1 Bunuubu, litsikahaani ma mali mu utala banyama ba baayeholo huli bifwita. Bisu liyaabi ti bisu na nzaabili. Ni mbuli nzaabili mo yiina yibaava muutu nyeme, ka litondo libaakulasa libundu. 2 Tso muutu li mu utsima mu nde mwakulu ti nde na nzaabili, nde kini a habaha yo we bu hwafwana ve. 3 Ka tso muutu tondi Nzambi, Nzambi yaabi nde.

4 Ni mu buuna, mu li litali udya hu banyama ba baayeholo huli bifwita, bisu liyaabi ti bifwita bya mu tsi, a bili banzambi ba mbuli ve. Ka Nzambi ndulu mumosi li wa mbuli. 5 Tso bu baatu bakima bali mu utsima ti hu li na banzambi hu yulu na ŋa toto, hwande ni mbuli, bo mbiinga. Baatu mo baana bali mu uleele ti hu li na «banzambi» ba balahi na «bapfumu» ba balahi. 6 Ka huli bisu, Nzambi ndulu mumosi, ni Taata wu avanga bisiha byosi na wu bisu lili moonyi mu nde. Na hu li kaka na Pfumu ndulu mumosi, Yisu Kristo, mu nde Nzambi haavaanga bisiha byosi, na mu nde bisu lili moonyi.

7 Ka boosi a baabangula imbuli mo hiniihi ve, mu tooni ati bakima baaba baakangama mu ipfu hyubaakunda bifwita. Natee lolo yiniiyi, bakini mu ubaadya banyama ba baayeholo, na matsimi ti, baayehuli bo bungodu bwa tsuhili huli banzambi ba bo. Ni buuna, matsimi ma bo mali mu utsundana. Bo bali mu utsima ti, tso baadidi bo, bo baamiisumaha. 8 Ka a ni byudya, byususala bisu ŋa pedu a Nzambi ve. Bisu a luuvinda pasi isiha ve tso livelidya byo. Tso lidiidi byo, bisu a luubaha kaka kaluha tso mosi ŋa yulu ve.

9 Ka kebaani, mana bunyanga bu benu lili mu usalila, a bubwisa hutso lisumu, ba baavelebama mu imiinu. 10 Tso muutu mumosi, wu avelehwada mu imiinu, moni we nga nzaabili, atsahala mu udya mu nzo a nzambi bifwita, nde kaka sa ahwada mu matsimi ma nde mwakulu, mu udya nyama wu baayeholo huli bifwita. 11 Ni mu buuna, muutu mo wunuuwu, wu kini a hawadi mu imiinu ve, wu Kristo haakwidi mu tooni a nde, sa anyambana mu tooni a nzaabili a we. 12 Tso benu lili mu usumaha buuna ŋa busu bwa baana ba ngu, na ubaanemese matsimi ma bo ma makini a maahwada ve, benu lili mu usa lisumu ŋa busu Kristo nde mwakulu. 13 Ni mu buuna, tso bi me ndi mu undya bili mu ubwisa mwana a ngu a me mu masumu, me apfwana ubisa byo nzyeni, mu uveleba tooni a mbwili a nde.