1 «Koo Biniyaamike arda; fuggoxxi yaane,

jabaxxi ba'nenna middii'n dedhanga daggammaxxe'e,

Iyyerusaalemi giddii'n fuldine baajje;

Teqo'a qachchi giddo malagata ufuuffe;

Beetihakaaremi'ninna giddonna lolinka beessisa iimi'a abidde.

2 Eeyyemekanna shaggichcha

Tsiyoonika qachcha balleessannon.

3 Allalisano ifika hore ookko'a adhdhite idagaan;

isi qarqaranna dunkaanne oltitaan

mitti mittingi ifi ifika hore hedhemma darre'n ise'ni.»

4 Insa'nenna «Iyerussaalemi'i lollona'a qopheeffanitto;

ke'wee! Barra banteessa lole'e ise'e miino;

Hoola abbo! Bogi hashsheeqqa!

gaaddiddotinna qeerrexxa'n me'ite'een.

5 Yoona ke'weta hashsha lolle miino

kinjiinka iseka dalla'uwwa diingo!»

6 Lumok Duuchchi Woddiki Gootti hiyya'nee qici,

«Haqichchuwwa woxxe;

Iyyerusaalemike qarqara'ninna buttina tullubbe

Konne qachcha'ni miicami bira sa'eemmaxxe'e;

mura woxxowwaal.

7 Bale giddii'n wodi'i burqammashsha,

Iyerussaalemi giddii'n fuggoxxi yaane burqitaan;

Xaqarotinna ba'ne ise giddo laqendaan;

isexxi elagonphenna mada duuchchi wodda ani edo leellitaan.

8 Koo Iyyerusaalemike arda;

xexxe'achchiisa anxa adhe kada gophphoole dudduro ha'noo'n wirri hiyyannon;

Ayyinna iso'n hedhabaa qico'n;

qachcha ha'nooka qiilla gammooje asse; onchannon» hiyye.

9 Lumok Duuchchi Woddiki Gootti hiyya'nee qici,

«Woyinetixxa gumma feshshilende qocendammashsha

Isira'eelinaa'n gateeka manna ittan feshshillaan.

Woyine qocammake manjishsha;

anga atixxa higgeeni isexxe damuwwabaa'a diriirs» hiyye.

10 Ayye'ni haaso'anotaa? Ayyee'e xexxe'achchiisannotaa?

Ayyete anixxa laqataa?

Kunnisete ani hiyyaannexxa lanqabaasha,

insa'nexxi manshsha duuddoten.

Duuchchi Woddike Goottike hiyyicho'ni qacifanta'neen

iso'ninna gammanda'nebaan.

11 Insa'ne'ni hana Duuchchi Woddike Goottixxe mufenni ani wo'meennen;

ifi giddo uggudhdha dande'ebo'non.

«Orake'ni hexxeexxe oose'ni,

mitteba bukki hiteexxe dargageeyye'ne hana mufe anxa dhangalaasi;

Arenna aro'ikinna,

cindeexxi geedhenna cimme bo'lo'leekir baaje fulabaan.

12 Bogi konne giddo hedha'nekera'ni,

anga anxa wirri assanno wodda

Fichchi insa'nekinna aruwwa insa'nexxi gattebang

minuwwi insa'neki wele mannike kadaan»

Hiyya'neen Duuchchi Woddik Gootti.

13 «Lumokenaa'ni shiixxoki qico'ni hedheek duuchchi

la'o ifixe'e diipho gopha'neen;

Raagolettinna qeesoletinna gattebaang

duuchchingi sobaalessaken.

