1 «Anxe bobaarisaxxe bakka'n hedheeka anka gedhebo balleessitinaaxxeenna xeertina'neexxe allalisano'a aanne'e» hiyya'neen Duuchchi Woddiki Gootti. 2 Tennexxee Duuchchi Woddiki Gootti Isira'eelik Mageni arda anka heqqita'neexxa allalisano, «Gedhebo anka xeertinemmaxxe'e, shorritinemmaxxenna hore ankee xexxe'ata gophphinemmaxxe'e fuggoxxe ha'noxxe hujexxee ha'no'o xixannon» hiyya'neen Duuchchi Woddiki Gootti. 3 «Gateeka anka hore xexxeerenneke boga duuchchanaa'n ani ifi'aan bukki asse'e allalemaaba'a hiissedhannon; ookkonna horre bira sa'naan. 4 Insa'ne heqqitaaxxa allalisano uggannon; ta'anni elqi'a sodaantabaan; bararanqabaan; insa'ne giddii'n mittikinna xe'yabaan» hiyya'neen Duuchchi Woddik Gootti.

5 «Kunniseten Daawwitixxe hortenaa'n

qullichcha moyanjo idagannoxxe barra daggaan;

Isinna dhugaanna qullumma assan,

beekkumik galchaak kadaan» hiyya'neen Duuchchi Woddik Gootti.

6 Isi galchaake baro'n Yihuda anjiremaan;

Isira'eelik ardinna nage'ik hedhaan;

Isinna ye'emaak summi

Duuchchi Woddiki Gootti no'oxxe qullumman hiyyemaake kada.✝

7 «Tennexxee manni, ‹Isira'eelika arda Gibtse'en fulcheek hedhaak Duuchchi Woddiki Gootti ege'neexxa› hiyye'e kakatabaaxxe bara daggaan hiyya'neen Duuchchi Woddik Gootti. 8 Yaane kinni insa'ne hinee qici, ‹Isira'eeli'i middi boganaa'inna insa'nee'e xexxeeremmaake wele boganaa'ni fulcheek hedhaak Duuchchi Woddik Gootti ege'neexxa› ookkonechchi uduma insa'ne ifinge boga'n he'naan.»

9 Wabeekoletixxee,

Godobi anee'e gubate,

mikiti anee gilgile;

Duuchchi Woddike Goottixxeenna

woyyichcha hisike hiyyichchixxee,

Woyinetik bulbulo ha'we,

machcho'eeke manjishsha kadenne.

10 Boga duuchcha'n yabaabulle wo'mite;

Mageniinke yowwichchonaa'n kexxeexxa bogi duuchchi yaadaan;

qiila gammoojje'ni hexxeexxi arso bagge'een.

Wabeekkoletinna fuggo ora me'iteexxi

baalle ifixxanna seeribaabelo la'ooffateen.

11 «Wabeekkichchikinna, qeesichchi qullummatike ora'n me'inebaan;

anke galmi giddo midde insa'nexxa fuggoxxa huje uudennen,»

hiyya'neen Duuchchi Woddik Gootti.

12 «Tennexxee ori insa'nek salaqaake kadaan;

dukkana giddi'a hunemmeexxi,

tintimmenna inbaan;

Insaa'nee xixannoxxe wogga'n,

bala insa'ne'n ibisannon,»

hiyya'nen Duuchchi Woddiki Gootti.

13 «Semaariya hexxeexxe wabeeko'n,

manjo jibbissaaxxa yaane uude'ennen;

Insa'ne Ba'aalike summinni wabeekkumma haasonna'n,

arda anka Isira'eli'i dedhinse.

14 Iyyerusaalemi hexxeexxe wabeekkoluwwa'n,

cori gibissaaxxa yaane uude'ennen;

yabaabulle, dhark haasonnaan

Ayyinna fuggoxxenaa'n higabaashsha

fuggaaleeyye fuggoxxe'e tirtisa;

Insa'ne'e duuchchi ani'a Soodoomishsha,

Iyyerussaalemik ardinna Gomorashshaten» hiyye.✝

15 Tennexxee Lumok Duuchchi Woddiki Gootti tenne wabeekkolexxee,

«Iyyerusaalemixxe wabeekkole

boga duuchcha'a battitte yaane geessissemmaxxee'e

Qaraartaaxxa ita indaashsha,

ha'la afe'eka wode'enna ha'winaashsha assannon» hiyye.

16 Lumok Duuchchi Duuchchi Woddiki Gootti hiyya'nee qici:

«Tinni Wabeeko ha'no'n raaga'neeka raagaa laqqinoqqe'e;

dharinxa addachiisa ha'no'n haasonnaan;

Duuchchi Woddike Goottike haaso'eeke kadebaak

ifi'ke godobika yaada haasonnaan.

17 Insa'ne hiyyannoxxa laqabaake mannan,

‹Ha'no'o Duuchchi Woddik Gootti nage'ik hexxinaan hiyye'en› hinaan;

Ifike godobobika fuggoka yaada hordofaaka manna duuchchanna

‹Elobaaxxi ha'no'o kissabaan hiyya'neen› hinaan.

18 Tenne wabeekkole giddii'n hiyyichcho isika laqateenna uudatee'e,

ayyeeramma Duuchchi Woddike Goottixxi mari'e hexxeeba uurre'emmakilaati?

Hiyyichcho iskanna laqe'e caqaseek ayyetemmaraata?

19 Kunniseten, Duuchchi Woddike Goottixxi mufe jabaxxinni

hobonbalteshsha daggaan,

Lumoki danbala'inna,

fuggaaleyyetika umo ganaan.

