1 Mo'aabixxa Ba'ne.

Dada Duuchcha ajajaak Duuchchi Woddiki Gootti Isira'eelik Mageni hiyya'nee qici:

«Aanne'e Neebo'a ba'nenden.

Qiriyaataminna abidende salphattaan;

jabaxxi kolluwwa diigendaan.✝

2 Konneechchi edi'a Mo'aabixxi saadendabaan;

gosa gosaki ardinna Haseeboni'ni ofo'le;

‹Amme ookkone boga balleessino› hine fuggoxxa ise'n mari'antaan.

Tee Medimeen; ateenna bucuqqi hitaboxxoshsha assinaan;

wolaantichchikinna shorrinaani.

3 Horonayimii'ni laqenda'neexxa,

jabaxxe ba'nexxinna diigenshatixxa rare caqasse!

4 Mo'aabi baxxaan;

oose isexxina raartaan.

5 Insa'nenna heeqinse oo'na'ni

Luuhiti'i qabantaan;

Insa'ne'ni gelteexxe ba'nexxe hunbaashshina'ni oo'na'ni;

Horonayimii'ni butti'a dirrinaan.

6 Baqatine lubbo ha'noxxanna gatese!

qiilla gammoojje'ni hexxeexxe qu'muudoshsha kadde.

7 Huje ha'nooxxe'ninna karra ha'nooxxe'n addatinammaxxe'e

ha'noonna booji'endinaan

Kaamoshinna qeesoletinna jalqabuwwik welti;

boojin adhdhine me'inaan.

8 Mitti mittinge qachchuwa'ni balleesanji dagaan;

mitti qachchinna gatabaan.

Duuchchi woddiki Gootti haaso'eexxi;

dhooqatinna diidi urime gataan;

9 Phirri hiyye baaje fulo'a;

Mo'aabi'a keela uwwe.

Qachchuwwi mittichchinna hedhabaqico'ni;

uruma kade gataan.

10 «Duuchchi Woddike Goottixxa huje ga'ma'mi hiyya'ni hujaaki yowwemeeke kadun;

isika ajajee'na'a wolaantichik munde dunabaasha hoyyaaki yowwemeeken!

11 «Mo'aabi kotofik hedheeke woyinetike bulbulo;

oosummandenaa'ni ke'isse ititee hedhemman;

Mitte miyanaa'ni wele miya'ni fulchinebaan;

booji'eme ege'nebaan;

Anjatinn hexxemmashshanni hexxeen;

xe'me isexxinna jijjirendebaang hexxeen.

12 Tennexxee mitte miyana'ni weleke'ni fulchaaka manna;

erganoxxe yanna daggaan»

Hiyya'neen Duuchchi Woddik Gootti.

«Insa'nenna isoo dunnaan;

Miyakanna duwwi gatinsaan;

manqorqoruwakanna enqine birraana.

13 Isira'eelik manni;

Beeteli'ni addate shookemashshan,

Mo'aabinna Kaamoshi hinaaxxe magenoofatamaxxe fakke'ni shookan.

14 «Ha'no koo Mo'aabike manna, ‹No'o lolinke mannanna

lolake no'o jabake mannani hiyya hitta dandetine›?

15 Mo'aabi ba'aan, qachchuwwikinn diigeman;

elolla dargageeyenna gorraano'a aa'ne me'inaan»

hiyya'neen summi lumoke Duuchchi Woddike Gootta kadde'ek moyanji.

16 «Mo'aabixxi iba shiqqe'en;

ba'netinna iso'ni ikki woddi dagga'neen.

17 Qarqarake'ni hexxina'neek duuchchi;

gurra iseka egendineeki duuchchi isi'a oodhe,

‹Baalletixxi jabbaxxi bokko,

ulfiniinxi siqqo hitta enqema dandeette!›

18 «Mo'aabi'i balleesaki,

ate'n dagaan;

Kinjike dalla'ikka atika qachchuwwina isinni balleesan;

Tee Diboonxe meyyaxxe belto;

ulfiniixxe bakkanaa'n dirri;

bagoke buttina'ni ofo'le.

19 Tee Aro'erii'i hexxaatexxe

orin qarqara uurrite uudi baqate'neeka labbaka,

Baaje fulda'neexxa meyyaxxa,

‹kaddeexxi yaane maachcho isi?› hite qore.

20 Mo'aabi iba ifixxe'n shooke'eni;

woo hitina'ni; raare

Mo'aabixxa ole kada,

Arinooni bira ege'nishshe.

21 Murte Abike boga'ni,

Holooni, Yaasanna Mefa'aati'ni,

22 Dibooni'n, Neebo, Beeti Dibilatayi'n,

23 Qeriyaatami'n, Beeti Gaamuli'n, Beetime'ooni'ni,

24 Qeryooti'ninna Bootsira'ni; bayyanna shiqa, hedheke Mo'aabike qachchuwwi duuchcha'n dage'een.

25 Mo'aabixxi hunna enqende'en;

aniga isixxinna kutende'en,»

hiyya'neen Duuchchi Woddiki Gootti.

