1 O! Tso benu luutwala ukuunda mwana a ladi la me! Eeye, kuundaani me mwana a hoole! 2 Me ndi na likwabi mu benu, mu likwabi li lili mu umata huli Nzambi: me atsa benu lahi li ukwelese benu huli mufudu makwele ndulu mumosi, ni Kristo. Na me tondi umweese benu huli nde we nuumba wa ngidi. 3 Ka, we bu Eva haadungi mu dyeele la taadi, me ndi na boomo ti matsimi ma benu a madunga, mu uveleba bangetetee na ba batsyeme mu Kristo✝. 4 Mu mbuli, benu lili mu ukuunda ti, muutu ayabisa benu Yisu mukima wu asobohono na wu bisu laayabisi benu. Buuve, benu laamiivangama mu usiinga livupu na ndongisili, bi byaasobohono na Livupu la Nzambi buuve na Musamu wu Mubwe, bi benu laayaki huli bisu!

5 Hwande, baatu ba bali mu umonehele ti bo «biluumbi bya manayee», me a handi mu umono mu ki lo byo byaavyohelele me ve. 6 Mu mbuli, me a haandeenge limi mu utoyo ve, ka uto ti mu nzaabili ya Nzambi, benu a luuto na me ve! Ŋa hati la benu, bisu likamwese benu ifwaani paayalala pasi taangu, mu pasi musamu.

7 Ŋa me anzabisi benu Musamu wu Mubwe wa Nzambi, me anzabisi benu nde mu bungodu. Me atondi ukulamana, mana benu lisyenoho. Kaahu bubi bu me atsiidi buuna? 8 Me apuuli mabundu makima na uyaka likumbasa la mbongo mu ukumbasa benu. 9 Na ŋa me ambeedi huli benu, me a haambeedi mupfuna a muutu tso mumosi mu benu ve, ŋa me akakeehele mu pasi isiha. Mu tooni ati, baana ba ngu ba baamati hu Masedonya, baabehili me byosi bi me ambeedi na byo nzala. Me a haatoondi uba mupfuna a benu mu pasi musamu ve, na me ukwada mu uveleba mupfuna huli benu. 10 Mu imbuli hya Kristo hi hili mu me, me miindeele lo: muutu tso mumosi a huukondosono me unyemele dyambu mo liina mu Akayi yoosi ve. 11 Mu hima me ndeeli buuna? Mu tooni a bu me apeletondo benu? Nzambi nde mwakulu asinzayaaba ti me atondo benu!

12 Me ukaakwada mu uvaanga mambu ma me ndi mu upaanga lolo yiniiyi, mu umaasa mapalulu moosi huli baatu ba bali mu usa nyeme ti, bisu boosi tsiitsa lili. 13 Mu mbuli, baatu mo baana biluumbi bi mapfuta bili. Bo bapfuti ba baatu mu mbongo, ba bali mu ulwata iyunga hi biluumbi bya Kristo. 14 Wuuna a hali musamu wa kimuhili ve, mu tooni ati, Saatana nde mwakulu ubaalwata iyunga hya pofi wu liyalala mu udungasa baatu. 15 Buuna, liina a luukimusa benu ve. Basalili ba Saatana kaka, bali mu ulwata iyunga hi basalili ba Nzambi wa tsiitsa. Ka bo buubaha tsukusu yi yaahwama na mavaanga ma bo.

16 Me mbwendeele lo: nyaha muutu tso mumosi aveletsima ti, me iyahudi ndi. Tso a buuna ve, siingaani me we iyahudi, mana me kaka tsa mwana a nyeme. 17 Mu mbuli, mu li litali musamu nyeme a me, me ndi mu utoyo we itsuudu, ka a we bu Pfumu Yisu akiitoyo ve. 18 Ka bu baatu ba balahi bali mu usa nyeme mu matooni ma imuutu, buuna me kaka utsa nyeme. 19 Benu ba lili bangeele, benu lili mu ukuunda biyahudi na bunyanga bwosi! 20 Benu lili mu ukuunda ti bakitusa benu we baviha, ti bataana busina bwa benu, ti bapatula mbahili a benu, ti batala benu mu talili yi isaayi, ti batete benu mu mbalanga. 21 Ki pila a tsonyi mu uleele lo: bisu kaahu laafulala butsatsambi? Ni buuna benu litsimi?

Hwande, tso bakima babili usa nyeme, me kaka utoyo we nga a ladi, me unzyehele usa nyeme. 22 Bo bisu Ebeleho bali? A me kaka musi Ebeleho. Bo bisu Isereli bali? A me kaka musi Isereli. Bo ba imbisa hya Abrahami bali? A me kaka wu imbisa hya Abrahami. 23 Bo Kristo bali mu usalila? Buuna, me utoyo we nga a ladi — me afulala bo — me miitsala bisalu bi binono ufulala bo. Me akoto bikondaayi taangu yoosi ufulala bo, baateti me ufulala bo, na taangu yoosi, me ambeedi bebele na lipfu ufulala bo. 24 Me anzaki huli Bayudaayo maku matatu ma bikooti, bikooti ipfwa (39)*, nzaka taanu. 25 Bisu Looma baateti me bikooti tete tatu. Baalangi me mamanya langa limosi mu uduba me. Me andyaami mu likuumbi ndyaama tatu, me apyoosi ilumbu imosi na butsuhu bumosi wu aleengoho mu mubu. 26 Mu midyenge mya me mi milahi, me ambwani na bikahu bi banzali ba baaluula, buuve bi bataani, bikahu bya baatu ba buli la me, buuve bikahu bi bangoyi. Me amba bebele na lipfu mu misyenge, mu makumu, mu mubu, bebele na lipfu ŋa hati la yuha baana ba ngu. 27 Me ambwani bisalu bi binono na malobese ma manono. Taangu yoosi me ambeedi mutso biriimba. Me amoni nzala na peyu. Taangu yoosi me akandya ikaandi. Me akamono pasi mu piyu na mu vele li bikutu. 28 Na, hwavele utoyo mu mikima-mikima, hi hili mu uleme ŋa yulu a me pasi ilumbu: ni mupfuna wu mabundu moosi. 29 Tso muutu li wu akolo, me kaka ndi mu umono ikolili na nde. Tso muutu bwiidi mu masumu, me ndi mu umono pasi yi yaafulala mu mutima a me.

30 Tso hu li ti usa nyeme, ni mu ikolili hya me, me utsa nyeme. 31 Nzambi wu li Taata a Pfumu a bisu Yisu — nyaha bayuusa nde mu bilima na bilima — nde yaabi ti me a handi mu upfuta ve. 32 Ŋa me ambeedi hu musyenge a Damaseko, mukuutu wu akasalila mutumi Aretaasi, asuusi bakeedi ba nde mu ukeelese minywa mya nzo mi musyenge, mu tooni ukaanga me. 33 Ka baapalisi me mu luta li ibaha hi musyenge, mutso a poonzi na baakulimisi me hu mbadi, na ni buuna me apfuuhi ŋa myoho mya nde✝.