Eermiyaasikaa Raaga 24

Lame Qiricco Balasetixxe Gummaka Fakkeenna

1 Baabilonik moyanji Naabukadanatsoorii, Iyyo’aaqemika belto Yihudaka moyanjo Ikooniyaaninna isika ja’laabuwwa ittanni Yihudaka haqqetixxa oge afe’ekanna sibilo tumammaka manna Iyyerusaalemi’n Baabilooni’a booji’eechchi uduma, Duuchchi Woddiki Gootti lame qiricco balase galmi edi darre hexxee’na’a ane’n leelishe.✝24:1 2 Moy. 24:12-16; 2 Odo. 36:10. 2 Mitte qiriccoxxi rakke raxxeexxe balase fakkaattaaxxe elolla gumma hexxemman; langaxxe qiricco’n kinni itatee’e eldabaaxxe elobaaxxe belase hexxemman.

3 Okkoneechchi uduma Duuchchi Woddiki Goottinna anee’e, «Koo, Ermiyaasi affa’ettelchchi kunni maachcho?» hiyye qore.

Aninna, «Balasete afa’enne; elollamma yo’oshsha eloxxen; elobaaxxi kinni itissabaaxxe yo’oshsha elobaaxxen.»

4 Higgeenn Duuchchi Woddike Goottik hiyyichchi anibaa dageexxi: 5 «Isira’eelik Duuchchi Woddiki Gootti Mageni: ‹Tenne eloxxe balaseshsha, konne boonchinaa’n Baabilooni’a boojji’m’o’a wocci assenneka Yihudaka manna eloxxen uudannon. 6 Eloxxenni ille anxi insa’nee’e uuddaan; konne bogibaanna insa’nee’e idagannon; ijaaranno malee insa’nee diigabe’no; kasanno malee insa’ne’e goshabe’no. 7 Ani Duuchchi Woddike Gootta kadennexxa anee’e egenaaxxa qalbe insa’ne’a uwwannon; mitte godobinni anibaa hingammaxxe’e, insa’ne anike arda kandaan; aninna insa’neke Mageno kadannon.

8 « ‹Yaane kinni itissammabaaxxe elobaaxxe balaseshsha Yihudak moyanji Sedeqiyaasinna isik ja’laabuww ittanni Iyyerusaalemi gatemmake’inna Gibtsee hedhammake manna’n iittan assannon hiyya’neen Duuchchi Woddik Gootti. 9 Ani insa’nee’e butta duuchchixxe moottummuwwa duuchchi edo diqatemmakenna, jibbemmaake assannon; insa’nee’e xexxeerannoke booncho duuchcha’n cee’memmaashanna mammaakemmaake, qacifatemmashshanna yowwemmaashsha assannon. 10 Insa’ne’anna insa’neke annuwwi’a uwwennake boganaa’ni ba’naaqici’a bagedo, solo’okanna dhukkuba insa’ne’n ergannon.› »