1 Libwese uleele mwana a mambu mu tooni utsonzehe bungodu, bu utsindaha huli baatu bangidi ba bali hu Yeruselemi✝: tsonzehaani bungodu we bu me apa matumili huli mabundu ma Ngalatiya. 2 Pasi limiingu, muutu muutu mu benu afwana uvengolo mbongo mu nzo a nde, we bu nde huutwala ubaha, mana benu livelekeele nziili a me mu utsonzehe bungodu. 3 Ŋa me unzato, me tsatsindaha baatu ba benu luusoolo, mu ubita bungodu na mihanda mi matumili mi me upa bo, hu Yeruselemi. 4 Tso hufwani ti me kaka nzyene, bisu a bo sa lidyenge nzila mosi.

5 Me unza huli benu, humbisa utaangila itaanzi hya Masedonya, mu tooni ati, me apfwana upyohele huuna. 6 Me utsahala huuna mu mwa matsuhu na benu, peleve mangala moosi. Buuna, benu sa likumbasa me mu usupala mudyenge a me, pasi tsyelo yi me unzyene. 7 Mu tooni ati, me a hatondi umono benu ndulu mutele-mutele ve. Me na matsimi ma uvyoso mwa bilumbu na benu, tso Pfumu tondi. 8 Ka me tondi umatsahala hu musyenge a Efeso, natee ilumbu hya Pantekote. 9 Mu tooni ati, nzila yaamiidibuma me huuna yalala, mu usa isalu hya Nzambi, tso bu baboho bali ba balahi✝.

10 Tso Timoteho toodi huli benu, a likolese nde binama ve, mu tooni ati, nde li mu usa isalu hya Pfumu we me. 11 Nyaha muutu tso mumosi avelerokolo nde! Homo, kumbasaani nde mu usupala mudyenge a nde mu kinya, mana nde ayaafutahala. Me na baana ba ngu, lili mu ukeele nde. 12 Ka uto ti mwana a ngu a bisu Apoloosi, me umbaakwadisa nde tangu yoosi mu uya huli benu na baana ba ngu bakima. Ka nde a hamaatondo utswihasa mudyenge mo ve. Ka nde abaha tangu, nde sa aya.

13 Baani likanda, hwadaani mu imiinu, baani na ibahala, baani na mifudi. 14 Baasaani moosi na litondo.

15 Benu liyaabi Setefano na nzo a nde: Benu liyaabi ti hu itaanzi hya Akayi, bo ni batsomi mu ukiingula buyedi, na bo bali mu ukumbasa baatu ba ngidi. Ni mu buuna, me ndi mu upondo benu baana ba ngu: 16 nyahaani baatu ba pila yiina na bana boosi ba bali mu uhwada usala na bo, babaasuungaha benu.

17 Me ndi na kinya mu nziili a Setefano, Forfanatusi na Akayikusi. Benu alaabeedi ŋa busina ve, bo baakumbisi me ŋa mbuha a benu. 18 Na bo baahwadisi me we bu bo baasiidi mu benu mwakulu. Yaabaani ubaasilasa baatu ba pila yiina.

19 Mabundu ma itaanzi hya Asiya maviidi benu mabwehe. Akilasi na Pilisile, na libundu li libaakuukama hu nzo a bo, batsindihi benu mabwehe ma litondo mu nduhi a Pfumu. 20 Baana ba ngu boosi ba bali ŋaniiŋa, bamiiva benu mabwehe. Vanasanaani mabwehe ma ubumbasana hu litondo.

21 Ni mu hooho hwa me mwakulu me miitsonehe mikuma mo miniimi: mabwehe ma Pahuli.

22 Tso muutu a hatondo Pfumu ve, nyaha basinga nde! Maranata! Pfumu a bisu, yaanga!

23 Nyaha hyese hya Pfumu Yisu hiba na benu!

24 Me atondo benu boosi mu itwadi hya na Yisu Kristo.