1 Baana ba ngu, me tondi ti benu liyibuhala moonyi mu ma maayiili bakaha ba bisu mu tangu a Moose. Yidu laakaswehe bo boosi, titswene bo baasabuhi Mubu wu Mubenge✝. 2 Hutso a yidu na hutso mubu, bo baayaki tondihili itwadi na Moose. 3 Bo boosi baadiidi byudya ni byo bimosi bi Nzambi haaviidi bo. 4 Bo boosi baanywidi mamba ni mo mamosi ma Nzambi haaviidi bo. Mu mbuli bo baakanywa ŋa manya li Nzambi haalahi bo, li laakaduukala bo. Manya mo liina aba ni Kristo. 5 Ka ba balahi ŋa hati la bo a baaba ba babwe ŋa busu bwa Nzambi ve, ni mu buuna bo baakwidi lahi-lahi mu kumu a nzala✝.

6 Biina ni bifwaani mu tooni a bisu, mana bisu livele na manzala ma mabi, we bu bo baabahi mo✝. 7 A likuunda bifwita ve, we bu bakima ŋa hati la bo baakuundi byo. We bu Mabasonehe ma Ngidi mali mu uleele: «Baatu baatsahili mu udya, mu unywa, titswene baatelimi mu ukina hu ubi ŋa busu bu bifwita✝.» 8 Bisu a laafwana usalila bumbembo ve, we bu bakima ŋa hati la bo baasalili. Maku moole ma biveeve, na biveeve bitatu (23 000) bya baatu, baakwidi mu ilumbu imosi✝. 9 Bisu a lafwana ulobese Kristo we bu bakima ŋa hati la bo baasiidi ve, na mu buuna, bo baakwidi mu tooni bataadi ba baakahi bo✝. 10 Nyahaani uŋono, we bu bakima ŋa hati la bo baaŋoni, na pofi lipfu amani uduba bo.

11 Mapasi mo maana maabwili bo, mana maba imbangi huli baatu bakima. Baasonihi mo mu uyibusa bisu, mu tooni ati, bisu laaka bebele a taangu ya tsukusu. 12 Ni mu buuna, nyaha wu li mu utsima ti nde ahwada mu imiinu, akebe mu uvelebwa. 13 Malobese ma maayiili benu ni ma mubaayiila mu baatu boosi. Ni mu buuna, Nzambi wu li ngetetee mu malahi ma nde, a husiingasa ve ti malobese mavyoho mifudi mya benu. Ka mu tangu a lobese, nde sa ava benu mifudi mi myayelemene, mu ukuunda lo na nzila yi upala hutso a lo✝.

14 Ni mu buuna, bambaahi ba litondo, kebaani mu ubaakuunda bifwita. 15 Me ndi mu utoyo na benu we huli baatu ba nga buyedi. Silasaani benu mwakulu ma me ndi mu undeele. 16 Mbuungu yi lisyeme, yi bisu libaafutala Nzambi matondo, ŋa lili mu unywa yo, a yili itwadi hya bisu na makila ma Kristo ve? Lipa li bisu libaatabula, ŋa lili mu udya ilaambu hya Pfumu, a lili itwadi hya bisu na nyutu a Kristo ve✝? 17 Mu tooni ati, lipa lili ndulu limosi. Tso bu bisu lili ba balahi, bisu lili nyutu mosi, na bisu lili mu ukabasana lipa limosi liniili.

18 Monwaani buli li Isereli: baatu ba bali mu udya banyama, ba bayeholo mu bungodu bwa itwadi na Nzambi. Buuna, bo bali mu ukuunda nde mu nzila mo yiina✝. 19 Hima me ndi mu undeele? Ti nyama wu baayeholo mu bungodu huli bifwita li na tsoongo? Buuve ti ifwita hili na tsoongo? 20 Naana! Ka bi bali mu uyeholo, bali mu uyeholo byo huli bifwita, bali mu ukuunda matengo, ka a Nzambi ve. Ni mu buuna, me a hatondi ti benu liba itwadi na matengo ve. 21 Benu utwala unywa nzila mosi mbuungu a Pfumu na mbuungu a matengo ve. Benu utwala utsahala nzila mosi ŋa meetse ma Pfumu na ŋa meetse ma matengo ve. 22 Buuve bisu litondi ti Pfumu✝ abahila bisu a benu nyengi? Ti bisu a benu laalutahala nde mifudi?

23 Eeye, «byosi baava muswa» we bu benu libaaleele, ka byosi a bili na tsoongo mu bisu ve. Mu mbuli, «byosi baava muswa», ka byosi a bili mu ukulasa imiinu ve. 24 Nyaha pasi muutu a hasaha ndulu kaluha a nde mwakulu, ka asaha fula-fula yi bakima.

25 Benu utwala udya byosi bi bali mu usuumbasa hu saandu hwavele uva byuhu bi byumwese benu mutima pasi. 26 Mbuli, we bu baasonehe: «Toto na byosi bi bili mu yo bili bya Pfumu✝.» 27 Tso muutu wu avele na imiinu mu Nzambi, tsihi we mu udya na tso we siingi, dya hwawe byosi bi buuva we, hwavele uva byuhu bi byumwese we mutima pasi. 28 Ka tso muutu leeli we: «Nyama mo wunuuwu baayeholo nde mu bungodu huli bifwita,» nyaha udya nde, mu tooni a nde wu miiyibusa we, na mu uvelemweese we mutima pasi. 29 Ŋa me ndi mu undeele «uvelemweese mutima pasi», me a handi mu undeele mutima a we ve, ka mutima a muutu wu yibusi we.

Tso ni buuna, mu hima mutima a muutu mukima hutwala utsundasa me mu mambu ma me ndi mu upanga mu bunyanga bwosi? 30 Tso me ndi bunyanga mu mutima a me, mu ufutala Nzambi matondo mu bi me ndi mu undya, mu hima baatu buutsundasa me mu tooni a byo?

31 Ni mu buuna, tso benu laadya, tso laanywa, tso laasa pasi byo, vaangaani byosi mu tooni muyusu a Nzambi. 32 A liba bakubisi ba baku huli Bayudaayo, tso huli bangoyi, tso huli ba bali mu libundu la Nzambi ve. 33 Baadyataani we me: me ndi mu ukwada mu umweese kinya huli baatu boosi mu mambu moosi. Me a handi mu utsaha libwe la me mwakulu ve, ka libwe la baatu ba balahi, mana bo bayoboho.