1 Lili mu uyuha tangu yoosi ndyatili yi bumbembo ŋa hati la benu, bumbembo mu iteesi hi baavelemono tso huli bangoyi. Bali mu huleele tsi yoosi ti ŋa hati la benu baatu bali mu usa mayamba. Mayamba mu iteesi hi inono, hi tso bangoyi buuvelekuhasa. Lili mu uyuha ti mumosi mu benu, li mu upala na mukadi a taata a nde! 2 Na benu lili ba baabaluula mu likwayi! Benu likiiba mu lingebe li laafulala! Benu likiibinga wu li mu ubaasa mavaanga ma pila yiina ŋa hati la benu. 3 Mu me, tso bu me avele na benu mu musunya, me ndi ŋa hati la benu mu matsimi. Me amiikwatsundasa nga mavaanga mo maana, we me hu li ŋa busina. 4 Mu nduhi a Pfumu a bisu Yisu, na mu matwala ma nde, ŋa benu lukuukama, me tsa mba na benu itwadi mu matsimi. 5 Benu laafwana uyeholo muutu wa pila mo yiina huli Saatana, mu tooni uduba iteesi hi imuutu mu nde, mana muvumu a nde afuuha mu ilumbu hya tsyelele hya Pfumu.

6 Mu hima benu lili mu usa likwayi? Buuna a buli bubwe ve. Benu liyaabi lo bubwe: «Mwana levure hole ndulu, libaavaatisa lidaama li mapa moosi.» 7 Nyaha benu litsyeme! Masaani mu benu levure la tsikulu, mana benu likituha we lidaama li mapa li linyatihi li laavele na levure. Benu laamiikwatsyeme, mu tooni ati, Kristo, limeme la bisu la Paake, akwidi mu tooni a benu. 8 Buuna, nyaha bisu a benu lisaani mukungi a bisu wa Paake, na mapa ma mavele a tso levure li likulu, tso levure la pangili bubi mu bana, buuve li mutima bubi. Ka, lisaani mukungi a bisu wa Paake, na levure li lisuunga na li imbuli.

9 Mu muhanda a me wa tsyelele, me atsonehe benu mu ubaaveleba likoongo na banga mayamba. 10 Me a hatondi uleele ve ti, benu laafwana utahuha hoosi na bo baana, ba mu tsi mo yiniiyi, ba bali mu udyata hutso mayamba, ba nga nyungu, biibi, ba bali mu ukuunda bifwita. Tso hu li buuna, benu laafwana upala mu tsi. 11 Me tondi uleele ti benu lafwana utahuha na muutu wu li mu uleele ti nde «mukristo», ka nde li mu ubaabwedyata mu bumbembo, buuve li na linyungi, li mu ubwekuunda bifwita, li mu ubwekuta mapfuundu, li ikolobuungu, buuve muyibi. Na baatu ba pila mo yiina, benu a lafwana tso udya na bo ve.

12 A hu li na tsongo huli me, mu utsundasa ba bavele mu Kristo ve. Ka ni ba bali hutso libundu benu laafwana mu utsundasa. 13 Ba bali hu mbadi, Nzambi sa atsundasa bo. Mu tooni ati, Mabasonehe ma Ngidi mali mu uleele ti: «Bingaani mubi ŋa hati la benu✝.»