1 Ni mu buuna, benu laafwana ubaayibuhala moonyi ti bisu lili basalili ba Kristo, ba bali na mupfuna mu uyabisa matswehi ma Nzambi. 2 Ka dyambu li bubaavondo huli musalili, ni mu uba bangetetee. 3 Mu me, a hu li musamu tso benu litsundisi me ve, buuve banzonzi ba tsi. Mutima a me kaka a hali mu utsundasa me ve, bu nde havele mangoongo. 4 Mu mbuli, me a handi na dyambu li mutima a me husyembe me ve. Ka buuna a buli mu umweese ve ti, me wu avelesa dyambu lilibi ŋa busu bwa Pfumu. Mutsundisi a me ni Pfumu. 5 Ni mu buuna, a litsundasa ve, tswamina tangu yi baakese yito. Kelaani ti Pfumu amayaafutaha. Nde sa ayalusa byosi bi bili mu piipidi, na nde sa amweese makani ma mali mutso mitima mya baatu. Na Nzambi sa ava huli pasi muutu muyusu wu afwana na nde.

6 Baana ba ngu, me miitsonehele benu mu tooni a Apoloso na mu me mwakulu, mana benu litsikaha bubwe. Buuna, benu sa liyiha mu ifwaani hya bisu, mana benu litsikaha ngu musamu mo wunuuwu: «Hwafwana mu uba hutso mandilu we bu baasonehe.» Tso mumosi mu benu a haba na isaayi mu uvolo mileembe mya muutu mumosi na ubelele wuna. 7 Mu ki tooni we utsima ti we alutahala bana? Byosi bi we li na byo, a Nzambi ava we byo ve? Tso ni mbuli Nzambi ni wu ava we byo, ki tooni mu usa nyeme mu bi bamiiva we mu bungodu?

8 Benu laamiikwabaha byosi bi benu lili na byo nzala! Benu laaka bisina! Benu laamiibyala batumi hwavele a bisu. Ni buuna? Me na nzala ti benu ni liba hwa benu batumi, mana bisu libaatuma na benu itwadi. 9 Ka me tsimi ti, Nzambi amiisuusa bisu biluumbi, ŋa mbuha ya tsyelele. Bisu baatu ba baamiiva kesilili lipfu, na bamiiyeholo bisu ŋa mbuha mikungi, ŋa miisu ma bapofi na ma baatu boosi. 10 Bisu lili banga ladi mu tooni a Kristo, ka benu lili na tsiki mu itwadi hya benu na Kristo. Bisu lili bimvwemvwengi, ka benu lili na mifudi; bisu lili ba baarokolo, ka benu lili baatu ba baayuusa. 11 Natee mu taangu mo yiniiyi, bisu lili na nzala, na peyu, na pene, ba bali mu utete mapali, ba baavele a nzo yi utsahala. 12 Bisu lili mu umono pasi mu usala mu myoho mya bisu mu ubaha byudya✝. Ŋa baatu bali mu utuha bisu, bisu lili mu usyeme bo. Ŋa baatu bali mu utsuta bisu, bisu lili mu ukuunda. 13 Ŋa baatu bali mu uleele ma mabi mu bisu, bisu lili mu ufutala na butsitu. Natee lolo yiniiyi, bisu lili we biimbu bi baatu bali mu ubuma hu buumbu.

14 Me ndi mu utsonehe benu maniima, a mu umweese benu tsonyi ve, ka benu me ndi mu unzibusa, we baana ba me ba litondo. 15 Ni mbuli, benu utwala ubaha kuumi li biveeve bi basuungihi mu Kristo, ka benu a lili na bataata ba balahi ve, ŋa yulu a me. Itwadi na Yisu Kristo, me ni wu abuta benu, mu tooni ati, me ni wu ayabisa benu Musamu wu Mubwe. 16 Ni mu buuna, me ndi mu upondo huli benu, duukalaani mbiili a me.

17 Ni buuna me ndi mu utsindaha benu Timoteho✝ wu li mwana a me wu litondo, na wu a ngetetee mu Pfumu. Nde sa ayibwala benu moonyi ndyatili a me mu Yisu Kristo, we bu me ndi mu undongese mu mabundu ma Nzambi moosi.

18 Bakima mu benu bali mu usa likwayi, mu tooni ati, bo bali mu utsima ti me a humbwenzamono benu ve. 19 Ka tso Pfumu tondi, me tsanzamono benu. Buuna, me tsanzaaba mambu ma banga likwayi mo baana. Ka a ndulu mambu ma bo ve, napa matwala ma bo. 20 Mu tooni ati, ipfumu hya Nzambi a hili dyambu li mikuma ve, ka dyambu li matwala. 21 Benu hima litondi? Me nza huli benu na likaanda, vooti na mutima wu litondo na wa kulimini?