1 Me a handi bunyanga ve? Me a handi iluumbi hya Yisu ve? Me a hamoni Yisu Pfumu a bisu ve? Benu a lili mbutu a isalu hya me mu Pfumu ve? 2 Tso bu bakima bubaavelesilasa ti me iluumbi hya Yisu, ka uto ti mu benu, mbuli me iluumbi me ndi. Ni mu buuna, bu benu laakangama mu Pfumu, benu mwakulu lili iliimbu ti me ndi iluumbi hya Kristo.

3 Ŋa busu bwa ba bali mu utsundasa me, me ndi mu ukala linyutu la me. Mono buni me tondi mu uleele: 4 me a handi na muswa mu uyaka byudya na byunwya mu isalu hya me ve? 5 Me a handi na muswa mu udyenge na mukadi wa Mukristo, we bu biluumbi bikima bubaasa, na baana ba ngu a Pfumu na Peetelo ve? 6 Buuve, ndulu ni bisu a Baranabasi laafwana usala mu ubaha bi ubuungala musunya? 7 Leelaani ati me: benu laamiiyuha ti lisadaadu libaasala mu mbongo a nde mwakulu? Buuve musali a ngundu, aveledya miluunda mi miti mi nde haakuna? Buuve keedi biboodi, ali bunyanga mu usalila mabeelo ma biboodi bi nde ubaabuungala ve?

8 Mambu ma me ndi mu undeele, a mali mu umata mu nzaabili yi imuutu ve. Mu tooni ati, Mikele mya Moose kaka mili mu uleele bumosi. 9 Ni mbuli, mutso Mikele baasonehe bunuubu: «A laakutala munywa a ngombe, wu li mu usala mu taangu yi nde ubaadyata muhunu✝.» Nzambi lingebe li bangombe ali na lo? 10 A ni mu tooni a bisu baatu, nde haatoyi buuna ve? Eeye, ni mbuli! Ni mu tooni a bisu baasonehe dyambu mo liniili. Nyaha wu li mu upuka na wu li mu ukoolo mbutu, bo baboole babaasala mu hiitu hi ubaha kabu la bo la mbutu. 11 Bisu laakuna muhunu wu livupu ŋa hati la benu. Hu li dyambu la pasi tso bisu litsonzihi busina bwa benu? 12 Tso bakima bali mu ubahila mu benu, bisu a lili na muswa mu ufulala ubahila mu benu ve?

Ka bisu a laatondo usa buuna ve. Homo, bisu laasiingi ukuunda mapasi moosi, mu uvelekubasa Musamu wu Mubwe wa Kristo mabaku. 13 Ka benu liyaabi lo bubwe: ba bali mu usa isalu mu nzo a Nzambi, baafwana ubaha byudya bya bo mu nzo a Nzambi. Titswene, ba bubaasala ŋa metse ma tsuhili bungodu, baafwana uyaka la bo kabu mu bungodu mo buuna✝. 14 Ni bumosi kaka, Pfumu hatuma ti ba bubaalongese Musamu wu Mubwe baafwana ubuungala musunya a bo mu isalu mo hiina.

15 Ka me, me a hakwamisa benu mu ufuta me tso pfuta mosi ve. Me a handi mu utsonehele benu mu uvondo benu busina ve. Bubwe hwande huli me mu ukwa, ka a mu unyaha pasi muutu mu umaasa me inyemunu mo hiina ve.

16 Ni mu buuna, me a handi na nyeme mu ulongese Musamu wu Mubwe ve. Hyo hili isalu hi ubaakwiha me. Me upelendongese Musamu wu Mubwe, ni lingebe huli me. 17 Tso me atsooli me mwakulu isalu mo hiniihi, me akiimbaha pfuta a pasi tsungi. Ka bu baakwiha me hyo, hwafwana huli me ndulu mu ukuhasa isalu hi baava me. 18 Pfuta a me ka ki yo? Ni kinya yi ubaalongese Musamu wu Mubwe mu bungodu, hwavele uvondo bisiha bi me apfwana ubaha mu tooni a ndongisili a Musamu wu Mubwe.

19 Eye, me ndi bunyanga. Me a handi muviha a pasi muutu ve. Ka me amiikituha we muviha a baatu boosi, mana me mbehe huli Kristo litangu linene la baatu. 20 Bu me ndi itwadi na Bayudaayo, me ndi mu umonehele we Muyudaayo, mu tooni ubita Bayudaayo huli Yisu. Tso me apele hu tsina lituma li Mikele mya Moose, ŋa me ndi na baatu ba bali hu tsina a lituma li Mikele, me ndi mu udyata we wu li hu tsina lituma li Mikele, mana me mbita bo huli Yisu. 21 Na bu me ndi itwadi na ba baaveleyaaba Mikele mya Moose, me ndi we wu avele hu tsina lituma li Mikele mana me mbita bo huli Yisu. Buuna a butondi uleele ti, me a handi hu tsina lituma li Mikele mya Nzambi ve, ka me ndi hu tsina Mikele mya Kristo. 22 Bu me ndi itwadi na baatu ba baakolo mu imiinu, me ndi we wu akolo mu imiinu, mana me mbita bo huli Yisu. Buuna, me ndi mu upaanga moosi huli boosi, mu uyobolo bakima mu bo. 23 Me ndi mu utsa maana moosi, mu tooni a Musamu wu Mubwe, mana me mbaha kabu li bisiha bi Musamu wu Mubwe haamiisa lahi.

24 Benu liyaabi ti baatu ba bali mu uvaangana mu tiinu, bali mu ubata tiinu bo boosi, ka ndulu muutu mumosi ubaabiinga. Ni mu buuna, benu kaka laafwana ubata tiinu mu iteesi hya mbiingili. 25 Baatu boosi ba bubaabata tiinu bubaasalila mangidi ma malahi mu uhwadisa nyutu a bo, mu tooni ubaha mutata wu tsongo yuvelekwilala. Ka bisu a benu lili mu usaha mutata wu tsongo yukwilala. 26 Ni mu buuna, me ndi mu umbata tiinu a miisu itsotsi, bu me afwana na mulwani makome, wu aveletete makome hyayuhu. 27 Me ndi mu umweese nyutu a me pasi, me ndi mu utsundasa yo. Me ndi mu utsa buuna, mu tooni ati, humbisa ulongese Musamu wu Mubwe huli bakima, me mwakulu a hampinda mutata a mbingili.