1 «Me miinzabisa benu mambu mo maana, mana benu livelebwisa imiinu hya benu. 2 Bo sa bapalisa benu mu manzo ma lisambulu li Bayudaayo. Na taangu yili mu uya, yi bo buutsima ti, tso bo badubi benu, yiina ni nzila huli bo yi ukuunda Nzambi. 3 Bo buusa buuna, mu tooni ati, bo a bayaba tso Taata, tso me ve. 4 Ka me miinzabisa benu mo, mana bu taangu yuuto, benu liyibwala moonyi ti me anzabisi benu mo.»

«Tso me a handeeli benu mo hu mbandu ve, mu tooni ati me ambeedi kini na benu. 5 Bunuubu, me ka mu unzyene huli wu atsindaha me. Ka a hu li na muutu tso mumosi mu benu wu ufuula me ve: "We huni li mu uyene?" 6 Ka mu tooni ati me miinzabisa benu mambu mo maana, lingebe limiiluula benu mu mitima. 7 Bunuubu, mu mbuli me ndi mu undeele benu, hwafwana huli benu, me mu uyene. Mu tooni ati, me upelenzyene, Mukaliini a huya huli benu ve. Ka tso me nzyeni, me tsa tsindaha benu nde. 8 Na bu nde huya, nde sa ayalusa mitima mya baatu ba tsi mo yiniiyi, ba baamiidunga mu dyaambu li masumu, li butsiitsa na la tsundusu a Nzambi. 9 Bo baamiidunga mu li litali masumu, mu tooni ati baatu a bali mu usiila me imiinu ve. 10 Bo baamiidunga mu li litali butsiitsa, mu tooni ati me ka mu unzyene huli Taata, na benu a lubwemono me ve. 11 Bo baamiidunga mu li litali tsundusu, mu tooni ati Nzambi amiitehele utsundasa pfumu a tsi mo yiniiyi.»

12 «Me kini na mambu ma malahi ma uyabisa benu, ka benu a lutwala ukuunda mo mu taangu mo yiniiyi ve. 13 Ka bu nde huya, nde, Livupu li libaayabisa imbuli, nde sa abita benu mu imbuli hyoosi. Nde a huyambila mu nde mwakulu ve. Ka nde sa aleele moosi ma nde huyuha na uyabisa benu mambu ma muuya hu busu. 14 Nde umweese muyusu a me, mu tooni ati nde uyaka mambu ma me, na uyabisa benu mo. 15 Byosi bi Taata a li na byo, bili bya me. Ni mu buuna me ndeeli ti, Livupu sa liyaka mambu ma me na uyabisa benu mo.

16 Mwana a taangu hoole yimiisaala, na benu a lubwemono me ve. Na titswene, mwaana a taangu hoole, benu sa libwemono me*.» 17 Ni mu buuna, bakima ŋa hati li bayihi baakalelesene: «Nde hima ali mu uleele bisu? Nde li mu uleele: "Mwana a taangu hoole yimiisaala, na benu a lubwemono me ve. Na titswene, mwaana taangu hoole, benu sa libwemono me." Na nde bubwese bunuubu: "Me huli Taata me ndi mu unzyene."» 18 Bo baakafulasana: «Nde ŋa hima atoondi uleele, "Mwana a taangu hoole"? Bisu a laatsikaha ma nde ali mu uleele ve.»

19 Bu Yisu hayaabi ti bo baaba na nzala uva nde hyuhu, nde aleeli: «Benu laaka mu ufulasana, mu uyaba mu ma me ndeeli hima matondi uleele: "Mwana a taangu hoole yimiisaala, na benu a lubwemono me ve. Titswene, mwaana a taangu hoole, benu sa libwemono me." 20 Mu mbuli, mu mbuli me ndi mu undeele benu, benu sa lilila na benu sa likoto mu minyongo, ka baatu ba tsi sa baba mu kinya. Benu sa likoto mu lingebe, ka lingebe la benu sa lisobohono mu kinya. 21 Bu mukaasu aka na misoongo, mutima a nde ubaaba mu lingebe. Mu tooni ati ya nde taangu yi mapasi yimiito. Ka bu nde amiimana ubuta mwaana, nde a hubaabweyibwala moonyi mu mapasi ve, mu tooni a kinya a mwaana wu nde amiibuta. 22 Bunuubu, benu kaka lili na lingebe. Ka me tsa mbwemono benu, na mutima a benu sa abweba mu kinya. A hu li na tso muutu wu utwala umaasa benu kinya mo yiina ve.»

23 «Mu ilumbu mo hiina, benu a luubweva me hyuhu mu pasi dyaambu ve. Mu mbuli, mu mbuli me ndi mu undeele benu, hi benu luvondo huli Taata, nde sa ava benu hyo mu nduhi a me. 24 Natee bunuunbu, benu a laavondo pasi isiha mu nduhi a me ve. Vondwaani na benu sa liyaka, mana kinya benu yiba yi yasupahana.»

25 «Me miinzabisa benu mambu mo maana mu makuma. Tangu sa yiya yi me umbwepeletoyo na benu mu makuma. Ka ni taangu yi me unzabisa benu paayalala, ma mali mu utala Taata. 26 Mu ilumbu mo hiina, benu sa livondo mu nduhi a me. Me a handi mu ndeele benu ve ti me tsa tsambila Taata mu tooni a benu, 27 mu tooni ati Taata nde mwakulu atondo benu. Nde hatondo benu bu benu laatondo me, na mu tooni ati benu laasa imiinu ti me huli Taata amata. 28 Me mu Taata apala, na me anza mu tsi. Bunuubu me ka mu umata ŋa tsi na me ka mu upfutaha huli Taata.» 29 Bayihi ba nde baaleeli nde: «We ka mu uyambila paayalala hwavele makuma. 30 Bunuubu bisu limiitsikaha ti we ayaaba mambu moosi, na we a hali na nzala ti muutu ava we hyuhu ve. Ni mu buuna, bisu limiisa imiinu ti we mu Nzambi apala.»

31 Yisu afutili bo: «Bunuubu benu limiisiila me imiinu? 32 Tangu yika mu uto, na yo yaamiito, yi benu lupambuha muutu muutu ya nde tsyelo, na yi benu lusiisa me siha vii. Ka me a handi siha ve, mu tooni ati Taata na me ali. 33 Me miinzabisa benu mambu mo maana, mana benu likangama mu me, benu libaha hyenze. Benu sa libwana mbingisili ŋa tsi. Ka baani na ibahala! Me amimbingala tsi!»