14 Anke ardixxa mada sholinshe uunde'en;

fayyitaashanna seeriki dhukkunsisebaan;

Nage'i hedhebaangi,

‹Nage'aaken, nage'aaken› hinaan.✝

15 Tenne xireeffachchisa'neexxe insa'nexxe hujexxe'e;

meya shoonke'e? Waawwo haranga shooko anfebaan,

shookonge hinaachchi maachcho kadeexxa midde egennebaan;

Tennexxe'e labbakeerinn welti inbaan;

insa'nee xixanoxxa yanna salphantaan»

hiyya'neen Duuchchi Woddik Gootti.✝

16 Duuchchi Woddiki Gootti hiyya'nee qici:

«Weldeennate'ni uurritine uudde;

elokanna olmika ora qodhdhe;

Iso'ninna me'we.

Lubbo ha'noxxi hafuura adhdhitaan;

ha'no kinn, iso'ni ‹Me'inabo'no› hitineen.✝

17 Ha'noo heqqaaka manna uggennen;

‹Malagatakanna ufuunfa wodda laqqe› hiyyeen

ha'no kinn ‹Lanqabo'non› hitine.

18 Tennexxee koo gosa gosake arda laqqe;

ha'noonna koo dhugaa kuldinaake manna

mayi insa'nenn dagaaxxa hubatte.

19 Tee butta laqi;

insa'ne hiyyichcho anka laqa gonphemmaxxe'e

seera ankanna tuffantemmaxxe'e,

Konne arda'ni ifike yaadika hira,

ba'ne insa'ne'ni idagannon.

20 Saabake boga'ni hixaana;

fishshitaaxxa shuuta shufuruwwa bayyike boganaa'n idangoole,

maa la'o ani'a uutaa?

Ha'noka ciinco'aaka tolcha adhdhabo'noni;

weli ha'nook tolchuwwinna anee'e gammachchisabaan.»

21 Tennexxee Duuchchi Woddik Gootti hiyya'nee qici:

«Ani konne ardi edo guggufachcho uggannon;

annuwwikinna labbaxxi oose mitteba, iso'ni guggufantaan;

olla'uwikinna jaaluwwikinna mundaan.»

22 Duuchchi Woddik Gootti hiyya'nee qici:

«Kunnise loliink manni,

middike boganaa'ni dagate'ni hedheen;

Buttatixxe gabalanaa'ni,

lumok gosa gosatik ardi qophpheeffatate'ni hedheen.

23 Gabetanna bagedo abixxe'eken;

godoba jabakenna mararte afebaake mannanni;

Fadhado insa'neka gulunfaa wodda;

hirbi abaayatike danbala'ike luuljishshaten;

Tee Tsiyoonixxe belto, insa'ne duulokee qophpheeffanteexxi

atee lollo'a dangaan» hiyye.

24 Iyyerussaalemike ardixxe'e oddo lanqenneni

hirre no'oxxinna lo'o hite'en;

Ciniifatta'nexxe manjichchoshsha

wixixxi hine rakkantenne.

25 Naaphi wolaantichcha ka'le'en

booncho booncho'ninn weekenisha hexxeen

Tennexxee gadhi'a fuldinoqqe;

orake'ninna marendinoqqe'e.

26 Koo anke ardaa; dooniya oddo'witine;

bululoke'n gangalatte;

Mitte belti'a oodhammake mannijjisha

hiiqqise oodhdhe;

no'o biraaki dedhange'ni no'o'n dago'aten.

27 «Sibilji hega uudemammashsha,

anike ardika oranna,

Me'injo insa'neka hega uuddatoke,

atee hegiinke asse'eennen.

28 Insa'ne duuchching hametee'e mammaremammake,

jabake xaqartichcha mannan;

Baaldudiinke sibilo kade'eeke,

adabi elobaakike mannani.

29 Irsaasete hiyyemaaka sibilo baqisate,

finiinaashsha jabaqicinni buufe;

Fuggaaleeyye fugussende luqqi hiyya gophemmaxxe'e,

baqisama insa'nexxi toliinxe eloni.

30 Duuchchi Woddik Gootti insa'nee tuffateemmaxxee

insa'ne hunemeeke birretike sibiljo hiyyemaan» hiyye.