1 Yisu ayaabi ti Bafarisi baayuhi ti nde akabaha, na utondehe bayihi ufulala Yowani. 2 Imbuli ni ti, Yisu nde mwakulu a hakatondehe baatu ve. Ka ni bayihi ba nde baakatondehe. 3 Titswene, nde asiisi tsi a Yude na afutihi hu Ngalili. 4 Mu uyene hu tsi Ngalili, hwafwani huli nde mu ukese mu tsi a Samariya. 5 Nde atoodi ŋa bula bumosi bu bwaba bebele na tsi a Samariya, bwa nduhi a Sikari. Bula mo buuna bwaba ŋa pedu a tsyehe yi Yakobi haviidi huli mwaana a nde Yosefi✝. 6 Huuna, hwaba na iyuna hya mamba hya Yakobi. Bu Yisu haba hamiikolo mu tooni mudyenge, nde ayatsahala ŋa muvanga a iyuna mo. Aba bebele na mwangulu.

7 Mu tangu mo yiina, mukaasu mumosi wa Samariya ayidi mu utehe mamba. Yisu ni uleele nde: «Va me mamba ma unywa.» 8 Bayihi ba nde aba baamiiyene hu musyenge mu uyasuumba byudya. 9 Mukaasu wa Samariya ni uleele nde: «Buni we wu li Muyudaayo, we uvondo mamba ma unywa huli me, me wu li musi Samariya?» Nde haleeli buuna, mu tooni ati Bayudaayo a bubaayuhasana na bisu Samariya ve. 10 Yisu ni ufutala nde: «Kini we ayaaba bungodu bwa Nzambi, na tso we kiyaaba na li mu uleele we: "Va me mamba ma unywa", kini we ni wu kiivondo mamba ma unywa, na nde kiiva we mamba ma moonyi.» 11 Mukaasu ni ukaala: «Pfumu, we ti a hali na itehili ve, titswene iyuna hyadongo. Hwavele itehili, we mamba mo ma moonyi ka buni kiibaha? 12 We akulala kaaha a bisu Yakobi, wu aviidi bisu iyuna mo hinihi? Ni iyuna hi Yakobi hanywidi mamba nde mwakulu na baana ba nde, na biboodi bya nde.» 13 Yisu afutili nde: «Pasi nde wuuna wu unywa mamba mo maniima, sa abwebaha peyu. 14 Ka muutu wu unywa mamba ma me upa nde, a hubwebaha peyu ve. Mamba ma me upa nde, sa makituha mutswe a nzali mu nde. Ni mutswe a nzali wu ukaapalisa mamba na mifudi, te mu moonyi wu bilima na bilima✝.» 15 Mukaasu ni uleele nde: «Pfumu, va me mamba mo maana, mana me pelembwembaha peyu a mamba, na me pelembwenzatehe mamba ŋa.»

16 Yisu ti: «Yene, yateele mulumi a we na we yaafutaha ŋa.» 17 Mukaasu ni ufutala nde: «Me a handi na mulumi ve.» Yisu ti: «Ni mbuli, bu we miileele ti me a handi na mulumi ve. 18 Mu tooni ati, we abahi balumi bataanu, na wu we li na nde loloyi, a hali mulumi a we ve. Hiina ni imbuli we miileele.» 19 Mukaasu mo afutili: «Pfumu, me ndi mu umono ti we mumbihuli a Nzambi we li. 20 Bakaaha ba bisu baakuundi ŋa yulu isyelo mo hinihi, ka benu Bayudaayo libaasitasa ti mbuha yi baafwana ukuunda, ni hu Yeruselemi✝.» 21 Yisu aleeli nde: «Maama, siila me imiinu, taangu sa yito, yi benu lukaakunda Taata Nzambi pasi mbuha, tso hu Yeruselemi, tso ŋa yulu isyelo mo hinihi. 22 Benu bisu Samariya, benu a liyaabi na benu lili mu ukuunda ve. Ka bisu Bayudaayo, bisu liyaabi na bisu lili mu ukuunda. Mu tooni ati, liyobolo ubaamata huli Bayudaayo✝. 23 Ka taangu sa yito, na yo yaamiito, yi bakuundi baa mbuli buukakuunda Taata mu mutima woosi na mu imbuli hyoosi. Mu tooni ati, ni bakuundi baa pila yiina Taata ali mu usaha. 24 Nzambi ni Livupu, hufwani ti boosi ba buukuunda nde, babaakuunda nde mu mutima na mu imbuli.»

25 Mukaasu ni uleele nde: «Me nzaabi ti Masiya wu bali mu uteele Kristo, mu uya ali. Ŋa nde huya, nde sa ayabisa bisu mambu moosi.» 26 Yisu aleeli nde: «Me ni nde wuuna, me wu ndi mu utoyo na we.»

