1 Shiyemeeke anke ardi'a

hashsha barra oodhonna

Maye hedhe, umi anki wodi'iinxe muume kadeel!

Maye hedhe, ille anixxi indidottixxe muume sila kadeele!

2 Arda anka waale bayyate me'onnaa'a,

qiilla gammoojje'n keessummatika galduma ayyete ani'a uwwumadu!

Duuchchiing yabaabula,

sobi calli wo'me'eeke kadeeni!

3 «Insa'ne dhara haaso'ate,

arrabo insa'neka gabetishsha qophpheessenne;

Dhugaatite kaddebaaki,

dharki bogake'n gurra fulle;

Balleessande'n balleesa itti lenba'n me'ine;

aneenna ege'na gonpheeni»

hiyya'neeni Duuchchi Woddiki Gootti.

4 «Mitti mitting dayyi dayyo ifinga soba'neen;

jaaling jaalonga hamataammaxxee;

Dayyi ifinga dayyo heqqedhowwaal,

jaali jaalonga addatoqqe.

5 Jaaling ifika jaalo soba'neen;

dhugaa'a haaso'aneeki hedhebaan;

Dhara haaso'atee arrabi insa'neki muxxe fuleeken;

cubbo hunja'n ifi kurbu assine.

6 Galdumi atik miicami giddon;

insa'ne hunjammake miicaminaa'ni kexxeexxa ane'e ege'no'a hansebaan»

hiyya'neen Duuchchi Woddik Gootti.

7 Tennexxee Duuchchi Woddiki Gootti hiyya'nee qici:

«Sibiliinsha insa'ne'e ca'a assannon; hega uudannon

anke ardixxe cubbo'a,

konnechchi gadho maa assannoo?

8 Arrabi insa'neke qarsineeke mogidishshaten;

sobo haaso'aan

Duuchching jaal ifikinn welti eloxxa haaso'aan;

godobi giddo fuggoxxinni gaadaan.

9 Eega tenne yaane duuchchixxee ani ins'ane xixabo'noo?»

hiyya'neen Duuchchi Woddik Goott;

Hiyya'neen Duuchchi Woddik Gootti;

iita hedheke arda'n ani halo fulabo'noo?

10 Koobuwwatee woo woo hiyye oodhennen;

qiilla gammoojje hore alla'dhinammake boonchi'a yaadaneen;

Manji me'abaake orumma kade gateen;

horiinxi ma'la laqendabaan;

Ci'uwwa baajeen;

biniichchuwwikinna baqate luggeen.

11 «Iyyerusaalemi oletixxe tullon;

jeedali burraaqaxxe bakka assannon;

Yihudiink qachchuwwi,

manji hedhabaake ona assannon» hiyye.

12 Tenne ege'na dande'aak beeki manji ayyete? Duuchchi Woddik Gootti ifisee'na tenne'e ca'asse kula dande'aak ayyete? Bogi mitti manjinna giddo mammaremmabaakenna qiilla gammoojje mayee kade gate? Mayee urume?

13 Duuchchi Woddiki Goottinna hiyya'nee qici, «Tinni kaddeechchi ani uwwenneka waalle ani'a ajajema gonphemmaxxeenna galduma anka hordofa gophphemmaxxeten. 14 Tennexxa bakka godobake'n halo abixxine annuwwi insa'nek insa'neka barsiisinemmaka Ba'aali hinaaka magenuwwa hordonfe» 15 Tennexxee Isira'eelik Duuchchi Woddiki Gootti Magen hiyya'nee qici, «Konne arda'ni qaraartaaxxa sagale itisannon; ha'la giddo hedheeka wode'e ha'wisannon. 16 Insa'nete kando annuwwa insa'nek egenebaake gosa gosake ard giddi'a insa'ne xeerannon; kuttiassanno qico'ni wolaatichchik insa'nee shorrannon» hiyye.

17 Duuchchi Woddiki Gootti hiyya'nee qici:

«Yoona, qalbeeffatte, oodhishshaaxxa melaalle ye'we

boochchisaake muxxeera idaggaashsha asse.

18 Insa'nenna ranke dangowwaal;

ille no'oxxenaa'n indiddo yaataa qico'ni

Gaari no'oki indiddoti coo'mi hiyyaa qico'n,

no'oxxe'e boochchissowwaal.

19 Tsiyooni'ni hine hunbaashshinaa qici:

‹Fuggo inbenen!

Yo'oshsha salphatennen!

Minuwwi no'oki diigemeemmaxxee

boga no'oka waalle'e me'ino› » hiyye.

20 Tee melaalle, ha'no Duuchchi Woddike Goottika hiyyichcho laqqe,

mansha ha'nooxxa isike afo'ina'ni fulaake hiyyichchi'a banne;

Dubarte ha'nooxxi wi'lishsha,

ha'noo giddi'ni mitti wele boochchisa barsiisse.

21 Reyo mini mini hedheeshshann e'yite;

kollifantennexxe kollobaanna gelteen;

Oosuwwa ora orana'inn;

dargageeyyetanna weldeena welideenana'inn bukki assine adhdhinaan.

22 Hitinaa qici; «Duuchchi Woddik Gootti;

« ‹Renshi manjiinki,

diidake'ni hunneeke korishsha;

Ayyinna bukki assammabaakishsha;

midha haammaa'na udumaa ibbammaxxe deeggeshsha ibbaan› » hiyye.

23 Duuchchi Woddiki Gootti hiyya'nee qici:

«Beeki beekkuma ifikeni ifidukoqe'e;

hunnaamessi ifixxe hunnanni holloqqe;

dureessikinna afeexxe karra'ni irkatoqqe;

24 Hollaaki kinn,

ani Duuchchi Woddik Gootta kadennexxa ege'ne;

Bogake'ni gattowwaali, dhugaanna qullumma assa'enneke kadennexxa ege'neexxi;

tenneni hollowwaali; ani tenne yaanuwwa'ni gammadannon»

hiyya'neen Duuchchi Woddike Gootti.✝

25 Duuchchi Woddiki Gootti hiyya'nee qici: «Summi cali'a jila ofo'leeka duuchcha xixannoxxe barra daggaan; 26 Insa'nenna, Gibtseeka, Eedoomika, Amoonika Yihudaka, Mo'aabikanna umo ifika qooxo haaxxe qiilla gammoojje hedha'neeki kunni ardi duuchchi dhugaatixxa jila ofo'le gopheemmaxxee; iitan Isira'eelik gosa gosak ardinna dhugaatixxa jila ofo'la gophemmaxxee duuchchinga mitte bifanni xixaannon» hiyye.