1 Bisu a lili mu usaha nzila yi benu luusilasa bisu ve. Bisu a lili na nzala we bakima, mu usonehele benu mihanda mi uva benu muswa wu usilasa bisu, buuve mu uvondo benu myo ve. 2 Benu mwakulu ni ba lili muhanda a bisu, wu baasonehe hutso mitima mya bisu. Muhanda wu baatu boosi buutwala utaanga na utsikaha. 3 Eeye, hu li mu umonehele ti benu lili muhanda wu Kristo haasonehe, na wu bisu lili mu utoosele. A mu mwiindu baasonehe nde ve, ka mu Livupu la Nzambi a moonyi. A baahiratana nde ŋa yulu bibadi bi mamanya✝ ve, ka ŋa yulu bibadi bi misunya, ŋa yulu mitima mya baatu.

4 Bisu lili mu utoyo buuna, mu tooni a hiitu hi bisu lili na hyo mu Nzambi mu likumbasa la Kristo. 5 Mu mbuli, bisu utwala usa isalu hya pila mo yiina mu matwala ma bisu mwakulu ve. Ka ni Nzambi ubaava bisu matwala ma ukuhasa ma bisu libaavaanga. 6 Ni nde ubaava bisu matwala ma usa isalu hya nde mu Nzuhisini yi Nyatihi. Nzuhisini mo yiina, a yaakangama hu tsina a Mabasonehe ve, ka yo yaakangama mu Livupu la Ngidi. Mabaasonehe mubaabita hu lipfu, ka Livupu la Ngidi libaabita hu moonyi✝.

7 Eeye, ni mbuli, Mikele mya Moose, mi baaba baahiratana ŋa yulu bibadi bi mamanya, myakamweese muyusu a Nzambi. Mu taangu mo yiina, hiinzi hya Moose hyaakamwedeme mu liyalala li linene, li bisu Isereli baakaveletwala usungamana✝. Ka liyalala mo liina, aba ndulu la mwana a taangu hoole. Tso Mikele mi mibaabita hu lipfu myakamwedeme na muyusu, 8 ki pila muyusu uvelefulala bunene, mu isalu hi Livupu la Nzambi libaasala! 9 Tso isalu hi hyaakava baatu tsyembili hyaaba na muyusu, ki pila muyusu uvelefulala bunene mu isalu hi baava baatu butsiitsa ŋa busu bwa Nzambi! 10 Bisu utwala mu uleele ti, muyusu wu amwedimi mu taangu a tsomi, utwala uyelemene na muyusu wa lolo yiniiyi wu alutahala bunene ve. 11 Mu mbuli, tso bisiha bi byaamiivyoho mwana a taangu hoole byaaba na muyusu, ki pila muyusu uvelefulala bunene mu bisiha bi bibaakwilala nzyeni!

12 Ni bu bisu lili na hiitu hya pila mo yiina, bisu laaluula na ibahala. 13 Bisu a lili mu usa we Moose wu akafuha mbalanga a nde mu nguumbu ve, mana bisu Isereli bavelemono uvolemene hu liyalala la Nzambi mu hiinzi hya nde✝. 14 Ka buyedi bwa bo bwaakangimi, natee lolo yiniiyi, nguumbu mo yiina yaafuha buyedi bwa bo, ŋa bo bubaataanga mabuuku ma Nzuhisini yi Kulu*. Nguumbu mo yiina, ubaamasa yo ndulu mu liyalala la Kristo. 15 Natee lolo yiniiyi, pasi taangu yi bo bali mu utaanga mihanda mya Moose, nguumbu yili mu ufuha buyedi bwa bo. 16 Ŋa muutu ubaakinguha huli Pfumu, ni ŋaana nguumbu yibaamata*. 17 Ka Pfumu ni Livupu. Ŋa mbuha yi Livupu la Pfumu lili, ni ŋaana bunyanga kaka buli. 18 Bisu boosi, ba baamiimaasa nguumbu mu hiinzi, muyusu a Pfumu li mu umonehele mu bisu. Buuna, Livupu laamiisobo bisu, na bisu laaka ifwafwani hya Pfumu. Eeye, bisu laamiisiisa muyusu wu mukeehe, mu uvyoho hu muyusu wu alutahala bunene. Maana moosi ni mambu ma Pfumu ali mu uvaanga, nde wu li Livupu.