1 Ni me Pahuli, wu li iluumbi hya Yisu Kristo wu Nzambi hasoolo, itwadi na mwana a ngu a bisu Timoteho, ndi mu utsonehe muhanda mo wunuuwu.

Huli libundu la Nzambi li lili hu musyenge a Koliito, na huli bangidi ba Nzambi boosi ba bali hu itaanzi hya Akayi* yi tiindala: 2 Nyaha Nzambi Taata a bisu na Pfumu Yisu Kristo, bava benu hyese na hyenze.

3 Liyuusaani Nzambi, Taata a Pfumu a bisu Yisu Kristo, Taata nga a kwili lingebe, Nzambi wu ubaahwadisa baatu mu mataangu moosi*! 4 Nde ubaahwadisa bisu mu mapasi ma bisu moosi. Ni mu buuna, bisu kaka luutwala uhwadisa ba bali mu umono mapasi ma pila mu pila, mu ubehele bo kwadisili yi bisu mwakulu laayaki huli Nzambi. 5 Mu mbuli, we bu mapasi ma Kristo maalutahala mu bisu, ni bumosi kaka kwadisili a bisu yaalutahala bunene mu Kristo. 6 Tso bisu laamiikeehele, ni mu tooni a kwadisili a benu na liyobolo la benu. Tso baahwadisi bisu, ni mu tooni a kwadisili a benu, mana benu liba na mifudi mi ukuunda na mukonono mapasi ni mamosi ma bisu lili mu ukuunda. 7 Ni mu buuna, hiitu hya bisu mu benu hili hi hyaavangama, mu tooni ati, bisu liyaabi: we bu benu libaakaba mapasi na bisu, benu libaakaba kaka kwadisili na bisu.

8 Mu mbuli, baana ba ngu, bisu litondi ti benu liyaaba ti mapasi ma bisu laamoni hu itaanzi hya Asiya*, aba maafulala mifudi myuveletwala ukuunda. Naapa hiitu hi uba moonyi, aba hyamiifwa. 9 Ka bisu laakamono ti baaviidi bisu kesili yi lipfu. Ka bwavangimi buuna, mana bisu libaavelesa hiitu mu bisu mwakulu, ka ndulu mu Nzambi wu ubaafutala babaakwa hu moonyi. 10 Nde ni wu afuuhasa bisu mu lipfu la pila yiina, na ni nde ubwefuuhasa bisu mu lo. Eeye, bisu lili na hiitu mu nde ti, nde ubwefuuhasa bisu, 11 na benu mwakulu luukaasala itwadi na bisu, mu ubaasambila mu bisu. Buuna, Nzambi uyuhala masambulu ma baatu ba balahi buukaasa mu bisu. Nde uva bisu hyese mo hiina, na baatu ba balahi buufutala matondo huli Nzambi mu tooni a bisu.

12 Mono mu ki dyambu bisu luutwala uba na nyeme: we bu matsimi ma bisu mali mu uta imbangi, mbiili a bisu ŋa busu bwa baatu ba tsi, homo ŋa busu bwa benu, aba yi bulembo, na yi imbuli bi bibaamata huli Nzambi. Ni hyese hya Nzambi hyaakasuungaha bisu, ka a tsiki a imuutu ve. 13 Eeye, mu mihanda mya bisu, bisu lili mu usonehele benu ndulu mambu ma benu lili mu utaanga muuna na utsikaha. Me na hiitu ti, mu mataangu ma muuya, benu luutsikaha mo bu hwafwana. 14 Ka natee bunuubu, benu laamiitsikaha ndulu hoole. Mu ilumbu hya nziili a Yisu, Pfumu a bisu, benu luusinzatsikaha na luuba na nyeme mu bisu, we bu bisu luuba na nyeme mu benu.

15 Me ambeedi na hiitu mu mambu mo maana. Ni mu buuna, me akiimaapyohele huli benu, mu uva benu lisyeme la moole. 16 Mu mbuli, me akatsima uvyohele huli benu, titswene uyene hu Masedonya, na ubwemono benu ŋa me unzaapfutaha. Mu tooni ati, hwakiifwana ti benu likumbasa me mu usupala mudyenge a me hu tsyelo a Yude. 17 Ŋa me akuti kani mo yiina, kaahu me amonihili muutu wu aleenge? Be makesili ma me umbaapolo, kaahu ma baatu banga mapfuta, ba bubaaleele «eeye» na «naana» nzila mosi? 18 Nzambi li mbangi a me, na maambu ma bisu laaleeli benu, a mali «eeye» na «naana» nzila mosi ve. 19 Yisu Kristo, Mwana a Nzambi wu Silaasi, na Timoteho na me mwakulu✝ laayabisi benu, a haayidi mu uleele «eeye» na «naana» nzila mosi ve. Mu tooni ati mu nde, hu li ndulu «eeye». 20 Mu mbuli, nde ni «eeye» yi yili mu usilasa malahi ma Nzambi moosi. Buuna, ni mu Yisu Kristo, bisu libaaleele «amen*», ni «eeye» a bisu, mu uva muyusu huli Nzambi. 21 Na ni Nzambi nde mwakulu ubaahwadisa bisu a benu, mu idiingu hya na Kristo. Nde mwakulu ni wu asoolo bisu, 22 nde akumi bisu iliimbu hya nduhi a nde, na nde ayitili Livupu la Ngidi mu mitima mya bisu, we tsuha yi nde haamiisa bisu lahi.

23 Nzambi li mbangi a me. Tso a buuna ve, nde amaasa muvumu a me, tso me ndi mu upfuta. Me a hambwenzafutahala hu musyenge a Koliito ve, mana benu livelemono pasi. 24 Bisu a lili mu ukwamisa benu mu usiinga mbiili a bisu yoosi na matsimi ma bisu mu dyambu li usa imiinu mu Yisu ve. Mu tooni ati, benu laahwada mu imiinu. Tso bisu a benu lisali itwadi, ni mu libwe la benu bisu boosi libaasala.