1 Yihudak moyanji Iyyosiyaasik belti Iyyo'aaqemi moyeexxe sholgaxxe wogga'n Duuchchi Woddike Goottiki hiyyichchi anee'e Ermiyaasi'n dageexxi, 2 «Mirqisanjo maxaafa aaxxettexxi, Isira'eelike ardixxe'e, Yihudake ardixxeenna wele gosa gosake arduwwixxee, ani ate'ni haaso'ate'n ke'eennexxe Iyyosiyaasi moyeexxe yannanaa'n telchi qico'n ani ate'n haaso'enneka hiyyichcho duuchcha isi giddo borreessi. 3 Akimagaada Yihudaki ardi ani insa'ne'n iyyedagonnaa heddennexxa ba'ne duuchcha laqeexxi, mitti mitting elobaake ifike orinaa'ni illeema higaaxxe hexxeen; aninna fuggo insa'nexxanna cubbo insa'nexxa gattowwaal hiyyaannon.»

4 Tennexxee Ermiyaasinna Neeryaka belto Baarookii'i ye'e; Baarookinna Duuchchi Woddiki Gootti haaso'emmaka hiyyichcho duuchcha Ermiyaasi kulaa'na'a mirqisanjo maxaafa'n borresse. 5 Eermiyaasinna Baarooki'n hiyyee qici, «Duuchchi Woddike Goottike Galmi giddi'a e'yabe'noshsha hoyyemennaxxee e'yaabe'non. 6 Tenne'a Duuchchi Woddike Gootike Galmi giddo martettexxi, kulaa'na'a mirqisanjo maxaafa'n borreesitettaka Duuchchi Woddike Goottika hiyyichcho agabo goddoxxe soodachchotixxe barra baroo bukki hiyyeke ardi'a haassessi; ifi ifike qachcuwwinaa'n dageeke, Yihudake ardi duuchchi'a haassessi. 7 Duuchchi Woddiki Gootti konnee arda xixo'aa mufetinna jabaxxe aarenni haaso'eeke kademmaxxee'e, akimagaada ardi kunni Duuchchi Woddika Gootta soodatiyyoti fuggoke me'injinaa'n illeema higaaxxe hexxeen» hiyye. 8 Neeryak belti Baarooki raagichchi Ermiyaasi kulemmaxxa duuchcha asse; Duuchchi Woddike Goottike Galmi giddonna Duuchchi Woddike Goottika hiyyichcho mirqisanjo maxaafinaa'n haassosse. 9 Yihudake moyanjik Iyyosiyaasik belti Iyyo'aaqemi moyeexxe ondixxe woggake sallanike agenjo'n Iyyerusaalemi hedheek ardi duuchchinna Yihudake qachchuwwinaa'n dageek Duuchchi Woddike Gootti edo agabo goddo honsaaxxa yanna lassine. 10 Baarookinna mirqisanjo maxaafa'n Ermiyaasi haaso'a'naa borreessememmaka hiyyichcho, Duuchchi Woddike Goottike Galmixxe alidarrexxe baxxe'n haaroxe hula hiyyendaaxxe Galmixxe baxxe'n hexxeexxe, barsiisanjo Saafaanika belto Gamaariyaxxe kuta giddo hedheexxi ardi duuchchi'a haassosse. 11 Saafaanik akka'i Gamaaryaak belti Mikiyaasi mirqisanjo maxaafanaa'n haassossemeeka Duuchchi Woddike Goottika hiyychcho duuchcha laqeexxi, 12 Mootomatike mini giddo ja'labuwwi duuchchi hedheexxe borreesanjixxe kuttaba'a adadde mare; ookko Elishaama'i borreesanji, Shemayaak belti Delaayya, Akiboorik belti Elnaataan, Saafaanik belti Gamaariyya, Hanaaniyaki belti Sedeeqiyaasinna iittanni welti ja'laabuwwi duuchchi ofo'leemman. 13 Mikiyaasi, Baarooki ardakee'e mirqisanjo maxaafinaa'n haassessaa wodda laqeexxa duuchcha insa'ne'ni kuleechchi uduma, 14 Ja'labuwwi duuchchi Naataanika belto, Shelemiyaamika akka'o, Kuushika obottoro, Yihudii'i, «Ardakee'e haassessitettaka mirqisanjo maxaafa aaxxe daggattoshsha» hina'n Baarookiba ergine; Neeryaki belti Baarookinna mirqisanjo maxaafa aadheexxi insa'nebaa dage. 15 Insa'nenna «Ofoldetexxi no'o'a haassessi» hine. Baarookinna insa'ne'a haasseesse. 16 Insa'nenna konnee hiyyichcho duuchcha lanqeexxi, soda'ati weli'aanni weli uunda'n, Baarooki'i, «No'o konnee hiyyichcho duuchcha moyanjoke'n kullannoken» hine. 17 Ookkonechchi udumanna lenbeexxi, «Konnee hiyyichcho duuchcha hitta borreessa dandeettettexxa no'o'n kuli, Ermiyaasi ate'n kula'naatemma'a?» hine Baarooki'i qorre. 18 Baarookinna «Eeti, isi ane'n hiyyichcho mitti mittik kulaa'na'a, aninna mirqisanjo maxaafa'n qalameti borreessennen» hiyye 19 Ja'labuwwikinna Baarooki'i, «Yoona atinna Ermiyaasi me'itine shoomme; haba hexxineexxa ayyinna ege'noqqe'e» hine.

