1 Mu tooni a kwili a nde lingebe, Nzambi amiiva bisu isalu mo hiniihi, ni mu buuna, bisu a lili mu ukolo binama ve. 2 Bisu laamiibisa tsalili yoosi ya swehe-swehe na ya tsonyi. Bisu a libaadyata mu soho ve na bisu a libaasobo maambu ma Nzambi ve. Homo ati, bisu lili mu umweese imbuli we bu hwaafwana. Na bisu lili mu usa ti, pasi muutu atsikaha tso mbuli ni mu nduhi a Nzambi bisu libaasala, buuve naana. 3 Ka, tso Musamu wu Mubwe wu bisu lili mu uyaabisa kini wu baafuha, nde li wu baaswehe huli ba bali mu ukwa. 4 Bo a bali mu usa imiinu ve. Mu tooni ati, Saatana, wu li nzambi a taangu mo yiniiyi, amiifuha matsimi ma banga a paha. Nde haasa buuna, mana bo bavelemono liyalala li Musamu wu Mubwe wu muyusu a Kristo, nde wu li ifwaani hya Nzambi. 5 Mu mbuli, mu ndongisili a bisu, a mu bisu mwakulu bisu libaalongese ve, ka bisu Yisu Kristo wu li Pfumu libaalongese. Ka uto ti bisu, bisu lili basalili ba Yisu. 6 Nzambi aleele hu tsikulu bunuubu: «Nyaha liyalala limwedeme hutso a piipidi ya dunga-dunga✝!» Eeye, ni nde kaka li mu umwedemese liyalala la nde hutso mitima mya bisu, mu uva bisu nzaabili yi yaayaluha yi muyusu a nde, wu li mu umonehele mu hiinzi hya Kristo.

7 Ka bisu libaakeelese busina mo bunuubu, we mutso bitehili bya mu diiha, mana libaamweese ti matwala mo ma manene maana, mali mu umata huli Nzambi, ka a huli bisu ve. 8 Mapasi ma pila mu pila mali mu ukwamisa bisu mu pasi tsyelo, ka a maabiingala bisu ve. Bisu liba hutso a paha, hiitu hili. 9 Bali mu utsuta bisu, ka Nzambi a haasiisa bisu siha ve. Bali mu ubwiisa bisu ŋa toto, ka bisu a laahesoho ve. 10 Tangu yoosi, bisu lili mu ukeelese lipfu la Yisu mu nyutu a bisu, mana moonyi a nde amonehele kaka mu nyutu a bisu. 11 Tso bisu lili moonyi, bisu lili tangu yoosi laayandama na lipfu mu tooni a Yisu, mana moonyi a nde amonehele kaka mu nyutu a bisu yi yiukwa. 12 Buuna, lipfu lili mu usala mu bisu, mana moonyi asala mu benu.

13 Mabasonehe ma Ngidi mali mu uleele: «Me atsa imiinu, ni mu buuna me atoyo✝.» Bisu kaka, mu matsimi mamosi ma imiinu, lili mu usa imiinu, ni mu buuna bisu lili mu utoyo. 14 Mu mbuli, bisu liyaabi ti, Nzambi wu asuuli Pfumu Yisu mu babaakwa, usuula kaka bisu mu ba baakwa itwadi na Yisu, na utelemese bisu na benu ŋa busu bwa nde. 15 Moosi ma bisu lili mu ukuunda, ni mu libwe la benu, mana hyese hya Nzambi hifulala uto mu baatu ba balahi, na hisinzapfunasa masambulu ma pfutili matondo mu muyusu a Nzambi.

16 Ni mu buuna, bisu laavelebila ukolo binama. Tso bu linyutu la bisu lili mu usyeheme hoole-hoole, Nzambi li mu uhwadisa mitima mya bisu mu pasi ilumbu. 17 Mapasi ma bisu lili mu umono mu mwana a taangu hoole, maaleenge. Utwala ufwanisa mo na bunene bu muyusu wu bilima na bilima ve, wu afulala tsoongo, wu nde ali mu uswehele bisu. 18 Bisu a lili mu usuusa matsimi ma bisu mu bisiha bi bisu lili mu umono ve, ka ni mu bisiha bi bisu laavelemono. Mu tooni ati, bisiha bi bisu lili mu umono, a byudiinga tso hoole ve, ka bisiha bi bisu laavelemono, byudiinga mu bilima na bilima.