1 Mu mbuli, bu bisu libaasala itwadi na Nzambi, bisu lili mu uvondo huli benu, mu uvelesa dyedyeke mu hyese hi benu laayaki huli Nzambi. 2 Eeye, Nzambi li mu uleele bunuubu:

«Mu taangu yi yaafwana, me anzahuli we,

mu ilumbu hi liyobolo, me anzakumbasa we✝.»

Eeye, yiniiyi ka ni tangu yi yaafwana mu uyaka hyese hya Nzambi. Mono ilumbu hi liyobolo!

3 Bisu lili mu upeke, mu uvelekubasa muutu tso mumosi baku mu pasi musamu, mana bavelekusa isalu hya bisu. 4 Homo, mu pasi musamu, bisu libaamonehele basalili ba Nzambi ba mbuli. Bisu lili mu ukuunda na mukonono woosi, mapasi, minyongi na boomo. 5 Baabeeti bisu na baabwaahi bisu mu kondaayi✝, baatuumbisi baatu mu usa isalu hya bisu muyunga. Baakwamisi bisu bisalu bya pasi, bisu laakakiila iriimba na laakadya ikaandi. 6 Bisu lili basalili ba Nzambi bangidi, banga a nzaabili, banga mukami na banga mutima bubwe. Livupu la Ngidi libaasala mu bisu, litondo la bisu lili la mbuli, 7 bisu lili mu uyabisa musamu wu imbuli mu matwala ma Nzambi. Mu hooho hwa mbahala na hwa kaasu, bisu lili na bilwanili bi butsiitsa bwa Nzambi. 8 Baatu bubaayuusa bisu, na bakima bubaarokolo bisu: tso utuha bisu tso ukiinza bisu. Bo bali mu utsima ti bisu bapfuti lili, ka hwande bisu imbuli lili mu uleele. 9 Bo bali mu uvolo bisu we baatu ba baaveleyabahana, kaahu baayaaba bisu bubwe-bubwe. Bo bali mu umono bisu we baatu ba baaka mu ukwa, kaahu bisu lili moonyi. Bo bali mu usyembe bisu hu unono, kaahu bo a bali mu uduba bisu ve. 10 Bo bali mu uva bisu lingebe, ka hwande bisu lili mu kinya. Bo bali mu utsima ti bisu biyaha lili, ka bisu lili mu usa ti baatu ba balahi baba bisina. Bisu lili mu umonehele we ba baavele na isiha, kaahu mu mbuli, bisu laabaha byosi!

11 Bisu laatoyo na benu na imbuli hyoosi, bambaahi ba musyenge a Koliito, bisu laasinzayalusa benu mutima a bisu. 12 Litondo la bisu mu benu a lili na ndilu ve, ka ni benu mwakulu lili mu usa ndilu mu litondo la benu mu bisu. 13 Buuna, me ndi mu utoyo na benu we bu taata ubaatoyo na baana ba nde. Siingalaani litondo la bisu, baasinzayalusaani bisu mutima a benu!

14 A laabaambana na ba baavelesa imiinu mu Nzambi. Mu mbuli, buni hi hili butsiitsa hyutwala ubaambana na hi ibi? Buni liyalala luutwala ubaambana na piipidi? 15 Buni Kristo huutwala ubaambana na Saatana? Buuve, buni nga imiinu mu Nzambi huutwala ubaambana na wu avelesa imiinu mu Nzambi? 16 Ki hyenze hyutwala uba ŋa hati la nzo a Nzambi na nzo yi bifwita? Mu tooni ati, bisu a benu ni nzo a Nzambi ya Nzambi a moonyi.

We bu Nzambi nde mwakulu haleeli lo:

«Me ukwilala uba, na me undyata ŋa hati la bo,

me umba Nzambi a bo, na bo buuba buli la me.

17 Palaani ŋa hati la bo, na tahuhaani na bo.

A libeembe pasi hyo hi hyasumaha ve,

na me, me unzaka benu.

18 Me umba Taata a benu,

na benu luuba baana ba me,

ba babahala na ba bakaasu,

huleeli Pfumu,

Nzambi Pungu nga Matwala✝.»