20 Mirqisanjo maxaafa Elishaama'ii borreesanjiinxe kutta'n uggineechchi uduma moyanji hedheexxe baxxe'n marreexxi kaddeexxa yaane duuchcha iso'ni kulle. 21 Moyanjikinna mirqisanjo maxaafa iyedangaashsha Yihuda erge; Yihudinna borreesanjo Elishaama'ixxe kutta giddi'n mirqisanjo maxaafa aadhe iyyedageexxi moyanjokeenna moyanjii bira uurreemmake ja'labuwwa duuchchi'a haassesse. 22 Sallaniki agenjo kadeemmaxxee moyanji haarsika agenjo sa'issedhammake mine'n giira ha'yita'neexxe laangoxxe booso edi darre ofo'leemman. 23 Yihuudi mirqisanjo maxaafinaa'n sase yookaan shoole borro kuta haassesse bireeshshanni, moyanji haassossemeeka mirqisanjo borressanjixxe haadonni haninaa'n wowwoxxa'ni giira giddi'a darba'emman; konnee qicinni ookkone'e mirqisanjo maxaafa duuchcha gube bire. 24 Moyanjokenna kadi konne hiyyichcho duuchcha laqeek ja'laabuwwi duuchchi riffinna hiyyeba'a; yaadenna ifixxa seemma daddarebaan. 25 Moyanji Mirqisanjo maxaafa gubabaashsha iso'o Elinaatani, Delaayanna Gamaariya kadhantee wodda midde insa'nexxa laqebaan. 26 Moyanjikinna lebeexxi borreessanjo Baarookinna anee'e raagichcho Ermiyaasi'i abinde usuraashsha moyanjika belto Yirehiimi'eeli'i, Aziri'eelika belto, Seraayaanna Abidi'eelika belto Shelemiya'a ajaje; Duuchchi Woddiki Gootti kinni no'oo'o sho'e.

27 Ani Erimiyaasi kula'na'a Baarooki borreessanji, borreesseeka mirqisanjo maxxaafa moyanji gubeechchi uduma Duuchchi Woddike Goottik hiyyichchi ane'n dageexxi, 28 «Wele mirqisanjo aaxxettexxi, Yihudiink moyanji Iyyo'aaqemi gubeeke edike mirqisanjo'n hedhemmaka hiyyichcho duuchcha hana borreessi. 29 Yihudaka moyanjo Iyyo'aaqeminna, ‹Ati Ermiyaasii, dhugaandinni Baabiloonik moyanji daga dagaan; konne boganna bogi giddo hedheeka manjokanna hore biraan «mayee'e hitettexxi borreesitette? Hita'n mirqisanjo maxaafa gubbeetten hiyyi» hiyye. 30 Tenne'a Duuchchi Woddiki Gootti Iyyo'aaqemi'i Yihudake moyanjixxee haaso'a'n, Sanne isixxe giddii'n Daawwitixxe moote'n ofo'laak manji hedhabaan; rensha isik gadhi'a hunnemeexxi barra arishshotike qeniqeninna hashsha qorrake'ni qaqemaan. 31 Isoo'o, oose isixxanna isika ja'labuwwa, assinemmaxxe fuggo insa'nee xixannon; hiyyennexxa laqa gonpheemmaxxee insa'ne'n iyyedagonaa haaso'ennaxxa ba'ne duuchcha insa'ne'ninna Iyyerusaalemi hedheeke Yihudiinke arda'ni iyyedagannon.› »

32 Tenne'a ani Ermiyaasi, wele mirsanjo aadhennexxi Neeryake belto borreesanjo Baarooki'n uwwenne; Baarookinna Yihudiink moyanji Iyyo'aaqemi giirat gubemmake mirqisanjo'n hedhemmaka hiyyichcho duuchcha ani kulaa'naa'a borreesse; iittanni edike maxaafike hiyyichchuwwa'n heddi fakkaataaki weli hiyyichchuwwi lebeme.