1 Yihudiink moyanji Sedeqiyaasi moyeexxe sallanixxe woggake tommike agenjo'n, Baabiloonik moyanji Nabukadanatsoori ifika sannachcha duuchcha bukki assedhe dageexxi Iyyerusaalemi'i buqe. 2 Sedeqiyaasi moyeexxe tommenna mittixxe woggake sholgake agenjixxe sallanixxe barra'n qachcha buqemmaki manni qachchiinka dalla'a enqe. 3 Iyyerussaalemi qachchi abidemeexxa yanna Baabiloonike moyanjik Ja'laabuwwi duuchchi: Saamigar naabo Nergaali, Shaaretser, umiink ajajalli Naboserisekimi, sooreessi ja'laabi Eergeeli Saraasarinna iittanni weli Baabiloonike moyanjk ja'laabuwwi duuchchi e'yeexxi oddotixxe bitumixxe baxxe'n bakka abixxe ofo'le. 4 Yihudiink moyanj Sedeqiyaasinna isik loliinki manni duuchchi insa'nee anfee wodda hashshati baanje moyanjiinke hiddichchiinke fichchi darree'n lame dalla'ixxe oddonaa'n qachchi giddi'n fule Araba'a me'ine.

5 Yaane kinni Baabilooniki loliinki manni udumii'n hordofe insa'ne shorre'e Iyyaarikoke diida'n Sedeqiyaasi; dhaqqabe abideexxi Hamaatike boga'n hedheeke Riblake qachcha'n Nabukadanatsoori'i Baabiloonike moyanjiba iyyemarre; okonna murte iso'n murende. 6 Baabiloonik moyanji konne Riblake qachcha'n Sedeeqiyaasixxa labbaxxa oose Sedeqiyaasi uda'naa'n insa'nee gorra'e; Yihudiinka Ja'laabuwwa duuchchanna shiye. 7 Ookkoneechchi udumi'a Sedeqiyaasixxa ille giddi'n fulchiseexxi, Baabilooni'a iyemarsiiso'a Sageetotike haachchabinni usursiise. 8 Baabilooniki manninna Sedeqiyaasika mootummatika minenna ardiinka minne giirat gube; Iyyerusaalemika dalla'anna diige. 9 Baabiloonka moyanjo heqqamake heqqanjuwwik ajajalli Nabuzardaani qachchi giddo gatemaka arda duuchchanna edisexxi anga isi'a uwwemaka duuchchanna mittenba booji'eexxi Baabiloni'a adhdhe me'e. 10 Karra affeebaxxa hiyyeeyye kinni kunni moyanjiinke heqqanjuwwik ajajalli Nabuzardaani Yihudiinke boga'ninni waaleexxi woyinetike hiddichchika fichchanna huccinaaka boga insa'ne'a uwwe.

11 Baabiloonik moyanji Nabukanatsoori ifike heqqanjuwwika ajajallo Nabuzerdaanii'i Ermiyaasixxee ajajje'e, 12 «Marte Ermiyaasii'i ifibaa aaxxettexxi eloxxen isoo uudi; haseexxa duuchcha isi'a muuxi malee'e isoo miitoxxe'e» hiyye. 13 Tennexxee moyanjike heqqanjuwwiki ajajalli Nabuzerdaani, ja'laabuwwiink sooreessi Nabusheezibaani, Ja'laabuwwiinki umi Nergaali Sharetseri, iittanni weli Baabiloonike moyanjik Ja'laabuwwi duuchchi, 14 manjo ergineexxi anee'e Ermiyaasii'i mootummatike minixxe baxxe'ni heqqanjuwwiinxe kuta giddii'n fulchinseexxi Safaaniki aka'i Ahiqaamik belti Godoliyaasi anke miniba iyyemarro'a anee'e maganne iso'n uune; aninna arda anki giddo ofo'lenne.

15 Ani Eermiyaasi mootummatike minixxe heqqanjuwwixxe baxxe'n usurii mine hedhenna wodda Duuchchi woddiki Gootti hiyyichchi ane'n dageexxi, 16 anee'e «Tophiyiichcho Abemeelekiba martettexxi Dada Duuchcha ajajak Duuchchi Woddiki Gootti Isira'eelik Magen, ‹Konne qachcha'n qananumate kadebaak idagonna'a hiyyenexxa ba'ne muuxannon; ookkone wodda atixxi ille uuddaa'naa'a tinni muxxendaan. 17 Ani Duuchchi Woddik Gootti kinni atee'e eettene barra gatisannon; sodaattatoke mannixxe anga'ninna sa'isende uwwendabexxon; 18 atee anjirannoni; ane'n addattettaxxee'e baaje'e lubbo hexxatto malee'e wolaantichchoke'n rertabexxon; tenne'e haaso'eneke ante Duuchchi Woddike Goottan› hiyyi» hiyye.