Eermiyaasikaa Raaga 47

Filisxeemike Ardixxe’e Kulemeeka Wabeekumma

1 Feri’oon Gaaza’a loli injifateechchi edo, Filsixeemike mannixxee Duuchchi Woddiki Gootti wabeekichcho Ermiyaasi’ni haaso’eek hiyyichchi konneechchinn butti’a hedheen;✝47:1 Isa. 14:29-31; Hiz. 25:15-17; Iyu. 3:4-8; Amo. 1:6-8; Zek. 9:5-7. 2 Duuchchi Woddiki Gootti hiyyee qici:

«Kunse, middi darre’n wodi’i wo’me,

jabake lola’a kadaan;

Bogakanna bogi giddo hedheelcho duuchcha

qachchuwwa konne giddo hedhemmaka arda duuchcha buqaan.

Ardikinna hafuura gikki asseexxi raare dhanga ganaani;

buttate’n hedheeki manni duuchchi woo woo hiyya’n hiiqqisan.

3 Fadhaduwwiinke hirbanaa’n,

naaphinxe fadhadiinxe gaaruuwwatik hirbinna gaaruwwatixxe

mole weli rigematenaa’ni kexxeexxa,

Annuwwi ifixxa oose gargaro’a udumi’a wirrinna hiyyabaan;

anga insa’nexxinna jimoote gattaan.

4 Filisixeemika manna duuchcha biratee’e;

reyotenaa’n gate insa’ne’e gargara’neekara duuchcha,

Xiroosinna Sidoonii’n gatisate’e kutemme gantaaxxi,

barra shiqe’en

Duuchchi Woddiki Gootti Kafitoor qarqaara’n gateekara; Filsixeemika arda biro’a ke’edheen

ke’eedhen.

5 Gaaza yaadeti umo haaxitaan,

Asiqeloonna afo’o abixitee sammi hitaan.

Tee Medaammaxxe dhooqa giddo hexxettexxe Tirrufaan:

haani qico’ni biso ha’nooka hoqooqqexina’nesi?

6 « ‹Koo, Duuchchi Woddike Goottike wolaanticha› sammi hiyya,

‹gopha atixxi haanqici’ate?

Gonofi giddi’a higgettexxi;

sammi hite haafura adhdhite ofo’li› hitinaan.

7 Yaane kinni Duuchchi Woddiki Gootti Asiqeloninna abbayyatika qarqara,

lolaashsha isi ajaja uwwaa wodda,

Muuxaashanna ajaja uwwaa’na

habaa’ni sammi assissa?» hiyye.