27 Ŋa mbisa, bayihi ba nde baayafutaha. Bo baakimuhi bu nde hakatoyo na mukaasu mumosi. Ka tso mumosi mu bo a hafuuli nde ve ti: «We na nde hima?» Buuve: « Mu hima we li mu utoyo na nde?» 28 Na bu mukaasu hasiisi lisanga la nde, nde ayeni hu musyenge na ayayabisa huli baatu: 29 «Yamonwaani bahala li limiiyabisa me moosi ma me apaanga. Peleve nde ni Kristo hwande!» 30 Bo baapali hutso musyenge na baayabwana Yisu.

31 Mu taangu mo yiina, bayihi baakaleele nde: «Rabi, we afwana udya!» 32 Ka nde afutili bo: «Me na byudya bi benu laaveleyaaba.» 33 Bayihi baakalelesene: «Aa! Kaahu na muutu wu behili nde byudya?» 34 Yisu afutili bo: «Bya me byudya ni mu ukuhasa litondo la Taata wu atsindaha me, na umana isalu hi nde hava me.»

35 «Benu a lili mu uleele ve ti: "Batsungi bamiisaala bana, na sa bakukaha muhunu"? Ka me, me ndeele benu: syenolwaani miisu, na kengesaani matsyehe bubwe. Mbutu yimiyele na taangu yimiito yi ukoolo yo! 36 Wu li mu ukuukaha muhunu ubaabaha pfuta a nde, na nde ubaakoolo mbutu, ni baatu ba buubaha moonyi wu bilima na bilima. Buuna, wu li mu ukuna na wu li mu ukuukaha, bali mu kinya bo baboole. 37 Ni mu tooni mo yiina, mbuli kuma yili mu uleele: "Mumosi ubaakuna, na mukima ubaakukaha." 38 Me atsindaha benu mu uyakuukaha hutso a tsyehe yi benu laavelesala. Ni tsyehe yi bakima baasala, ka benu laabaha kaluha mu isalu hya bo.»

39 Bisu Samariya ba banzuhisini baa bula mo buuna, baasiidi imiinu mu Yisu mu tooni imbangi hi mukaasu hatiidi: «Nde miiyabisa me moosi ma me apaanga.» 40 Ni mu buuna, bisu Samariya baayidi huli nde, bo baayayiini nde mu utsahala na bo. Na nde atsahili huuna bilumbu byole. 41 Litangu la baatu ba baasiidi imiinu mu mikuma mi Yisu hakaleele, laafulili bunzuhisini. 42 Na bo baakaleele huli mukaasu: «A hisaali ndulu mu tooni imbangi hya we bisu limiisa imiinu ve. Ka bisu mwakulu limiiyuha nde, na bisu limiiyaaba ti mbuli, nde ni Muyobili a tsi.»

43 Humbisa bilumbu mo byole biina, Yisu apali mu bula mo buuna, mu uyene hu Ngalili. 44 Ni mbuli, nde aleeli mu nde mwakulu ti: «Mumbihuli a hubaayaka likiinzu mu tsi a nde mwakulu ve.» 45 Ka ŋa nde hatoodi hu Ngalili, bisu Ngalili baayaki nde bubwe, mu tooni ati bo kaka baayeni hu mukungi a Paake, hu Yeruselemi. Bo baamoni moosi ma nde havangi hu mukungi mo wuuna. 46 Nde afutihi hu musyenge a Kana hu itaanzi hya Ngalili, hu nde hakitusi mamba mu malamu.

Hwaba hu Kapernahumi, mukuutu masadaadu, wu akasala na pfumu, wu mwaana a nde haba na ubeele. 47 Mukuutu masadaadu ayuhi ti Yisu miimata hu itaanzi hya Yude, mu uyene hu Ngalili. Nde ayamono nde na ayayini, mu uyabeeloso mwaana a nde wu aba aka ŋa pedu lipfu, hu Kapernahumi. 48 Yisu aleeli nde: « Tangu yoosi, benu ubaasaha umamono biliimbu bya kimuhili na bipadi, mu usiila me imiinu.» 49 Mukuutu masadaadu aleeli nde: «Pfumu, yanga mawasa huli me, teehele mwaana a me akwa.» 50 Yisu afutili: «Yene, mwaana a we uba moonyi.» Na bahala mo laasiidi imiinu mu ma Yisu haleeli nde, na lo ayeni. 51 Bu nde haba mu ufutaha, basalili ba nde baayabwana nde mu nzila na baayabisi nde: «Mwana a we moonyi a li.» 52 Nde afuuli bo mu ki ngunga mwaana a nde amoni nyutu bubwe. Na bo baaleeli nde: «Matsiha, mu ngunga yatsomi ya humbisa a mwangulu, baahu laamata mu nde.» 53 Taata ayibwili ti, ni mu ngunga mo yiina Yisu haleeli nde: «Mwana a we uba moonyi.» Mu taangu mo yiina, nde asiidi imiinu mu Yisu, nde na nzo a nde yoosi. 54 Hiina aba ni iliimbu hya byole hi Yisu hasiidi hu Ngalili. Nde hasiidi hyo, ŋa nde hamati hu itaanzi hya Yude.