1 Liniili ka ni ya li matatu me ndi mu unza huli benu. We bu baasonehe: «Kesili a pasi dyambu ubaavolo, hu mbisa imbangi hya baatu boole buuve batatu✝.» 2 Me na kebisili yi uva huli ba baasumihi hutsomi na huli bakima boosi. Me amiikwakebese bo mu mudyenge a me wa myole huli benu. Na lolo mo yiniiyi, me tondi ubwefutahala yo bu me apele ŋa hati la benu. Ŋa me umbwenzaapfutaha mu umono benu, me a upeengolo muutu tso mumosi ve. 3 Mu mbuli, benu lili mu usaha iliimbu hi Kristo ali mu utoyo mu me. Nde wu avelekolo ŋa hati la benu, ka nde li mu umweese matwala ma nde ŋa hati la benu. 4 Mu mbuli, ŋa baakomini Kristo ŋa kuruwa, nde aba wu akolo, ka lolo yiniiyi, mu matwala ma Nzambi, nde li moonyi. Ni bumosi kaka, mu itwadi hya bisu na nde, bisu lili ba laakolo. Ka mu matwala ma Nzambi, bisu luuba moonyi mu nde, mu libwe la benu.

5 Yebaani mitima mya benu, na kengesaani matsimi ma benu, mu umono tso benu lili mu udyaata mu imiinu. Benu a laayaaba ve ti Yisu Kristo li ŋa hati la benu? Umono ti a buuna ve, kengisili a matsimi huli benu, yaabiika. 6 Ka me tsimi ti, benu luuyaaba ti bisu laabiinga mu isalu huli benu. 7 Bisu lili mu usambila Nzambi, mana benu livelevaanga lilibi tso limosi. Bisu a litondi umweese ve ti bisu laamiibiinga, ka bisu litondi ti benu libaavaanga ma mabwe, tso bu bo bali mu urokolo bisu. 8 Mu tooni ati, bisu utwala usa pasi isiha, hi hyutelemene imbuli hya Nzambi ve. Bisu utwala usala ndulu mu imbuli. 9 Bisu ubaamono kinya, ŋa bisu lili ba laakolo, tso ni mbuli benu lili na mifudi. Maana ni ma bisu libaavondo mu masambulu: ti benu likituha baatu ba baasupaha mu imiinu. 10 Ni mu buuna, me ndi mu utsonehele benu maniima moosi, tso bu me kini lala na benu, mana, mu taangu yi me umba itwadi na benu, me peletsyembe benu na bunono mu lituma li Pfumu haava me. Lituma li luuveletsala libundu la benu, ka li luukulasa lo.

11 Na bunuubu, baana ba ngu, baani mu kinya. Sahaani uba baatu ba baasupaha mu imiinu, hwadasanaani, baani matsimi mamosi, baani mu hyenze. Buuna Nzambi yi litondo na ya hyenze uba na benu!

12 Vanasanaani mabwehe mu ubumbasana hwa baana ba ngu ba litondo.

Bangidi mu Kristo bamiitsindaha benu mabwehe.

13 Nyaha lisyeme la Pfumu a bisu Yisu Kristo, litondo la Nzambi, na itwadi hi Livupu la Ngidi, biba na benu boosi!