniiyi, tsi yakiitondo bi bili mu yo. Ka benu a lili baatu ba tsi ve. Me atsoolo benu ŋa hati la baatu ba tsi, ni mu tooni mo yiina baatu ba tsi baabelele benu. 20 Yibwalaani moonyi mu mikuma mi me andeeli benu: "Musalili a hubaalutala pfumu a nde ve." Tso baatsuti me, bo sa batsuta benu kaka. Tso baakeelisi mikuma mya me, bo sa bakeelese mikuma mya benu kaka. 21 Ka bo busiila benu mavaanga ma mabi maana moosi mu tooni a me. Mu tooni ati, bo a baayaba wu atsindaha me ve. 22 Tso me a hanzidi ve, na tso me a handongisi bo ve, bo a baakibaha masumu ve. Ka bunuubu, bo utwala utuna masumu ma bo ve. 23 Muutu wu li iboho na me, nde li kaka iboho na Taata a me. 24 Tso me a hatsiidi bipadi ŋa hati la bo ve, bipadi bi muutu mukima havelesa, bo a baakibaha masumu ve. Ka bunuubu, bo baamiimono byo, na bo baamiibelele me na Taata a me. 25 Dyambu mo linili limiivangama, mana Mabasonehe mu Mikele mya bo, matswiha: "Bo baabelili me hwavele a tooni✝."»

26 «Me utsindaha benu Mukaliini wu umata huli Taata. Ni Livupu li luumata huli Taata, li luumweese imbuli. Ŋa nde huya, nde utiila me imbangi. 27 Benu kaka, sa litiila me imbangi, mu tooni ati benu lili na me umata mbandu.»