1 Baana ba ngu, bisu na nzala ati benu liyaaba buni hyese hya Nzambi hyaamonihili mu mabundu ma hu Masedonya. 2 Baatu ba mabundu mo maana, a baabeedi na busina bu bulahi ve. Na bo baaba hutso minyongi mi minono. Ka kinya a bo aba yaafulala bunene, na bo baakamweese buni bo baayaaba ukabila bana, tso bu baaba hutso buyaha bu bwafulala. 3 Me ndi mbangi, bo baakava mbongo we bu hwaba mifudi mya mbahili a bo, natee uvyoselele iteesi, bo baakasa maana mu mutima mumosi. 4 Bo baakavondo muswa taangu yoosi, mu ubaha hyese hi utsindaha likumbasa li itwadi, huli bangidi ba hu Yeruselemi✝. 5 Baatu ba mabundu mo maana, baviidi uvyohelele iteesi hi bisu laakakeele. Bo baamateehele umweese lehemene la bo mu uva huli Pfumu, na titswene huli bisu, we bu hu li litondo la Nzambi. 6 Ni mu buuna, bisu laavondo huli Tiite, mu usala isalu hi litondo hiniihi huli benu natee tsukusu, we bu nde haabaandihi hyo. 7 Benu lili na byosi mu iteesi hi hyalutahala: imiinu, bungodu bu bitoyili, nzaabili, lehemene li laavele na ndilu na litondo li bisu laatelimisi mu benu. Mu bungodu mo buuna bwosi, mwesaani ti benu laafulala na litondo.

8 A tumili me ndi mu upa benu ve. Ka me ndeeli buuna, mu li litali lehemene la bana, mu uva benu nzila yi umweese biliimbu bi imbuli hi litondo la benu. 9 Mu tooni ati, benu liyaabi buni hu li hyese hya Pfumu a bisu, Yisu Kristo. Nde wu aba isina, nde asiingi uba iyaha mu libwe la benu, mana nde akitusa benu bisina mu buyaha bwa nde.

10 Ndoongi yi me ndi mu upa benu mu dyambu li ukabila bungodu, ni yiniiyi: hu li bubwe huli benu mu usa mukonono. Benu laabeedi batsomi mu ilima hi hyaavyohi, ndulu a mu ukuukaha bungodu mo buuna ve, ka naapa mu uvolo kesili yi ukuukaha bwo. 11 Ka bunuubu, hwadaani mu umanisala isalu mo hiina! Mwesaani lehemene mu umanisala hyo, we lehemene li benu laaba na lo ŋa mbandihili, we bu hu li mbahili a benu. 12 Tso limweesi litondo lilibwe mu ukabila bungodu mo buuna, Nzambi uyaka bwo. Nde uyaka bungodu bwa pila mu pila, bu nde ubaamono bi lili na byo, ka a bi laavele na byo ve.

13 A hutondi uleele ve ti, mu ukumbasa bakima benu likituha bapuumbu, ka mana baatu boosi baba tsiitsa. 14 Mu taangu mo yiniiyi, benu lili na byosi mu iteesi hi hyalutahala, ni liina luusa ti benu likumbasa ba baakeehele. Ni bumosi kaka hu busu, tso benu likeehili na bo ba bali na busina, bo utwala ukumbasa benu. Buuna, benu boosi luuba tsiitsa. 15 We bu Mabasonehe ma Ngidi mali mu uleele:

«Woosi wu akuukihi byo bi bilahi, a haaba na byo bi byalutahala ve,

na woosi wu akuukihi byo hoole, a haakavele na byo ve✝.»

16 Me ndi mu upfutala matondo huli Nzambi, wu asuusi lehemene li lilahi mu mutima a Tiite, we li bisu lili na lo mu isalu hya benu. 17 Tiite asiingi pondili a bisu, homo ati, bu nde haaba wu asinzaluula mu lehemene. Ni mu buuna, nde avoli kesili masulubete, mu uyene huli benu. 18 Itwadi na Tiite, bisu lili mu utsindaha benu mwana a ngu mumosi, wu mabundu moosi mali mu ubulala mabyoho. Mu tooni a bu nde haateleme mu isalu hi Musamu wu Mubwe. 19 Homo ati, mabundu maasooli nde mu uba mbaahi a bisu wu midyenge, mu ubehele bo bungodu bwa bisu boosi, mu muyusu a Pfumu nde mwakulu, na umweese litondo la bisu lilibwe.

20 Bisu a litondi ve ti basyembe tsalili a bisu mu musiiku a mbongo mo yiniiyi. 21 Bisu lili mu usaha uvaanga mamabwe, ndulu a ŋa busu bwa Pfumu ve, ka naapa ŋa busu bwa baatu boosi✝.

22 Bisu lili mu utsindaha mwana a ngu a bisu mumosi na bo. Bisu laabahi mataangu ma malahi ma uyebe nde, ka nde akamonehele nga a lehemene taangu yoosi. Ka bunuubu, nde li mu ubwemonehele nga a lehemene li laafulala, mu tooni a hiitu hiinene hi nde ali na hyo mu benu. 23 Mu li litali Tiite, nde li mbaahi a me mu imiinu, na mbaahi a me mu isalu hya Kristo huli benu. Ka mu li litali baana ba ngu ba bisu bakima ba bali mu udyenge na nde, bo bali biluumbi bi mabundu. Bo bali mu usala mu muyusu a Kristo. 24 Mwesaani ti benu laatondo bo mu mbuli, mana mabundu maba na hiitu mu litondo mo liina na mayaaba ti bisu na mbiinga mu unyemele benu!