1 Ee, Duuchchi Woddike Gootta; yaane anixxa ati edo shiqishennek,

ati qullishshake kaddettexxa ege'na'needen;

Fuggaaleeyyetee yaane duuchchi qajeelda'neechchi mayeete?

Cubbaaleeyyetee galdumi elegopheechchi maayeete?

2 Ati insa'nee kaasseeten; insa'nenna hidda oltinne'en

nophphinee; gummanna gumminseen.

Duuchchi Wodda ate'e afo'i callinni ulfeessina'neen

qalbeti kinni atinni he'nebaan.

3 Ee Duuchchi Woddike Goottaa; ati ane'e egende'etten; uuddatteni;

ani ati'a afeenneka yaada memmekisse affaatten.

Dulokee adhdhine me'inammake gedhebishsha insa'nee oofi;

duliinxe barra qico'n qofin foyi.

4 Bogi xeena gophe gubata'neechchi?

Badda'a duuchcha bagge gattaaki, haani qico'nite?

Ookko hedha'neeke mannixxe fuggona'ni kexxeexxa

horkinna ci'uwwa kutti hiyyeen;

Ardi,

«No'o'ni kaddaaxxa uuda'nebaan» hiyye'en.

5 Duuchchi Woddiki Gootti hiyya'nee qici: «Gongaake mannin gongitee'na

insa'ne atee injifantoole;

fadhado gulufaake manninni welti hitta hokkokisa dandeetatto?

Nage'ii boga'ni dandeette uurra gophphottole

Yordaanoosike gongomi giddo hitta uuritatto?

6 Dayyuwwi atikinna atiki mini hadi,

insa'ne midde ate'ni fuggoxxinni

ate'n cancinna'neen;

Eloxxa atixxa haasonoolenna midde

insa'ne addattoxxee.

7 «Mine ankanna karra anixxa wocci asse waaleennen

anka qadaada hunanno;

Eeyyaannexxa iseen;

naaphiinxe anga'ni sa'isse uwwannon.

8 Anke geego kadeeki ardi anki, badda'ate'ni hedheeke neenqishsha

ane'ni ke'e;

Ane'ni raaren;

tennexxee isoo gibennen.

9 Anka geego wele joluwwa,

itto'a buqqeexxe,

ciichcho kaddeeba?

Martine; biniichchuwwa duuchcha bukki asse;

insa'neenna itto'a iyyedagge.

10 Heddo allalisano anixxa woyinetike hiddichchika booncho balleessite'en;

fichcha ankanna hirbeessineen;

Ani gammadannaka boga anka,

urmake assinaan.

11 Ani edo urma,

qiilla gammoojjenna onake kade gataan;

Iikki bogi duuchchi gongomake kadaan;

konne bogi'a mittikinna aane'e hiyyaaki hedebaan.

12 Qilla gammoojje'ni hedheeka uruma tuluchchuwwa,

balleessaaki manni dagaan;

Duuchchi Woddiki Goottiki wolaantichchi kasa bogiikenaa'ni kasii qico'ni;

mittekanna gatisebaang biraan;

gataakinna hedhebaan.

13 Dinne wiilse'naa'ni ute haa'minaani;

yo'oshsha eloonnani alifinaachchi kinn hedhebaan;

Duuchchi Woddike Goottixxe jabaxxe mufenaa'ni kexxeexxa

midha baxxemmaxxee shookkinaan» hiyye.

14 Duuchchi Woddiki Gootti hiyya'nee qici, «Arda anke Isira'eeli uwweennaka geego abidaaka fuggoka insa'neka olla'a duuchcha; boga insa'nekenaa'n shorrannon; Yihudiinka arda insa'ne giddii'ni fulchannon; 15 Bogii'n fulchennechchi uduma kinni haaroba'a gattowwaal hiyyannon; duuchhcinga arda ifi ifike bogibaanna geegiba idagee hiissannon. 16 Anke ardika me'injo baranteelenna arda anka Ba'aali hiyyemake magenuwwike summinn kakachchiisemmashshann, ‹Hedhaaki Duuchchi Woddike Goottike summin› hine anke summin kakantoole; ookkone wodda anke ardi giddo he'naashsha assannon. 17 Ani hiyyaannexxa laqabaaka arda kinn mitti gatebaang shorrannon bakka isexxa balleesaannon» hiyya'neen Duuchchi Woddike Gootti.