1 «Iyyerusaalemike oruwwa'ni amme fulle; alalle adadde dirre;

qarqara isekanna to'atine uudde;

weldeenna weldeenna isexxe'ninna hasse

Dhugaa harsaakanna qajeelummati me'aaka,

mitte manjo midde affinoole,

ani konne qachchi'a gattowwaal hiyyannon.

2 Iso'n ‹Hedhaake Duuchchi Woddike Goottixxa!› hinoolenna,

kakanta'neek dharikiten» hiyye.

3 Koo Duuchchi Woddike Gootta ille atixxi isi dhugaa uuddaaxebaata?

ati insa'nee'e gandetten; insaa'nenni kinni mitteelchonna labbebaan;

Insa'nee bulleessite'etten; insa'ne kinni jiila gibe'e itti jabaante malee'e;

aadde aaganna hanseba'a.

4 Aninna godobi giddo; «kunni manni hiyyeeyye yookaan boose'akenna;

gowooleyyeten;

Duuchchi Woddike Goottika oranna,

Mageno insa'nekika seera ege'na gonphemmaxxeten.

5 Tennexxee akeekisanjuwwinba marennexxi;

insa'ne'ninna kulannon;

Dhugaandinn insa'ne Duuchchi Woddike Goottika ora,

Mageno insa'nekika seera egennaan» hiyyenne.

Yaane kinn insa'nenna ookkonerishshanni Duuchchi Woddike Goottike baalloomatike qanbar hundii'n baanjeexxi;

usurra isikanna tanshe'ne'een.

6 Insa'ne lumo qico jallantemmaxxe heddolenna finqilleemmaxxee;

gongom giddi'ni yayye fulde insa'ne bubbuttaan;

Leemmi hiyyaaka manjo duuchcha ninnifate'e;

qeedhanchi qachchuwwi insa'nekika qarqar harqaani;

Xaqaro insa'nexxi jabaxxe,

waakino insa'nexxinna heddoten.

7 «Eega, hitta ani gattowwaal hiyya dande'anno?

oose atixxi ane'e waalde'en;

dhugaatika Mageno kadebaake magenuwwike summinni kakante'een;

Goddine hee'e hinnaa qico'ni insa'ne itise ha'wisennen;

insa'ne kinni yabaabullete'ni hingeen;

maallaqake ifi gurgurtammaxxe melaalleke mine'ni yaannen.

8 Falemeeke labake kormi fadhachchi meyaaxxe himimmisammashsha

mitti mitting annafeexxa are yorre'e isenni qili'mise.

9 Tenne yaanuwwaxxeri'a ani insa'ne'e xixabo'noota?»

hiyya'neen Duuchchi Woddik Gootti.

«Ani ifi'anni iitta hedheeke gosa gosake arda'ni

halo fulabo'noota?

10 Anke ardike woyinetika hiddichchinke boonchchiba'a martine balleesse;

yaane kinn woyinetika hiddichcho hara songate assitinoqqe;

Kunnichchi Duuchchi Woddike Goottixxe kada gopheemmaxxe'e

damuwwa isexxa cirtine birre.

11 Isira'eelikinna Yihudak ardi

haranga ani'a addatema gopheen»

hiyya'neen Duuchchi Woddiki Gootti.

12 Insa'ne Duuchchi Woddike Gootta'ni dhara haasonna'n;

hineeqicinna, «Isi mittelchonna assabaan!

Fuggoxxi no'o'ni geltabaan;

wolaantichchakanna solo'o uundabo'non;

13 Raagolettinna haaso'i diiddalloten;

haasonnaaxi duuchchi dharaken;

hineexxi duuchcha insa'ne'ninn higgowwaal» hine.

14 Tennexxee lumok Duuchchi Woddiki Gootti hiyya'nee qici:

«Ardi iitta haaso'emmaxxe'e

afo'o atike'n hiyyichcho anka giirate,

konne ardanna haqqete assannon

giiratinna insa'nee ittaan.

