1 Baana ba ngu a me, ŋa me anzidi huli benu hati a tsomi, mu uyabisa benu tswehi a Nzambi, me a haatsalili bitoyili bi binono, buuve nzaabili yi yamonehele ve. 2 Eye, ŋa me ambeedi ŋa hati la benu, me apoli kesili yi uyiha ndulu dyambu la Yisu Kristo: ni lipfu la nde ŋa kuruwa. 3 Ni mu buuna, me anzamonehele huli benu muutu wu akolo, na ubaatsula likamba mu boomo. 4 Mambu ma ndongisili a me na nzabisili a me, a maaba bileedi bya tsiki yi imuutu ve. Ka ni matwala ma Livupu la Ngidi maamweesi benu ti ndongisili a me aba ya mbuli, 5 mana imiinu hya benu hisiingama mu matwala ma Nzambi, ka a mu tsiki a baatu ve.

6 Ka bisu libaalongese tsiki huli ba baakula mu imiinu. Tsiki mo a yili ya baatu ba tsi mo yiniiyi ve, a tso bapfumu ba tsi ba buunyambaana. 7 Naana, bisu lili mu uyabisa tsiki a tswehi a Nzambi, yi baatu baaveleyaaba. Nzambi avangimisi yo tswamina mbandili a tsi, mana bisu likoto hutso muyusu a nde. 8 Tsiki mo yiina, tso mumosi mu bapfumu ba tsi mo yiniiyi a hayaabi yo ve. Bo kini baayaabi yo, bo a baakikomene Pfumu nga muyusu ve. 9 Ka, we bu Mabasonehe ma Ngidi mali mu uleele:

«Li pasi muutu havelemono tso uveleyuha,

li pasi muutu haveletsima,

Nzambi avangimasa lo,

mu tooni a baatu ba bubaatondo nde✝.»

10 Ka, ni huli bisu, Nzambi hayabisa tswehi mo yiniiyi mu Livupu la Ngidi.

Mu mbuli, Livupu la nde utwala utsikaha byosi, tso hu li matsimi ma Nzambi ma maasinzasweme. 11 Ni mu buuna, mu ma matali muutu, ndulu livupu la muutu liyaabi matsimi ma muutu. Ni bumosi kaka, ndulu Livupu la Nzambi liyaabi matsimi ma Nzambi. 12 Ka bisu, bisu a laayaka livupu la tsi mo yiniiyi ve. Bisu laayaka Livupu li libaamata huli Nzambi, mana bisu litsikaha bungodu bu Nzambi haava bisu. 13 Na bisu, a na bitoyili bya tsiki yi imuutu bisu libaalongese bungodu mo buuna ve, ka mu ndongisili yi Livupu la Nzambi. Ni buuna, bisu lili mu ubiindula mamali mu utala Livupu, huli baatu ba bali mu udyata mu Livupu.

14 Ka woosi wu li mu uhwada ndulu mu imuutu, utwala uyaka bisiha bi Livupu la Nzambi ve: mu nde byo bili ladi. Nde utwala utsikaha byo ve. Mu tooni ati, ni mu Livupu la Nzambi buutwala utsikaha byo. 15 Woosi wu li na Livupu la Nzambi utwala utsiha byosi. Ka baatu bakima utwala utsikaha mya muutu nga Livupu la Nzambi ve. 16 Mu mbuli baasonehe:

«Na ayaabi matsimi ma Pfumu?

Na atwali uva nde mandoongi✝?»

Ka uto ti bisu, bisu lili na matsimi ma Kristo.