1 Bilumbu bitatu bivyoho, hwaba na makweele hu musyenge a Kana, hu itaanzi hya Ngalili. Ngu a Yisu aba ŋaana. 2 Baatsihi kaka Yisu na bayihi ba nde hu makweele mo maana.

3 Bu malamu maafwidi, ngu a Yisu aleeli nde bunuubu: «Bo a basaali na malamu ve.» 4 Yisu afutili nde: «Mukaasu*, ki lo ŋa hati la we na me? Tangu a me kini a yaatoodi ve.» 5 Ngu a Yisu aleeli huli basalili: «Vaangaani moosi ma nde hutuma benu.»

6 Hwaba ŋaana na masanga masamunu ma manene, ma Bayudaayo baakasalila mu tsyemili. We bu hwaba bipfu bya bo. Pasi lisanga laaba na iteesi bebele kama (100) li bikidama. 7 Bunuubu, Yisu aleeli bo: «Lusaani masanga mo maniima mu mamba.» Na bo baaluusi mo. 8 Yisu aleeli bo: «Ni tehaani mamba mo maniima, na bitaani mo huli mukuutu mukungi.» Na bo baabitili nde mo. 9 Bu mukuutu mukungi habiimbi mamba ma maakituhi malamu, nde a hakayaaba huni malamu mo maana maamati ve. Ka basalili ba baatehi mamba aba bayaaba. Nde ateeli mukweli, 10 na nde aleeli nde: «Pasi muutu ubamaatehele baatu malamu ma tsohele, titswene ŋa baatu bamiikolo, nde tehili bo malamu ma myenge. Ka we swehi malamu ma mabwe natee bunuubu!»

11 Hiina ni iliimbu hya kimuhili hyatsomi hi Yisu hasiidi. Aba hu musyenge a Kana hu Ngalili. Nde amweesi muyusu a nde, na bayihi ba nde baasiidi nde imiinu. 12 Titswene, nde ayeni hu musyenge a Kapernahumi, na ngu a nde, na baana ba ngu a nde na bayihi ba nde. Na bo baavyosi huuna ndulu mwa bilumbu.

13 Mukungi a Paake yi Bayudaayo aba aka bebele, na Yisu ayeni hu Yeruselemi✝. 14 Mu litandala la nzo a Nzambi, nde abiisi basuumbisi ba bangombe, baa mandombo na baa mabembe. Nde amoni kaka baatu ba bubaasa sanzi a mbongo, baaba batsahala ŋa busu bwa metse ma bo. 15 Bu nde havaangi ikooti mu mikudu, nde abingi bo boosi mu litandala la nzo a Nzambi, napa mandombo na bangombe ba bo. Nde atsali mbongo a banga masanzi, nde atakuli metse ma baakasalila, 16 na nde aleeli huli basuumbisi baa mabembe: «Masaani bi byosi ŋa mbuha mo yiniiyi. A likitusa nzo a Taata a me saandu ve!» 17 Bayihi ba nde baayibwili moonyi mu mambu Mabasonehe ma Ngidi: «Litondo li me ndi na lo mu tooni a nzo a we o Nzambi, lili mu me we mbaahu yi yili mu ukudasa me✝.»

18 Bayudaayo baafuuli nde: «Ki iliimbu hya kimuhili we mweesi bisu, mu ubaha muswa wu usa maniima?» 19 Yisu afutili bo bunuubu: «Tsalaani nzo a ngidi mo yiniiyi. Mu bilumbu bitatu, me umbwetelemese yo.» 20 Bayudaayo baakaali nde bunuubu: «Mu utuunga nzo mo yiniiyi, baasiidi maku mana ma bilima, bilima bisamunu. Na we ti mu bilumbu bitatu we ubwetelemese yo?» 21 Ka nzo a ngidi yi nde hakaleele, aba ni nyutu a nde mwakulu. 22 Ni mu buuna, ŋa nde husuuha mu babaakwa, bayihi ba nde bu uyibwala moonyi ti nde aleeli buuna. Na bo bu usa imiinu mu Libuuku la Ngidi, na mu mambu ma Yisu haleeli.

23 Ŋa Yisu haba hu Yeruselemi, hu mukungi a Paake, baatu ba banzuhisini baasiidi imiinu mu nduhi a nde, mu tooni a bu bo baamoni biliimbu bya kimuhili bi nde hakasa. 24 Ka Yisu a hakasa hiitu mu bo ve, mu tooni ati nde aba ayaaba bo boosi. 25 Nde a habeedi na nzala ti muutu ayabisa nde pasi dyaambu li litala muutu ve, mu tooni ati nde aba ayaaba ma mali mu mutima a muutu.