1 Bangetixxee Ermiyaasi'ni Duuchchi Woddiki Gootti hiyyeeki hiyyichchi konneechchinn butti'a hedheeken:

2 «Yihuda oodhaan;

qachchiinki ardinna waye uudaan;

Buttinake'ni ofo'le wiigaan;

raare Iyyerusaalemii'n gadho laqisse.

3 Hayyoole erganjuwwa ifika wede'e hasso'a ergitaan;

insa'nenna wodi'inexxe baluwabaa adadde me'inaan;

Yaane kinni wode'eng hinaachcho affabaan;

Shoonkenna godoba kultineexxi

haguuqineteexxi

duwwixxa odolcho adhdhine hingaan.

4 Bogake'ni xeeni hedha gophemmaxxee,

buttini lameba hashakki hiyyeen;

Wiisalluwikinna shooke,

haguuqqe hangulli hiyye'en.

5 Badda'atixxe gophenshanaa'n kexxeexxa,

golji midde,

ileexxa beltanjo diidi giddo hune me'aan.

6 Diidi giddixxi harre uruma tulluchuwwa'ni uurrite,

jeedaluwinsha raartaan;

Arso hedha gophphemmaxxee

illetinna garjiteen.»

7 Koo Duuchchi Woddike Gootta atenaa'ni baanje turreennen;

ate'ni jallineennen;

Cubbo no'o'ni birasaxxe no'o qoxxi assitoolenna midde,

summa atingee hite no'o gargaar.

8 Ati Isira'eelixxi adde;

rakkoti woddanna isexxi anjira,

Mayee bogake'ni alagiinsha,

yabaabulto manjoshsha orimalchoke kaddaattee?

9 Dommi hiyyeeke manjishsha,

wodatee hunna gopheeke lolii manjishsha kaddaatte?

Ee Duuchchi Woddike no'oke Gootta ati no'oninni hexxetten;

atinge summinni ye'emmennen;

ballo'o no'o'o waaldoxxe'e.

10 Duuchchi Woddiki Gootti konne ardixxee hiyya'neeqic,

«Doonsa kiyya hiyya yo'oshsha eena'neene,

me'ine gonphabaan;

Tennexxee Duuchchi Woddik Goott insa'ne'ni gammada'nebaan

balleessa insa'nexxa qaabbataan;

insa'nexxe cubbo'a insa'nee'e xixaani» hiyye.

11 Duuchchi Woddiki Gootti ane'e hiyyee qici,

«Konne ardixxee ane'ee soodatoxxe'e; 12 Agabo goddo honsoolenna insa'nexxa oodhishsha laqabe'non; ciincatika tolchanna kaddi midhatika tolcha shiqinshoolenna insa'nenaa'ni adhdhabe'non; yaane kinn wolaantichchik, solo'ikinna dhukubik mundaashsha assannon» hiyye.

13 Aninna, «Koo, Duuchchi Woddike Gootta waabeeko ‹Wolaantichcha uuddinabaan; solo'i hedhabaan duuchchi woddika nage'a ha'no'a uwwannon› hiyya'neen; hinaan» hiyyeennen.

14 Duuchchi Woddiki Gootti anee'e hiyyee qici; «Waabeeko anke summin dhariinka raaga rangaan; ani insa'nee ergabe'non; insa'neenna ajajeebe'non insa'ne'ni midde haaso'ebe'non. Dhariinxa waleellanna moro woyi fulabaaka haaso'anna godoba anfeeka ifi ifika yaada insa'ne'a lalanbaan. 15 Tennexxee anke summinni dhariinka raaga raaga'neexxe wabeeko'a Duuchchi Woddiki Gootti hiyya'nee qici, ani ergebe'nongi ‹Wolantichikinna beeli konne boga'n dagabaani› hita'nexxi tinn wabeeko wolaantichchikinna beeliki muddaani. 16 Raagi insa'ne'a kulemeemmaki ard wolaantichchakenaa'ninna beelakenaa'n kexxeexxa Iyyerusaalemi giddo hedheeke oruwwa'n renshi insa'neki ibaani; insa'nenna aruwwa insa'nexxa yookaani labbaxxanna meyyaxxa oose insa'nexxa moogaaki hedhebaani. Balleessinemmaxxe qixxe'n insa'ne xixannoni.

17 «Konne hiyyichcho insa'ne'n hite kuldatto qici:

« ‹Duuddo dubaarichcho anki ardi,

jabaxxe midhenshanni,

Jabaxxe mada madoottemmaxxee

ille anxi hashsha barra

urrissebaangi indiddo dunaa'ennen.

18 Hadi giddi'a maranno wodda,

wolaantichchiki shiyeme'eke mannika rensha uudenneni;

Qachchi giddi'anna e'yanno wodda solo'we shaqqee ibeeka afenneni;

Wabeekichchikinna qeesichchi,

Egennebaake bogibaa'a baanjeeni.› »

19 Yihuda'a harange gibbette hiyyote'e?

Tsiyoonik jibbitetteshshann gattetteni hiyyote'e?

Fayyinabe'noqico'n,

mayee fuggo no'o gandette?

Nage'a alfinannon hine'e addantee'naan;

kaddo malee'e eloxxa yaane alfineebe'noni;

Foora alfinanon hine'e heqe'nenneni;

yaane kinni ruphphi calla kadde.

20 Koo Duuchchi Woddike Gootta balleessa no'oxxa egenneenneni;

edike no'oke annuwixxa balleessa kassi hineenneni;

dhugaaten, ati edo cubbo hunjeenneni.

21 Summa atingee hite'e no'o tuffattoxxe;

ulfinninxa atixxa moote salphissoxxe;

No'o'a aagetaxxa kako qaabbati

male'e diiggoxxe'e.

22 Gosa gosake woyyi fulabaake dharichchuwwa magen giddii'n xeena gansiisa dande'aaki hedhee?

Iimatinna fedhii ifixxinn kiifo gansiisa dandeetta?

Waawwoti! Dandeettabaani; Duuchchi Woddike Gootta no'oke Mageno;

tenne duuchcha assitattoki atenden

tennexxee adde no'oxxinna ate'niten.