1 Qaareehak belt Yohaanaani, Hoshayaak belti Azaaryaasini mitteba loliinki jaa'labuwwi duuchchi ittanni ardi duuchchi shixxokenaa'n lumokiqico'n shiqeexxi, 2 anee'e hineqic, «Atee'e kadhanta'enexxa yaane no'o'a assi Duuchchi Woddika Gootta atike Magenba'a no'o'a soodati; edo no'o heddo mannamman ta'a kinni uddaatteshshanni gante'ennek heenoken. 3 Duuchchi Woddiki Gootti atik Magen haba'a me'innannoxxa, maa assinnannoxxa no'o'n kulaashsha no'o'a soodati» hine. 4 Aninna insa'nee'e «Kadduun, hitineeshshanni Duuchchi Woddika Gootta ha'nooke Mageniba'a soodatannon; is ane'n hiyyeexxa duuchchanna mittetanna gatisebe'nong ha'no'n kulannon» hiyye hisse haaso'ene. 5 Insa'nenna ane'n hineeqic, «Duuchchi Woddiki Gootti atik Magen ati darree'n no'o'a hiyyaaxxa duuchcha muuxagonphonnole Duuchchi Wodik Gotti umi isingenin no'o'n dhugaatixxenna addatendeexxe naqaashe kaddowwaal. 6 Duuchchi Woddike Gootta no'oke Mageni'a ajajjemee'na'a eloxxi no'a kaddo'a, yaane no'o'a eldonna elannagophoole atee'e isiba'a erginenneka Duuchchi Woddika Gootta Mageno no'okee ajajjemmannon» hine.

7 Tomme barra uduma Duuchchi Woddik Goottik hiyyichchi ane'n dage; 8 tennexxee Qaareehaka belto Yohaanaaninna isinni welti hedhemmaka loliinka ja'laabuwwa duuchcha ittanni arda duuchcha shixxokenaa'n lumokiqico'n hedheeka ye'ennexxi: 9 Insa'ne'e hiyyeneqic, «Kadha ha'nooxxa isi edo shiqishona'a isiba'a anee'e ergitinemaki Isira'eelk Duuchchi Woddiki Gootti Mageni: 10 ‹Ha'no konne boga'n ofoldinoole ha'noo'o ijaaranno malee diigabe'no; ha'noo'o kaasanno malee goshabe'no; ba'ne ha'no'n iyyedagennexxee ani yaadeennen. 11 Ta'a konne sodaatina'neka Baabiloonika moyanjo sodaatinoqe'e; ani ha'no welti hedhenaxxee'e ha'no'o anjirannon; anga isixxenaa'n ha'no'o fulchannon; iso'o sodaatinnoqe'e. 12 Isi ha'no'a owe'eexxi boga ha'nokiba'a ha'no hisaashsha ani ha'no'a o'wannon.›

13 «Ha'no kinni ‹Konne boga'n ofolabe'no› hitineexxi Duuchchi Wooddike Gootta ha'noke Magen'a ajajema gibbinoole, 14 ittanni kinni, ‹No'o bagedo unda'be'noba yookaan malagata bagediinxe odoka lanqabe'nobanna soloi'winabe'noba Gibtsee boga me'inee ookko he'nannon› hitinoole, 15 ha'no koo, Yihudiinke boga'n hafe gatineeke arada, Duuchchi Woddiki Gootti hayya'nexxa laqqe. Dada Duuchcha ajajaak Duuchchi Woddiki Gootti Isira'eelki Mageni: ‹Gibtsee'a me'atee'e mudhdhitine'e ookko hexxino'a me'itinoole, 16 Sodaatinemake wolaantichinni ookkonni afendina; isixxee culphisinemmak solo'i Gibtsee qico'n ha'noo hordofe dagaan, ookkonna rertinaan. 17 Gibtsee'a me'e'e ookko hedho'a mudhdheek duuchchi wolaantichik, solo'ikinna dhukubik reyaan; ani insa'ne'n idaganoxxe ba'nenaa'n mittikinna midde gataak yookaan isenaa'n fulaak hedhabaani› hiyye. 18 Dada Duuchcha ajajaak Duuchchi Woddiki Gootti Isira'eeliki Magen: ‹Mufe anxinna bala anxi Iyyerusaalemi hedhammake duuchcha'n lolaatemmashanni, ittani Gibtsee e'yitinaa wodda bala anxi ha'no'n lolaataan; ha'nonna ce'mendinaake, uunde henkekki hinaake, yowwichchinkenna oso'lchchiinke beessisa kaddinaan; konne boonchonna langaxxa uuddinabaan.›

19 «Ha'no koo Yihudiinke boga'n gatineexxe hafe Duuchchi Woddiki Gootti, ‹Gibtsee'a me'itinoqqe'e› ha'noo hiyyeeni; aninna telcho ha'noo'o xexxe'achchiisaannexxa adda ege'ne: 20 ‹Duuchchi Woddike Gootta Mageni no'okiba'a no'o'a soodati; isi ate'n hiyyeexxa duuchcha no'o'n kuli; no'onna isi'a ajajemanoni› hitine'e Duuchchi Woddike Gootta Mageno ha'nookibaa anee ergitinee wodda hedho ha'nooxxa balleessaake dedha hujjineen. 21 Kunniseten ani telcho ha'non kulleneni; ha'no kinni Duuchchi Woddiki Gootti ha'nooki Magen anee ergee'naa ha'no'n kullennexxa duuchcha ajajendinebaan. 22 Yoona me'itineexxi hexxino'a hasina'neeke booncho'n bagediki, solo'ikinna dhukkubik rertinaaxxa ege'ne» hiyyene.