20 Duuchchi Woddik Goottixxi mufe godoba isikika yaada

wo'maa qicinni muuxxaqici'on

udumi'a higgabaan;

Ha'nonna udumike baro'n

tenne'e adda qalbeeffattinaan.

21 Ani tenne wabeekkole ergeebo'non;

insa'ne kinni ifi'aann erga ifixxa adhine gongine;

Insa'ne'n haaso'ebe'nong,

wabeekummatanna haasonne.

22 Silaan mari'e anxi hexxeeba afemme'eele,

hiyyichcho anka arda ankee'e lallanbamman;

Arda anka fuggoke oranaa'ninna,

elobaaxxe hujenaa'n hissinamman.

23 «Ani shiqike Mageno callata?»

hiyya'neen Duuchchi Woddik Gootti,

«Bayyikennabaata?

24 Ani afabe'noshsha,

qoonne bakka'n sho'oma dande'aak hedheeta?»

hiyya'neen Duuchchi Woddik Gootti.

«Iimanna butta wo'meennek antebaata?»

hiyya'neen Duuchchi Woddik Gootti.

25 «Ani ‹Oojjo oojjotenne! Oojo oojjotenne!› hita'n anke summinni dharinka raaga raagga'neexxe wabeekoka hiyyichcho laqeennen. 26 Tinni yaane ifixxe halchaka dharichcha yaada raaga raagga'neexxe dhariyye wabeekkoxxe sammo'nita hedha'n hedhaanneek haaniqici'ate? 27 Annuwwi insa'nek Ba'aali'i magenooffanta'n anee'e deenaashsha, insa'ne haasonna'neexxe oojjonni ank ardi anee'e dedhaashsha assineechcho insa'ne'n fakkatta'neen. 28 Oojjo oojjoteek wabeekkichchi eetteneenn ifixxa oojjo haaso'owwaal; hiyyichcho anka laqeek kinni addatenshati ookkoneenni hiyyichcho haaso'owwaal; huurikinna midha mitteteeta?» hiyya'neen Duuchchi Woddik Gootti. 29 «Hiyyichchi ank giiratishshateba,» hiyya'nen Duuchchi Woddik Goottii, «hiyyichchi anki kinjo bulleessammake burrisishshatebaata?

30 «Tennexxee hiyyichcho anka weli welinaa'n moorteexxi anenaa'n laqe'eeshsha haasotta'neexxe wabeekkole'n ke'annon» hiyya'neen Duuchchi Woddik Gootti. 31 Ifinga yaada, «kunni Duuchchi Woddik Gootti hiyyichchon hita'n haasottaaxxe wabeekkole gibannon, ‹hiyya'nen Duuchchi Woddik Gootti.› 32 Kunniseten ani dharinxa oojjonni raaga raaggaaxxe wabeeko gibannon» hiyya'neen Duuchchi Woddiki Gootti, «Ani insa'nee'e ergebe'nong yookaan hariirebe'nong soda'abelo dhara haasonna; arda ankanna dedhinsa; insa'ne konne ardi'a mittelchonna woyi fullabaan» hiyya'nen Duuchchi Woddiki Gootti.

33 Duuchchi Woddik Gootti ane'e hiyyeqici, «Koo Eermiyaasi! Kunni ardi yookaan wabeeka mitti yookaan qeesichchi mitti, ‹Duuchchi Woddike Goottixxi erga maachcho?› hine atee qorroole atinna insa'ne'e, ‹Duuchchi Woddik Goottixxi erga ha'noote kaddinemmaxxee ifi edii'n ha'no fugussannon› hite insa'ne'a kuli. 34 Wabeeki yookaan qeesichchi yookaan ayyinna, ‹Tinni Duuchchi Woddike Goottixxe erga hiyyoole,› ookkone manjonna isika mini hado ani mura woxisannon. 35 Mitti mitting jaalo ifika yookaan fira ifika: ‹Duuchchi Woddik Gootti maa hissichcho uwwe?› yookaan ‹Duuchchi Woddik Gootti maa haaso'e?› hiyye qora ati'a hasissaan. 36 Ta'in elqi'a kinni ‹Duuchchi Woddik Goottixxe erga hitine haasottinoqqe'e› haasottinabaachchinna, manji duuchchi'a ifi'ann haaso'emmak hiyyichchi isinxe kadammaxxee ha'no hedhaake Magenika, Lumoke Duuchchi Woddik Gootta no'oke Magenika hiyyichcho dassinammaxxeten. 37 Tennexxee wabeekkichchoke'ni: ‹Duuchchi Woddik Gootti ate'n maa hiissichcho uwwe› yookaan ‹Duuchchi Woddik Gootti maa hiyye ate'n haaso'e?› Hite'e isoo qor. 38 ‹Duuchchi Woddike Goottixxe ba'on› hitineexxe kaddoole midde, Duuchchi Woddik Gootti ‹Ani, «Duuchchi Woddike Goottixxe ba'oni» hitinoqqe'e› hiyye ha'nonni kulee'naanni, ha'no ‹Duuchchi Woddike Goottixxe ba'oni› hitine'een. 39 Tennexxe ha'no'o, ittanni edike ha'noke annuwi'a uwwenneka qachchinni welti ha'no dedhannon; alba anke edi'inna ha'no'o fugussannon. 40 Ani duuchchin woddi'a dedhemmabaaka shooko, duuchchi woddika salphinnenn ha'no'n idagannon.»