15 Koo, Isira'eelike arda,»

hiyya'neen Duuchchi Woddiki Gootti:

«Bayyii'ni gosa gosa arda ha'noo'ni ha'no'o lolaaka iyyedagannon;

kunni ardi qara hedhekenna jabake,

isika laagada ha'no egendinebaake

haaso'a isikanna ha'no qalbeeffatinabake ardan.

16 Gabe insa'nexxik gonofi haani hiyyeeke hiyyeerishshaten;

insa'ne duuchching jajjabba loliinke mannani.

17 Insa'nee atixxa fichchiinxa midhanna aassitetexxa midha inde kutti assinaan;

labbaxxanna meyyaxxa atixxa oose birraan;

Gedhebokanna lalo atika kutti assinaan;

woyinetika hiddichuwwanna balasetika haqichchuwwa kurbi asinaan;

Addateettaka kinjiinke dalla'ikka qachuwwa wolaatichchik balleessaan.

18 «Kaddo malee'e, ookkone baro'n midde» hiyya'neen Duuchchi Woddik Gootti: «Ani ijje ha'nooxxa birannon. 19 Ardi kinna ‹Duuchchi Woddiki Gootti no'oki Magen tenne duuchcha no'o'ni asseechchi mayeete?› hiyye qorroole ‹Anee'e, waaldineexxi ha'noke boga'ni annaffeeka magenuwwa magenooffantemmashanni, ittann ha'noke kadebange boga'ni annaaffee manni'a hujinaan hiyya'neen› hitatton.

20 «Ya'iqoobixxe horte'n tenne kulle;

Yihudake ardi'anna lallabbe.

21 Ha'no ille affineeni affinabaak;

manisha affineen laqqinabaaki,

gowwoolenna qalbeeffatinabaak manni hiyyanexxa laqqe.✝

22 Ha'no anee sodaattinammabaa?» hiyya'neen Duuchchi Woddik Gootti;

«Ha'no ani edo culphisa hasissabaata?

Duuchchi woddi'a saxxe me'itabaashsha,

maancha abbayatixxe gabala assenneni;

Danbala'i isek guule dage ganemoole ookkoo'n sa'abaan

luuloolenna iso'o qaxxaamurabaan.✝

23 Kunni ardi kinni finqileekanna jajjalcha godoba afe'en;

anenaa'ninna udumi'a hige me'eedheen.

24 Insa'ne godobi ifiki giddonna;

‹Edikanna udumika xeena yannate'n uwwaaka

Mayetanna yannate'ni no'a iyyedagaaka,

Duuchchi Woddika Gootta no'oka Mageno sodaanto› hinebaan.

25 Balleessa ha'nooxxi tenneera ho'nonaa'ni gatisse'een.

Cubbo ha'nooxxinna elolla yaane alfitinabaashsha hoyyite'en.

26 «Anke ardi giddo fuggoke manna hedheen;

insa'ne'e ci'a fonxoroti abidammake mannishsha

fonxoro farri asse manjo abidammake mannishsha rinphaan.

27 Ci'uwwa giddo wo'miteeke ci'atike minishsha;

saamelchinn mini insa'nek wo'maken;

Insa'nenna dureeyyetenna hunaameeyyete kandeeni.

28 Insa'ne furdante'en cululunqeen,

Insa'nexxi fuggonna tennete hinaaxxeban;

annanna ama afebaake'e seera heqqinsebaan;

rakkiyyetenna dhugaati murte murrebaan.

29 Tenne yaanuwaxxerata ani insa'nee xixabo'noota?»

hiyya'neen Duuchchi Woddik Gootti.

Iita hedheeka gosa gosatika arda

ani umo anigeninn halo fulabo'noota?

30 «Sodaachchisaxxinna alalshitaaxxi yaane,

konne boga'ni kadde'en:

31 Wabeeko dhariinka raaga raaga'neen;

Anki ardinna iitta hexxeexxa yaane eeyaan;

egedhi muuxamiinxi yanna geltaa wodda maa assitinutaa?»