1 Eettene wogga'ninni Yihudiink moyanji Sedeeqiyaasi moweeshshanni sholgaxxe woggake, ondeessoke agenjo'n Gaba'oonik qachchik manji, Azuuriki belti wabeekkichchi Hanaaniya Duuchchi Woddike Goottike mine'n qeesoleti edonna ardi duuchchi edo,✝ 2 «Lumok Duuchchi Woddiki Gootti Isira'eelik Magen hiyyeen hiyye'e anee Ermiyaasi'n haaso'eeqic, ‹Baabiloonik moyanji ha'no'n fe'eeka qanbara enqannon; 3 Baabilooniki moyanji Naabukedentsoori Duuchchi Woddike Minenaa'n Baabilooni'a adhdhe me'emmaka mi'uwwa duuchcha lame wogga giddo illeema hisse iyyedagannon. 4 Yihudiinka moyanjonna Iyyo'aaqemika belto Ikkooniyaani'i, wele Yihudii'n Baabilooni'a booji'eme adhdhememmaka duuchcha konne boonchiba'a illeema hissannon; Baabiloonik moyanji ha'non fe'emmaka qanbaranna enqannon› hiyya'neen» hiyye. 5 Aninna qeesoleti eddonna Duuchchi Woddike Goottike miniba uurredheeke ardi duuchchi edo, wabeekkichcho Hanaaniya'n hiyye hissichcho uwweenne qici. 6 «Ameen! Duuchchi Woddiki Gootti ati hitetteshshanni assowwaal! Booji'ememmaka Duuchchi Woddike Goottike minika mi'uwwa duuchchanna, booji'ememmaka manna duuchcha Baabilooninaa'n illeema hissiyyoti haasottetteka hiyyichcho muuxowwaalita'a. 7 Kaddomale ate'inna konne arda'n hiyyaannexxa laqi: 8 Olominaa'n ati'anna ani'a edisaaxxi wabeekko, heddo boguwa'ninna lumolluwwa mootummuwwa'n bagedinxee, ba'netixxeenna, balatixxee wabeekkumma haassotteemman. 9 Yaane kinni nage'iinxee wabeekkumma haaso'eek wabeekkichchi dhugaati Duuchchi Woddiki Gootti ergeeke kadeexxa ege'nendaak haaso'emmaxxi wabeekkumma dhugottooleten.»

10 Ookkonechinni udumi'a wabeekkichchi Hanaaniya qanbara wabeekkichcho Ermiyaasixxe qucenaa'n aadhe enqeexxi, 11 ardi duuchchi edo, «Duuchchi Woddik Gootti hiyya'neeqic: ‹Lame woggaxxe yanna giddo Naabukedentsoorii Baabiloonike moyanjika qanbara ardi duuchchixxe qucenaa'n iittan enqannon› » ookkone wodda wabeekkichchi Ermiyaasi ookkkoo'n ke'eexxi ora ifika me'e.

12 Wabeekkichchi Hanaaniya wabeekkichcho Erimyaasixxe qucenaa'n qanbara aadhe enqeexxe harumaxxe yanna uduma, Duuchchi Woddike Goottik hiyyichchi Ermiyaasiba'a dageexxi: 13 «Martettexxi Hanaaniya'n Duuchchi Woddik Gootti hiyya'nee hitattoqic, ‹Ati haqichchinke qanbara enqiteetten; ani kinni isixxa bakka sibiljiinke qanbara hissannon hiyye'een. 14 Lumok Duuchchi Woddik Gootti Isira'eeliki Magen hiyya'neeqic: Baabiloonika moyanjo Naabukedentsoori'a ergatemo'a konne gosa gosake arda duuchcha'n sibiljinka qanbara fe'e'naa'a isi'a ergatemaan; biniinchikinna midde isi'a hiremaashsha assannon.› »

15 Ookkonechchi udumi'a wabeekkichchi Ermiyaasi wabeekkichcho Hanaaniya'n hiyyeeqic, «Koo, Hanaaniyan laqi! Duuchchi Woddiki Gootti atee'e ergebaang kunni gosa gosak ardi dhara addataashsha assiteetten. 16 Tenne'e Duuchchi Woddik Gootti: ‹Atee'e buttatenaa'n fugusannon; Duuchchi Woddike Gootta'n ardi jallataashsha assitettexxee'e tenne wogga'ninni rertatton.› »

17 Wabeekkichchi Hanaaniyaninna eettene woggake torbeessoke agenjo'ninni reye.