1 Duuchchi Woddiki Gootti hiyya'neeqic, «Yihudake mootommatike miniba'a adadde dirrite erga konnechchi butti'a hexxeexxa hite'e haasottattoqic, 2 ‹Daawwitixxe moote'n ofoldetteke, koo Yihudake moyanjoo, atinna ja'laabuwwi atikinna konne bituma'n e'yaak atik ardi duuchchi Duuchchi Woddike Goottika hiyyichcho laqqe. 3 Duuchchi Woddiki Gootti hiyya'neeqic, dhugaanna qullumma hujje; mulqemeeka miicemmakixxe anganaa'n gatisse; keessummumma ofo'leeka manjo, anna ama affeebaaxxa oosenna aro'o shi'witeexxa melaalle miicinoqqe; rakkissinoqqe; konne booncho'n balleessa afebaake manjixxa munde dundinoqqe'e. 4 Ha'no'o konne ajajuwwa xexxe'achchoti heqqexxinoole, Daawwitixxe moote'n ofo'laak moyanjuwwi fadhadinxe gaare'ninna fadhadoke'n ofo'leexxi, ja'laabuwwi insakinna ardi insa'nek insa'nee'e qoqobee'na'a konne mootomatike minike bitumiba'a e'yina'nee'e fullaan. 5 Yaane kinni konne ajajuwwa heqqedha gophphinoole, kunni mootomatik mini findigemaaxxa ani Duuchchi Woddik Gootti ifi'n kakate'eennen› hiiyye'een.»

6 Tennexxee Duuchchi Woddik Gootti Yihudake moyanjiinxe mootomatike minixxee hiyya'nee qici:

«Ati Gele'adishshanna

Libaanoosixxe koobuwwaxxe xungoshsha ani'a danchondottolenna,

Dhugaaten, ani atee'e qiilla gammoojje,

manji giddo hedhammabaake qachchuwwishsha atee'e assannon.

7 Atee'e balleessatee mitti mittingi lolinka miya abixxeeka manna,

ate'n dagaashsha assannon;

Insa'nenna danchoole atika birbirsinka haqichchuwwa kukkuntee

Giirate'n takki assinaan.

8 «Heddo gosa gosak ardi ookkone qachchibaa'n sa'aa woddaa, ‹Duuchchi Woddiki Gootti konne lumoke qachcha'n mayee iitta asse?› hina'n weli'a weli qorraan; 9 Insa'nenna ookkonechchi uduma, ‹Insa'ne Duuchchi Woddike Gootta ifike Magenixxa kako waalleexxi wele dharichcha magenuwwa magenooffanteemmaxxeenna ergatemmeemmaxxeten hinaan.› »

10 Illeema higa gophammaxxee

yookaan langaxxa ilemeeka boga uuda gophammaxxee

Booji'emeeke moyanji'a hiiqqissine oodhdhe malee'e,

reyemmakee'e ooxxinoqqe'e; yaaddinoqqe'e.

11 Anxe bakka'n Yihuda'n moyemmake, konne boonchonaa'ninna booji'eme adhdhememmake, Shelumi Iyyosiyaasik beltixxee Duuchchi Woddiki Gootti: «Isi kaba'a illeema higabaan. 12 Booji'eme me'emmake boga'ninni reyaa malee'e langaxxa konne boga uudabaan.»

13 «Ifika mootomatika mine seeribeloke orinni ijaadhdhake,

ifike mini hana mine seerbelo ijaadhdhake,

Tola boddichcha manjo hujisaakee

elo'emmake mannika hira uwwabaake isi'a aanne'e!

14 ‹Ani ba'lalamma

kutuwwaka mootomatika mine hana ijaadhdhannon hiyyaake isi'a aanne'e!›

Isi ba'lallamma maskootuwwa mine okkone'a giissaan;

ejersinke haqichchinni danchoossaan;

diimmoxxa boo'enna itti issaan.

15 «Ejersiinke haqqenni mine ijaadhdhitettexxee'e

mootattochcho ate'n labbee?

