1 Mu me, baana ba ngu, me a hatwali utoyo na benu we huli baatu ba bali na Livupu la Nzambi ve. Ka, me miitoyo na benu we wu li mu utoyo na baatu ba tsi mo yiniiyi. Mu tangu mo yiina, me atoyi na benu we bu babaatoyo huli bikenyi mu imiinu mu Kristo. 2 Me apiidi benu mabeelo, ka a byudya bi binono ve, mu tooni ati, benu a laakiikunda byo ve✝. Na tso buunuubu, benu a luutwala byo ve. 3 Mu tooni ati, mbiili a benu yi kini we ya baatu ba tsi mo yiniiyi. Bu nyengi yili ŋa hati la benu, mitsotso, benu lili mu umweese ti benu li kini baatu ba tsi mo yiniiyi. Ndyatili a benu yili yi imuutu. 4 Ŋa mumosi mu benu ali mu uleele ti: «Me wa Pahuli, me ndi!» Na mukima ti: «Me wa Apoloso, me ndi!» Buuna, benu lili mu udyata we baatu ba baaveleyaba Nzambi.

5 Homo ati, Apoloso na ali? Na Pahuli na ali? Bo baatu ba Nzambi hasalila mu ubita benu hu imiinu. Muutu muutu mu bisu li mu ukuhasa isalu hi Pfumu haava nde. 6 Me akuna, Apoloso anyanza mamba, ka Nzambi ni wu ubaakulasa. 7 Buuna, wu ubaakuna na wu ubaanyanza mamba a bali na tsongo ve, ka ni Nzambi li na tsongo. Mu tooni ati, ni nde ubaakulasa bi baakuna. 8 Wu ubaakuna na wu ubaanyanza mamba, bubaasala boosi mu Nzambi. Pasi muutu mu bo sa ayaka musyendo nde, we bu hu li isalu hya nde. 9 Mu tooni ati, bisu lili batsyengi ba Nzambi. Benu lili ngundu a Nzambi.

Benu lili kaka tuungili a Nzambi. 10 We bu hu li bungodu bu Nzambi haava me, me atsa isalu we mutuungi manzo nga buyedi, na me atuunga bibeene. Bunuubu, muutu mukima uyatuunga ŋa yulu. Nyaha pasi muutu wu uya humbisa akele mu tuungili a nde. 11 Mu tooni ati, bibeene baamiikwasuusa: ni Yisu Kristo. Na a hu li na muutu wu ubwetuunga bikima ve. 12 Bamosi buusalila wolo, tso mbongo yi bitali, buuve mamanya ma talu, mu utuunga ŋa yulu bibeene mo biina. Bakima buusalila mabaya, tso biimbu buuve kuunza. 13 Ka bungeele bu isalu hya pasi muutu sa buyabahana mu ilumbu hya tsundusu. Mu mbuli, ilumbu mo hiina sa himonehele mu mbaahu. Na mbaahu sa yitsiitsa isalu hya pasi muutu mu umweese tsalu a hyo. 14 Tso muutu tuungi nzo yi yili mu ukuunda mbaahu, nde sa abaha pfuta. 15 Ka tso nzo yi nyengi mu mbaahu, mutuungi a nzo a huyaka pfuta ve. Uto ti ndemo mwakulu, nde sa ayoboho. Ka uyoboho hwa nde huuba we wu uvyohele mutso a ludi la mbaahu.

16 Benu laafwana uyaaba ti nyutu a benu yili mbuha ya ngidi ya Nzambi, na ti Livupu la Nzambi lili mu benu. 17 Ni mu buuna, tso muutu tsali mbuha ya ngidi ya Nzambi, Nzambi sa atsala nde wuuna. Mu tooni ati, mbuha yi Nzambi hatsahala yili ya ngidi, na mbuha mo yiina ni benu.

18 Muutu a apfuta nde mwakulu ve: tso mumosi mu benu li mu utsima ti nde nga tsiki mu misamu mya tsi mo yiniiyi, nyaha nde amaakituha «nga ladi», mana nde akituha «nga tsiki» ya mbuli a mbuli. 19 Mu tooni ati, tsiki a tsi mo yiniiyi, yili ladi ŋa miisu ma Nzambi. Ni mu buuna Mabasonehe ma Ngidi mali mu uleele: «Nzambi ubaabaha bapuni mu mweto a soho la bo mwakulu.» 20 Mo mabaabweleele: «Pfumu yaabi matsimi ma banga tsiki, nde yaabi ti mo a mali na tsongo ve✝.» 21 Ni mu buuna, a lisa nyeme mu tooni a baatu ve. Mu tooni ati, bisiha byosi bili bya benu. 22 Pahuli, Apoloso buuve Peetelo, baatu ba tsi, moonyi buuve lipfu, loloyi buuve ngwali: byosi bili bya benu. 23 Ka benu, benu lili ba Kristo na Kristo li wu a Nzambi.