1 Ŋa mumosi mu benu ukaakana na mwana a ngu, buni nde hutwala uyakese wuna ŋa busu bu banzonzi ba bangoyi? Mu hima mu uveleyene huli baatu bangidi mu uvaanga musamu mo wuuna? 2 Benu a laayaaba ve ti, baatu ba Nzambi ni ba buutsundasa tsi? Tso baasoolo benu mu uba banzonzi ba tsi yoosi, benu a luutwala usuungaha misamu mi mikeehe ve? 3 Benu a liyaabi ve ti, bisu a benu sa litsundasa bapofi? Tandisini misamu mya pasi ilumbu! 4 Ni mu buuna, ŋa benu libaakaakana mu tooni misamu mi idiingu mo hiniihi, benu libaasuusa bangoyi mu uba banzonzi! 5 Ni musamu a tsonyi huli benu! Ŋa hati la benu a hu li na muutu nga tsiki wu utwala usuungaha dyambu la baana ba ngu ve? 6 A hu li bu bwe ve ti, mwana a ngu mumosi akaakana na mwana a ngu mukima, ŋa busu bu banzonzi ba baaveleyaaba Nzambi.

7 Mbuli, utaanda ŋa hati la benu aka iliimbu hya mbwili a benu. Mu hima benu libaavele kama mu mutima ŋa busu bwa mambu ma bali mu ukwiha benu? Mu hima benu laavelesiinga ti bapatula benu bisiha bya benu? 8 Ka benu libaavyoselele, benu ni ba lili mu ubaakwiha bana mambu ma maavelefwana, ubaapatula bisiha bya bo. Titswene, benu lili mu uvaanga maana ŋa busu bwa baana ba ngu ba benu mwakulu! 9 Benu liyaabi ti ba bali mu usa bubi a buukoto hu Ipfumu hya Nzambi ve. A liba hu iliba ve: tso baatu banga bumbembo, tso ba bali mu usalila bifwita, tso banga mayamba, tso ba bahala ba bali mu ukwele ba bahala na bo, 10 tso biibi, tso banga linyungi, tso bikolo-mbungu, tso bakuti ba mapfuundu, tso banga soho, bo baana boosi a buubaha mbuha mu Ipfumu hya Nzambi ve. 11 Buuna ni bu bakima ŋa hati la benu baaba. Ka benu baaswaha, baatsyemese benu mu masumu, na benu aka ba baakuha mu nduhi a Pfumu Yisu Kristo, na mu Livupu la Nzambi a bisu.

12 Benu libaaleele: «Me ndi na muswa mu usa pasi li me tondi — ka pasi isiha a hili tsoongo ve — me ndi na muswa mu usa pasi li me tondi.» Ni mbuli, ka me a hatondi ukoto hutso buviha ve. 13 Baatu bubaaleele ti: «Byudya baavaanga mu tooni a moonyi, na moonyi baavaanga mu tooni a byudya.» Ni mbuli, ka ilumbu imosi, Nzambi sa tsala byo byosi. Ka kelaani, nyutu a bisu a benu a baavaanga yo mu bumbembo ve. Yo yili ya Pfumu, na Pfumu li mu nyutu. 14 Nzambi wu haasuuli Pfumu ŋa hati la babaakwa, sa asuula bisu kaka mu matwala ma nde. 15 Benu a liyaabi ve ti nyutu a benu yili binama bya Kristo? Na buuna, me tsa tsalila binama bya Kristo mu uba nyutu mosi na mukaasu mayamba? Naana! 16 Benu a liyaabi ve ti bahala li luupfuutana na mukaasu mayamba, buna a nde ka nyutu mosi? Mu tooni ati baasonehe: «Bo baboole sa baba ndulu ka muutu mumosi✝.» 17 Ka woosi wu upfutana na Pfumu, nde ka mumosi na nde mu Livupu.

18 Ni mu buuna, baabataani bumbembo. Pasi lisumu li muutu huusa, lo lili hu mbadi a nyutu, ka woosi wu ubaasalila bumbembo li mu usumana nyutu a nde mwakulu. 19 Buuve, benu a liyaabi ve ti nyutu a benu yili nzo Livupu la Ngidi li lili mu benu, li Nzambi haaviidi benu? Ni mu buuna, nyutu a benu a yaasaala ya benu ve. 20 Nzambi ayobolo benu mu talu yinene. Buuna, baayusaani nde mu nyutu a benu.