Anni atik dhugaanna qullumma hujeemmaxxe

itaachchinna ha'waachchi isinaa'n xe'yeemma'a?

Tenne asseexxee duuchchinx isa'a qajeelda'emman.

16 Isi hiyyeeyyeteenna rakkiyyetee dhugaa mureen;

tennexxee duuchiinxi yaane isi'a qajeelde;

Anee ege'nate hiyyo tennetebaata?»

hiyya'neen Duuchchi Woddik Gootti.

17 «Yaane kinni Ille atixxi uuda'neexxinna godobi atik halcha'neek

dabik la'o alfatee'e

Balleessa afebaake mannixxa munde dunati

manjo miicanna miidha calla'aten.»

18 Tennexxee Duuchchi Woddiki Gootti Yihudaka moyanjo Iyyo'aaqemii'i Iyyosiyaasike beltixxee hiyya'nee qici:

«Manni ‹Woo woo, anke dayyoo! Woo woo, anxe dayyoo!›

hiyye'e isi'a oodhabaan:

‹Woo woo, anke gootta! Aanne'e isixxe moyanjumma'a!›

hine'e isi'a oo'nabaan.✝

19 Isi rerteexxe harreshsha harkisemeexxi Iyyerusaalemike dalla'i gadhi darre hunemaan.»

20 «Koo Iyyerussaalemike arda Libaanoosi hana martine raarre;

hafuura gikki assitine'e Baasani giddo hunbaashshe,

Abaarim hexxinenna raarre;

jaaluwwi ha'nok duuchchi mude'een.

21 Nage'ik hexxinnemma woda ani ha'noo xexxe'achchiisenne;

ha'no kinni, ‹Lanqabe'non› hitine;

Oosummadenaa'ninni safe ori atiki konnedemman;

hiyyichcho ankanna laqqeebexxon.

22 Akeekisanjuwwi ha'nok duuchchi diidallo adhdheemman;

huura adhdhite me'itammashsha booji'emee adhdhemaan;

Ha'noxxe fuggoxxe huje duuchchinaa'n kexxeexxa

shookkinaan; salphattinaan.

23 Koo ha'no ‹Libaanoosi› giddo hexxina'neeke,

galduminxa bakkanna ejersinke haqichinni ijaadhdhitine'eekee

Ciniinfattammaxxe manjichchoshsha,

rakko ha'no'n daggaa wodda hitta raartinuta!

24 «Ani hedhaanneke kada anxe'ni kakaatannen» hiyya'neen Duuchchi Woddik Gootti, «Yihudake moyanjo, Iyyo'aaqemike belto, Ikooniyaa, dhugaa'a anee'e hedhannoke Duuchchi Woddik Goottixxa! Ati anxe middixxe angaxxe qube kaddeettelenna midde, atee fulchee hunanno.✝ 25 Atee'e shiyo'a hasa'neekenna insa'nee'e sodaata'etteke Baabiloonike manna'inna Nabukadanatsoori'i Baabiloonike moyanjiinxe anga'n sa'isse atee'e uwwannon. 26 Ateenna atee ildeexxa ama ilendinebaake wele boga'n fugussee'na'a ha'no laming okko rertinaan; 27 Higgino'a halchitinammake bogiba'aanna ijje higginabaan.»

28 Kunni Ikooniyaan hiyyemeek manjichchi rerte jibbendeexxe oddolchooshsha

ayyinna iso'o hasabaake miya is?

Isinna oose isixxi mayeete gadhi'a hunnemeechchi?

egennebaake boga'n mayeete darbemmeechchi?

29 Tee buttaa, tee buttaa, tee bauttaa!

Duuchchi Woddiki Goottika hiyyichcho laqi!

30 Duuchchi Woddik Gootti hiyya'neeqic,

«Konne manjixxe hortenaa'n mittekeenna qajeeldabaak,

mittekinna Daawwitixxe moote'n ofo'labaake

Yookaan Yihudaka boga mowe galchaaka afebaake kademmaxxe'e

isi hedho isixxike baro duuchcha'n yaane isi'a qajeeldebaake

middisa manjon hitine borreesse.»