1 Duukalaani ndyatili a me, we bu me ndi mu unduukala ndyatili a Kristo.

2 Me ndi mu unzuusa benu bu benu lili mu uyibuhala me moonyi mu pasi dyambu, na bu benu lili mu uduukala matumili ma me apiidi benu. 3 Ka me tondi ti benu liyaaba liniili: Kristo ni mutswe a pasi bahala, bahala ni mutswe a mukaasu, na Nzambi ni mutswe a Kristo. 4 Ni mu buuna, tso bahala lili mu usambila tso lili mu ubihula li laafuha mutswe, lo lili mu urokolo Kristo wu li mutswe a lo. 5 Ka tso mukaasu li mutswe bwasi ŋa nde ali mu usambila tso ŋa nde ali mu ubihula, nde li mu urokolo mulumi a nde. Ni tsonyi huli nde, we mukaasu wu baakuula mutswe. 6 Tso mukaasu a hafuhi mutswe a nde ve, nde afwana kaka ukese nanga a nde! Ka mu tooni ti ni tsonyi huli mukaasu mu ukese naanga, buuve mu ukuula mutswe, nde afwana mu ubaafuha mutswe a nde. 7 Bahala a lili na nzala mu ufuha mutswe a nde ve. Mu tooni ti lo lili ifwaani na muyusu a Nzambi, ka mukaasu li muyusu a bahala. 8 Mu mbuli, bahala a baavaangi mu nyutu a mukaasu ve. Ka mukaasu ni wu baavaangi mu nyutu a bahala. 9 Na bahala a baavaangi mu tooni a mukaasu ve, ka mukaasu ni wu baavaangi mu tooni a bahala✝. 10 Ni mu buuna, mu tooni bapofi, mukaasu afwana ubaaba na iliimbu hu yulu mutswe a nde, hi hili mu umweese lituma la nde. 11 Ka ŋa busu bwa Pfumu, mukaasu a utwala mu uba hwavele a bahala ve, bahala kaka utwala mu uba hwavele a mukaasu ve. 12 Mu tooni ati, we bu baavaangi mukaasu mu nyutu a bahala, bahala libaabutama mu mukaasu, na byosi bibaamata huli Nzambi.

13 Tsikahaani benu mwakulu: hwafwana huli mukaasu mu uba mutswe bwasi ŋa nde ali mu usambila Nzambi? 14 Bipfu bya tsoongo bili mu umweese ti, a hwafwana huli bahala mu ubaaba na naanga yinda ve. 15 Ka, ni muyusu huli mukaasu mu ubaaba na yo. Naanga yinda baaviidi yo huli mukaasu mu ubaaswehe nde nyutu. 16 Ka tso muutu tondi usobosono matsimi mu musamu mo wunuuwu, nde afwana uyaaba liniili: tso mabundu ma Nzambi, tso bisu mwakulu a lili na ipfu ikima ve.

17 Mu mambu ma mu udukala, mu li litali makutuunu ma benu, me a hunzuusa benu ve. Mu tooni ati, mu makutuunu ma benu, benu a lili mu uvaanga ma mabwe ve, ka fula-fula ma mabi. 18 Mu ubaandiha, baayabisa me ti benu na makabu ŋa benu libaasa makutuunu. Me ndi mu utsilasa ti makima ma bali mu uleele me, mali ma mbuli. 19 Mu mbuli, hufwani huli benu mu uba na makabu, mana bayaaba ba bali ngetetee ŋa hati la benu. 20 Monwaani: ŋa benu lili mu upfuutana, a ilaambu hya Pfumu benu libaadya ve. 21 Mu taangu yi benu libaatsahala ŋa metse, muutu muutu ubaabingalala udya ilaambu hya nde mwakulu. Ni mu buuna, bakima na nzala, bakima na malaangi. 22 Benu a lili na manzo ma ubaadya na ubaanywa ve? Buuve benu libundu la Nzambi lili mu upenye, na umweese ba baavele na pasi isiha tsonyi? Hima benu libaakeele ti me ndeele benu? Ti me nzuusa benu? Naana, mu mbuli me utwala uyuusa benu mu dyambu mo liina ve.

23 Mu mbuli, monwaani ndongisili yi me anzaka huli Pfumu na yi me atoosele benu: Pfumu Yisu, mu butsuhu bu baayehuli nde, avoli lipa, 24 na humbisa ufutala matondo huli Nzambi, nde atabuli lo na aleeli: «Yiniiyi ni nyutu a me, yi me ndi mu upa mu benu. Baasaani bunuubu mu ubaayibuhala me moonyi.» 25 Bumosi kaka, bu bo baamani udya, nde avoli mbuungu, na aleeli: «Mbuungu mo yiniiyi, ni Nzuhisini yi Nyatihi, yi yaavangama mu nzila makila ma me. Baasaani bunuubu, pasi tangu yi benu luukanywa yo, mu ubaayibuhala me moonyi.» 26 Mu mbuli, pasi tangu yi benu luukaadya lipa mo liniili na yi benu luukaanywa mbuungu mo yiniiyi, benu libaayaabisa lipfu la Pfumu natee bu nde huuyafutaha.

27 Ni mu buuna, woosi wu udya lipa buuve unywa mbuungu a Pfumu hwavele usungama, sa abaha tooni yi masumu ŋa busu bwa nyutu na makila ma Pfumu. 28 Nyaha pasi muutu atswamina utsikaha hutso mutima a nde, titswene nde adya lipa na anywa mbuungu mo yiniiyi. 29 Mu tooni ati, tso muutu diidi lipa mo liniili na nywiidi mbuungu mo yiniiyi, hwavele utsikaha itwadi hya byo na nyutu a Pfumu, nde li mu udya na unywa tsundusu a nde mwakulu. 30 Ni mu tooni mo yiina, ba balahi ŋa hati la benu bali babeedu, banga bipiha, na ba balahi baamiikwa. 31 Tso bisu libaakengese mitima mya bisu mwakulu, bisu a luubwebwa hu tsina a tsundusu a Nzambi ve. 32 Ka, Pfumu ubaatsundasa na usuungaha bisu, mana bisu liveleyaka tsyembili itwadi na baatu ba tsi.

33 Ni mu buuna, ŋa benu libaapfuutana mu ilaambu hya Pfumu, baakeelaani bana. 34 Tso muutu li na nzala, nde afwana umaadya hu nzo a nde, mana makutuunu ma benu a mabehele benu tsundusu a Nzambi.

Uto ti misamu mikima, me tsa tsuungaha myo ŋa me unza huli benu.