1 Mu mbuli, bisu liyaabi ti, tso nyutu a bisu yili we nzo, yi bisu lili mu utsahala mu yo, ni nzo a bisu ya toto. Tso yo yitsaamuhi, yaabaani ti, Nzambi amiituungala bisu nzo hu mayulu, yi baaveletuunga mu myoho mya baatu, nzo yi yiukwilala mu bilima na bilima. 2 Na bunuubu, bisu lili mu ubima mutso a nzo mo yiina, mu tooni ati, lehemene la bisu lili li linene, mu ukoto mu nzo a bisu ya hu mayulu. 3 Mu mbuli, tso bisu likoti mu nzo mo yiina, bisu luuba ba baafuha. 4 Eeye, bu bisu likini mu utsahala mu nzo ya toto yi yiuvelediinga yiniiyi, bisu lili mu ubima we baatu ba bali mu ubita mupfuna. A hu li mu uleele ve ti, bisu litondi umaasa nyutu a bisu ya toto, ka bisu litondi uyaka nyutu ya hu mayulu, mana idiingu ikitula bi byukwa. 5 Ni Nzambi nde mwakulu avangimisi bisu mu maana, na nde amiiva bisu Livupu la nde we tsuha yi nde haamiisa bisu lahi.

6 Buuna, taangu yoosi bisu laaluula mu ibahala! Bisu liyaabi ti, bu likini mu nyutu mo yiniiyi, bisu lili mu ukwilala lala na Pfumu. 7 Mu mbuli, bisu lili mu udyata mu imiinu, ka a mu umono hwa miisu ve. 8 Bisu laaluula mu ibahala, na bisu laamiivangama mu utiimba nyutu mo yiniiyi, mu uyakwilala huli Pfumu. 9 Ka bisu lili mu utsima umaamweese nde kinya, tso bisu likwilili mu nyutu mo yiniiyi, buuve tso litiimbi yo. 10 Mu tooni ati, bisu boosi laafwana uteleme ŋa busu bwa Kristo mu uyaka tsundusu a nde. Ni huuna, muutu muutu sa ayaka wa nde musyendo mu mamabwe buuve mamabi ma nde haavaangi ŋa toto.

11 Bisu liyaabi bubwe-bubwe buni luutwala ukiinza Pfumu. Buuna, bisu lili mu usaha ubita baatu mu usobo matsimi ma bo. Nzambi ayaaba bisu bubwe-bubwe na me tsimi ti, hutso mitima mya benu, benu liyaabi bisu kaka. 12 Bisu a litondi ubula tulu bisu mwakulu ŋa busu bwa benu ve. Ka bisu na nzala ti benu linyemele bisu. Buuna, benu luubaha ma benu luukaala huli baatu ba bubaanyemele bi bibaamonehele mu miisu, ka a mu bya hutso mutima ve. 13 Tso mu mbuli bisu lili biyahudi, ni mu tooni a Nzambi bisu lili biyahudi. Ka tso bisu lili batsiitsa, ni mu tooni a benu bisu lili batsiitsa. 14 Mu mbuli, litondo la Kristo lili mu ubamiha bisu mu utsikaha ti: muutu ndulu mumosi amiikwa mu tooni a baatu boosi, na ni buuna, baatu boosi baamiikwa. 15 Nde akwiidi mu libwe la boosi, mana ba bali moonyi baveledyata mu bo mwakulu, ka bo baba moonyi mu muutu wu akwiidi, na wu asuuhi mu babaakwa mu libwe la bo.

16 Ni mu buuna, bisu a lili mu ubweyaaba muutu mu nzaabili yi bumuutu ve. Tso hu tsikulu, bisu laakayaaba Kristo mu nzaabili yi bumuutu, ka mu taangu mo yiniiyi, bisu a lili mu ubweyaaba nde buuna ve. 17 Tso muutu li itwadi mu Kristo, nde li ivaangu hi inyatihi. Mbiili yikulu yimiidimbala, bunuubu, mbiili a nde ka yinyatihi✝. 18 Mambu mo maana moosi maamati huli Nzambi, wu anongisi bisu na nde mu nzila a Kristo, na wu aviidi bisu isalu hi unongese baatu bakima na nde. 19 Eeye, ni mu Kristo, Nzambi haakasala mu unongese baatu ba tsi na nde, hwavele utaanga mamabi ma bo. Na nde atumi bisu, mu uyayabisa musamu wu inoongi.

20 Buuna, bisu lili banzonzi ba Kristo haatsindaha, ni we bu Nzambi nde mwakulu ali mu uvyohele mu bisu, mu usa teelili a nde. Bisu lili mu uyayaana benu, mu nduhi a Kristo, noongwaani na Nzambi. 21 Kristo a haasiidi lisumu tso limosi ve. Ka Nzambi akwiihi nde masumu ma bisu, mana bu luuba itwadi na nde, bisu liba batsiitsa ŋa busu bwa Nzambi.