Marido e mulher

27 Konne qicinni Mageni manjo bifa ifixxe’ni dade; Mageniinxe bifa’ni isoo dade; manjo labbakennaa meyyake asse dade.✝

18 Lebeexxi Duuchchi Woddik Gootti Mageni «Manji qofi hedha eloxxeba’a; tennexxee weli aagaaka, gargaarsanjo isi’a dando» hiyye.

24 Tennexxee Labbak annakannaa ama ifixxa waalaan; are ifixxeninnaa weli mitteke kandaan; lamiingi mitte maala kandaan.✝

4 Yessuusinna hiissee hiyye haaso’ee qici, «Sirende’n Magen insa’nee labbakenna meyyaxxe asse dadeexxa haassossa gophine’eeta?✝ 5 Yessuusinna hiyyee qici, Tennexxee manji ifika annanna ifixxa ama waalaan; ifixxe areninna makemaan; lamiing mitte maala kandaan.✝ 6 Tennexxee insa’ne mitte biso malee’e lamekebaan. Yoona Mageni genci asse’e mitteke asseeka meenni manji gargar hiissowwaal.»

15 Duuchchi Woddik Gootti insa’nee mitteke assemmabaata? Insa’ne maalikinna hafuurik isiken; mayeete insa’nee mitteke asseechchi? Mageniinxa soda’a affeexxa horte hasa’neemmaxxeeten. Tennexxee hafuura ha’nooka heqqedhdhe; ha’nooxxe oosummatixxe are’aa affineemmaxxa xuurameessumma xe’yishshinoqqe’e.

25 Ha’no aro’uwwaa! Kiristoosi Mageniixa tuuta eeyyemmashshanna umo ifika ise’a sa’isseexxi uwwemmashshanni ha’nonna ha’nooxxa aruwwa eeyye! 26 Hiyyichcho ifik darree’n wodi’ik ansheexxi luqqi assat woyyittete kaddaashsha, 27 iittanni xuri yookaani albiinxi gudunfema yookaani elobaaxxi yaane mittetinna ise’n afendebaaxxe, woyyitte, ci’mendaaxxi mitte yaane ise’n hexxebaaxxe danchate asseexxi ifibaa shiqisho’aten. 28 Iittanni aro’uwwi ifi ifixxa aruwwa ifi ifike umishsha eeyya hassissaan; aruwwa ifixxanna eeyya hasissaani; ifixxa are eeyyaaki umo ifika eeyyaan. 29 Ayyinna ifika biso gibaaki hedhebaani; eettenexxa bakka biso ifika itisa’nee xexe’ataan; Kiristoosinna Mageniinxa tuuta’a asse’emmak ittandemman.

22 Ha’no aruwwa! Kiristoosi’a ajajendinammashshanni ha’nooke aro’uwwi’anna ajajemme! 23 Kiristoosi Mageniinxe tuutake umo kademmashshanni aro’ikinna aretike umoni; Kiristoosi iittanni biso ifike kadeexxe Mageniinxe tuuta’a anjiralloken. 24 Mageniinxi tuuuta Kiristoosi’a ajajendammashshanni iittani aruwwa duuchchiinxe yaanenni ifike aro’uwwi’a ajajendowwaali!

33 Kadomalee ha’nonaa’n mitti mitting are ifixxa ifike umishsha eeyyowwaali; aretinna ifika aro’o ulifeessitowwaali.

Ammaanyetike Mini Hadixxa Hedho

18 Ha’no aruwwaa! Gootti edo hasissaaxxe yaane kaddeemmaxxee ha’nooke aro’uwwi’aa ajajemme!

19 Ha’no aro’uwwii! Ha’nooxxa aruwwa eeyye! Hedho insa’nexxanna qaraarstinoqqe’e.

Aro’iinxeenna Aretixxee

1 Iittanni ha’noonna aruwwa aro’o ha’nooke hiremme; mitti mitti Mageniike hiyyichchi’a ajajemabaak hedheexxe kaddoole isike hiyyichchi belonna ifixxe aruwwaxxe hedhonni booji’emme’e higaan. 2 Tinni kaddaachchi luqqitenna manjo ulfeesaaka ha’nooxxe hedhoka galduma uudaa woddan.

7 Ha’noonna aro’uwwi, soodachcho ha’nooxxi hoyyendabaashsha ha’nooxxe aruwwanni welti qalbeeffachchot mitteba hedhdhe; insa’nenna gophaaleeyyete kandeemmaxxeenna hedhotika badhaadha ha’nooni welti dhaalaammaxxee insa’ne ulfeesse.

