1 Me Pahuli, me mwakulu ndi mu upondo benu, mu bulembo, na bubwe bwa Kristo. Baatu bali mu uleele ti: me ndi «nga kulimini» mu taangu yi me ndi na benu, ka «nga ibahala», mu taangu yi me ndi lala na benu. 2 Me ndi mu undembesene benu: a likwamisa me mu utoyo mu mifudi mu taangu yi me umba itwadi na benu ve. Ka me tsatoyo mu mifudi, ŋa busu bwa ba bali mu utsima ti, bisu lili mu usalila imuutu. 3 Ni mbuli, bisu libaadyata mu musunya, ka bisu a lili mu ulwana mu musunya ve! 4 Mu mudiingu a bisu, bilwanili bi lili mu usalila, a bili bi musunya ve. Ka byo bili na matwala ma Nzambi, mu utsala bibaha bi byaavangama: ni matsimi ma mapfuta. 5 Na bisu lili mu utsala bisiha byosi bi mapfuta bi bibaatelemene nzaabili a Nzambi. Bisu lili mu ukotese matsimi ma mabi moosi ikondaayi, mana hu mbisa isalu hya bisu, baatu mo baana basiingala Kristo. 6 Na bisu lili ba laavangama mu usyembe kene yoosi, natee bu benu luumweese lisiingala li laasupaha mu Kristo.

7 Monwaani buni mambu ma bumuutu mali! Eeye, tso muutu nde mwakulu na hiitu ti nde li wa Kristo, nyaha nde abwetsikaha liniili ti: bisu kaka lili ba Kristo we nde! 8 Bamosi bali mu utsima peleve ti, me amiipfulala unyemele lituma li Pfumu haava bisu. Ka lituma mo liina ni li utuunga libundu la benu, a li utsala lo ve✝. Me a handi na tsonyi mu lo ve. 9 Me a hatondi umonehele we muutu wu uva benu boomo mu mihanda mya me ve. 10 Mu mbuli, monwaani ma bo bali mu uleele mu tooni a me: «Mihanda mya Pahuli mili mi minono na mi bukanyi. Ka ŋa nde ali ŋa hati la bisu mu musunya, nde li wu akolo, na biyambili bya nde a bili na lisuunga ve.» 11 Nyaha wu li mu uleele buuna ayaaba lo bubwe ti: mbiili a bisu ŋa lili mu usonehe mihanda mya bisu hu lala, ni yo moosi yuuba ŋa bisu luuba mbuha mosi.

12 Mu mbuli, bisu a luubila uyelemene tsiitsa na baatu bakima ba bubaasilasa bo mwakulu ve, buuve ufwanina na bo mwakulu. Bo bitsuudu bali: bo bali mu uyelemese byetso mu bo mwakulu mu umweese buni bo bali. 13 Ka uto ti bisu, bisu a luusa nyeme yi yaafulala iteesi ve. Bisu luusa nyeme mu hyetso hi mandilu ma isalu hi Nzambi haava bisu, mu utoose bisu natee huli benu. 14 Bisu a luuvyoho mandilu ma bisu ve, we tso bisu ba likiiveleto huli benu. Mu tooni ati, bisu ni batsomi mu uto huli benu, mu ubehele benu Musamu wu Mubwe wa Kristo. 15 Buuna, bisu a luusa nyeme mu iteesi hi hyaafulala ve, mu isalu hi bakima baasa. Ka bisu lili na hiitu ti, imiinu hya benu hyuukula, na ti bisu luukuhasa isalu hi hyaafulala bunene ŋa hati la benu. Ka bisu luukuhasa hyo, mu mandilu ma baava bisu. 16 Titswene, bisu luubita Musamu wu Mubwe mu bitaanzi bi bili lala na benu, hwavele usa nyeme mu kaluha yi isalu hi baatu bakima baasa mu ngundu a bo. 17 Ka baasonehe bunuubu: «Tso muutu tondi usa nyeme, nyaha nde asa nyeme mu Pfumu haavaanga✝.» 18 Mu mbuli, muutu wu bubaasilasa, a ni wu ubaasilasa nde mwakulu ve, ka ni nde wuuna wu Pfumu ubaabula mabyoho.