1 Buuna me apfwana ubwesa nyeme! Tso bu yo yaavele na tsoongo. Bunuubu me utoyo mu bimono-miisu na manzabisili ma Pfumu haava me. 2 Me nzaabi wa mukristo mumosi, humiivyoho bilima kuumi na bina, wu Nzambi haasyenuli natee hu mayulu ma matatu* — me a hanzaabi ve tso mbuli mu nyutu Nzambi asyenuli nde, buuve ti nde ayaki imono-miisu, wu yaabi ndulu Nzambi — 3 eeye, me nzaabi ti muutu mo wuuna, Nzambi asyenuli nde natee hu paradiso✝. Me mbwepfutahala lo, me a hanzaabi ve tso mbuli mu nyutu Nzambi asyenuli nde, buuve ti nde ayaki imono-miisu, wu yaabi ndulu Nzambi. 4 Nzambi asyenuli muutu mo wuuna natee hu paradiso. Na nde ayuhi mambu ma buuveletwala uyaabisa mu munywa a muutu, ma baaveleva muswa huli muutu mu ubweleele. 5 Tso me tsiidi nyeme mu muutu mo wuuna, a mu tooni a bu me ndi na nyeme mu me mwakulu ve. A buuna ve: me bikolili bya me ndi mu nyemele. 6 Me kini akatondo usa nyeme, me a haakiimba na mbele ve, mu tooni ati me imbuli me ndi mu undeele. Ka me ndi mu umbisa ubwesa nyeme, mu boomo bwa ti, biyuusili bi baatu bali mu uyuusa me, a biba bi byatengeme na bi mapfuta. Ka byo byafwana ukwelene na bi bo bali mu umono me mu usa na uleele.

7 Buuna, me mu uveleluula mu nyeme, mu manzabisili ma kimuhili ma me anzaki, baatsoki me isyesyele mu linyutu. Ni iluumbi hya Saatana hi baatsindihi mu utete me mu ukondosono me uluula mu nyeme. 8 Me atsambili huli Pfumu tsambila tatu, mu ufuuhasa me mu pasi mo yiina. 9 Nde afutili me: «Hyese hya me hyaakuha mu we! Matwala ma me ubaamonehele mutso ikolili.» Ni mu buuna, me tondi usa nyeme mu bikolili bya me, mana matwala ma Kristo makwilala mu me. 10 Ni mu buuna, me ndi na kinya mu bikolili, mu bituhi, mu mapasi, mu kwamisa, mu mbingisili na mu minyoongo bi me ndi mu ukuunda mu tooni a Kristo. Mu tooni ati, mu tangu yi me ndi wu akolo, ni mu tangu mo yiina me ndi na mifudi.

11 Me ndi mu utoyo we nga a ladi, ka ni benu lili mu utsukamasa me mu lo. Benu ti ni ba likiibaasilasa me. Mu tooni ati, tso me peli muutu wa tsoongo, biluumbi bya benu yuha «bya manayee», a byafulala me ve. 12 Mavaanga ma mali mu umwese ti me iluumbi, maamonihili ŋa hati la benu mu mukonono wu asupaha: me atsiidi biliimbu bya kimuhili, bipadi na bimangu bi matwala. 13 Ki dyambu me apaangi mu mabundu makima, li me apelipaanga huli benu? Bu me apelindya mbongo a benu? Ubaamono ti me atsiidi bubi mu dyambu mo liina, saani me kolo-kolo.

14 Me amiipangama mu uya huli benu mu ya la tatu, na me a umba mupfuna huli benu ve. Me benu ndi mu utsaha, a mbongo a benu ve. Mu mbuli, a ni baana bubaakumbasa babuti ba bo mu mbongo ve, ka ni babuti baafwana ubaakumbasa baana ba bo mu mbongo. 15 Ka uto ti mu me, me ndi na kinya yi yaafulala mu uva byosi bi me ndi na byo huli benu, na uvaanga moosi ma me tondi mu libwe li mivumu mya benu. Tso me pfulitondo benu, buni benu luutondo me ndulu hoole?

16 Benu lafwana usilasa ti me a haambeedi mupfuna mu benu ve. Ka baatu buuleele ti me mupfuti, wu li mu usoho benu. 17 Me anzuya benu mu muutu mumosi mu ba me atsindaha huli benu? 18 Me apondo huli Tiite mu uyene huli benu, na me atsindaha benu mwana a ngu wu benu liyaabi, nzila mosi na Tiite. Tiite benu haayuya? Bisu a nde baboole a laakasala mu matsimi mamosi, na a laakaduukala nzila mosi ve?

19 Umata mwana a taangu, peleve benu lili mu utsima ti, bisu linyutu lili mu ukala ŋa busu bwa benu. Naana! Bisu lili mu utoyo itwadi na Kristo ŋa busu bwa Nzambi. Na bisu lili mu uleele benu mambu mo maana moosi, bambaahi ba litondo, mu ukulasa benu mu imiinu. 20 Me ndi na boomo ti taangu yi me unza huli benu, me pelenzaambiisa benu we bu me katondo, na me mba we bu benu likatondo. Me ndi kaka na boomo bu uyabiisa mitsotso na likwabi, kesi na nyengi, uyambila bubi mu bana na makusa, nyeme na hyayuhu. 21 Me ndi na boomo ti, ŋa me umbwenzaamono benu, Nzambi a me a hamweese me tsonyi mu tooni a benu. Me ndi na boomo kaka ti, me ndila mu tooni a baatu ba balahi ba bali mu uhwada mu usa masumu we hutsomi. Peleve bo a baasobo mbiili a bo ya mbiindu ve, yi bumbembo na mavaanga ma tsonyi ma bo baakasalila.