9 Mitteba huccinoole eloxxa la’o alfinammaxxee

mitteke kadati mannii’n lameke kada woyyan.

10 Lami giddii’n mitti iboole mitti ke’issaan;

iboole ke’issaaka afebaak kinni hitta yaadisaake manjo!

11 Lami welti diiphoole lamiingi eebbaan;

mitti qofitti dhiiphoole kinni hitta eebba?

12 Mitti manjichchi qofitti mitte manjichchinni lolemoole

injifataaxxinna hexxeen; yaane kinni lame manjinni lolemoole dande’abaan;

Sakka assine sirinbe ganneexxi wodaro kutendaba.

Eloke Adabixxa Are

10 Eloke adabixxa are ayyete ise dande’e alfa?

Iseki hiri fiixeeke kinjuwwi caala lumoo qico fiixxeexxe.

11 Aro’i iseki ise’e mitte godobinni amanaani,

hasissaaxxa yaane duuchcha isena’ni gophabaan.

22 Are aadheek eloxxe yaane alfe,

tinninna Duuchchi Woddik Gootti eloxxa isi’a asse hiyyote.

14 Minikinna karra hadokee’n dhaalaachcho,

qalbeeffachcho afeexxa are kinni uwwaak Duuchchi Woddike Goottan.

4 Qalbameette manjo aro’o ifike’e kallachchaken,

aro’o ifika shookishaaxxi are kinni micci giddo lullugaake luuxishshate.

18 Tennexxe muttaara atixxi are ati’a muummetike wode’e kaddemmaxxee,

ise’n gammad.

19 Ise ati’a eeyyemeeke meyyake gadansan; danchumma callixxe geedummashsha,

unun isek atee duuchchii wodda goddisowwaal,

jaalala isexxinna ate’e boojito’o.

Aadhanna Heeruma Uudaxxenni

1 Borreesitine qortineemmaxxe yaanexxee’e, manji melaaltibaa gamata gopheele* eloxxen. 2 Yaane kinni yabaabulletenaa’n gatatee’e mitti mitting manji ifi ifinixxa are afowaal; mitte mittendi melaallenna ifi ifinga aro’o affowaal. 3 Aro’i are ifixxee hasissaaxxa yaane duuchcha ise’a assiyyo hasissaan; iittanni aretinna aro’o ifikee hasissaaxxa yaane duuchcha isi’a assiyyo hasissaan.

4 Are ifike biso’ni baaloma afebaan, isike biso’n baaloma afe’eek iseke aro’on; iittanni aro’i biso ifike’n baaloma afebaan; isike biso’n baaloma affeexxi are isixxen. 5 Sooddachchote’n ciccatee’e weli aagine yannaate’e kaddoole malee, weli’aan weli hoyyexxinoqqe’e. Ifi heqqedhaa gophati duriis ha’no hega uudabaashsha haaroba mitteba hedhdhe.

10 Aadhe heerummeekeri’a uwwaanke kunni ajaji Goottiinke malee ankebaan. Are ifike aro’inaa’n gargar higgoqqe; 11 yaane kinni ise gargar higgoole heerendebaang hexxowwaal; kada gophphoole ifike aro’inni araarendowwaal. Iittanni aro’ikinna ifixxa are tikoqqe’e.

15 Yaane kinni amanabaak manjichchi yookaan manjichcho gargar higa haseexxe kaddoole gargar higowwaal. Iitte wodda aro’o kaddo are konne orinni usurremeeban; Magen no’o’o ye’eechchi nage’ik he’nonaaten. 16 Tee manjichcho; atika aro’o anjirtattoxxe hexxeen maa egendeettetaa? Yookaan koo manjichcho atixxa are akimagaada anjirtatoxxi hexxuun maagendetee?

2 Fakkeenakee, mitte heerundeexxi manjichcho ifike aro’inni seerik userendaak isi hedhoti hedhee qico’niten; aro’i isek reyoole kinni ookkone aadha heerumatike Muusek seerinaa’n tikende’een.

5 Reefi aadheek manji bagedo duuloqqe’e, isi wele huje hujoqqe’e. Mitte wogga’a hujebelo tolanga mine ifike’ni aadhemmaxxa ifixxa are gammachchisowaal.