26 «Duuchchi Woddiki Gootti tuffatemaaxxe'e,

Mo'aabii'i ha'wisine machchoosse.

Mo'aabi ifixxe honqo'o'ni hana gangalataan;

osollemeeke kadaan.

27 Isira'eeli'ni gacifataataba?

Isexxe haasotetexxe qixxe'ni,

Umo atika le'misaatak,

moodhalshite welti uggita'na meya ise'e dhaqqabutashsha?

28 Ha'no Mo'aabike qachcha'n hexxina'neke manna;

qachchakenaa'n fuldine rassat giddo hedhdhe;

Guuggenjo bowwa'i qarqara;

mine ijadhdhitammashsha kadde.

29 «Mo'aabi holla'neexxe,

ifi lummisse caaqa'neexxe;

Ifi duke kijibeexanna;

godoba jabeesse'exxanna lanqeenen.

30 Ani isexxa ifi duka ege'neennen yaane kinn toliinxen,»

hiyya'neen Duuchchi Woddik Gootti.

«Tolange ifi saada'neen.

31 Tennexxee Mo'aabi'a oodha'nen;

Mo'abike bogi duuchchi'a woo hiyyaanen;

Qiirheresike manni'anna gaaddannon.

32 Sibimake woyinetike hiddichcho;

Iyyazeeri'a oodhane caala midde ati'a oodhanon;

Damooletinna abbaayatiqico'ni daalde'en;

Iyyazeriqico'n gelte'en;

Haama gelteexxa midha atixxanna woyinetika hiddichcho atika,

balleessaaki dageen.

33 Mo'aabike hiddichchuwinke fichchike boonchonna'n;

gammadikinna ilileete bayyate'en;

Woyintika bulubulo miicamake miyi giddii'ni fulaabasha basse'enen;

ilillisa'ni miicaki afemabaan;

Ookkona hafuuri laqemoolenna;

ililleettetika hafurabaan.

34 «Haseebonii'n Eli'aal qico'ninna Yaaheesi qico'ni;

Tso'aari'ni Horonayimi qico'ni Egilaati Shelishi qico'ni;

Insa'nexxi raare adda laqisaan;

Nimiirimik wodi'inna midde bage'en.

35 Magenoofantammake tulluchuwa'ni tolchinammaka;

ifike magenoofantamake magenuwwi'a hixaana gubaaka

Mo'aabii'ni balleesanon,»

hiyya'nene Duuchchi Woddiki Gootti.

36 «Tennexxee qalbe anxi Mo'aabi'a;

Qiirheresike ardi horatechcho duuchcha gophemaxxe'e;

reyotiba susuu'le afunfa'na'a oodhammake mannishsha ins'ane'a oodha'enen.

37 Mitti mittinge manji uminna;

areedi duuchchi hademeen;

Aniga duuchchi madooteen;

hidha duuchcha'inna yaaddotixxa seemmanna usu'dhineen.

38 Mo'aabi'ke minuwwixxi heellcho duuchcha'ni;

ardi bukku hiyyammaba

Yaaddo malee'e wele lanqaachchi hedhebaan;

hunnemaxxe odolchoshsha Mo'abii'i enqeenen,»

hiyya'ne Duuchchi Woddik Gootti.

39 «Hitta kadee enqeme!

Hitteeqico isi'a oo'ne!

Mo'aabi hitta kade dudduro wirri hiyye!

Mo'abi oso'lematike,

qarqarake'n hedheeke duuchchi'a alayyiineke beessisa kade.»

40 Duuchchi Woddik Gootti hiyya'nee qici:

«Yoona sinbiriinsha guule iso'ni hana iba'ni,

keelakanna Mo'aabi'ni farri assaan.

41 Qachchuwwakanna lolle abindaan;

kolluwwatanna abindan;

Eettene barra Mo'aaabiki loliink manni qalbe;

ciniiffattaaxxe manjichchoshsha kaddaan.

42 Mo'aabi Duuchchi Woddika Gootta tuffattemmaxxemma ba'aan;

moyanjumma isixxinna gattaan.

43 Koo, Mo'aabike arda;

weekenshanna balen, fonxorotinna ate'e heqqitaen»

hiyya'neen Duuchchi Woddiki Gootti.

44 «Weekenshatenaa'n baajaki duuchchi,

bale giddo ibaan;

Baletenaa'n fulaaki

fonxoroti abidemaan;

Mo'aabii'i xixannoxxi wogga daggaan,»

hiyya'neen Duuchchi Woddiki Gootti.

45 «Mo'aabika alba,

gamo isixxixxa sammo gubbaaxxi

Giira Haseboo'ni,

bubenjikinna Sihoonike minenaa'ni fule'en;

Baqatammakir Haseebonike gaaddisi hunda,

gollifate kadaaxa gopher uure'en.

46 Koo, Mo'aabi aane ati'a!

Kaamoshik ardi kutti hiyye'en;

Labbaxxi atixxi oosenna booji'ende mete'en;

meyyaxxi atixxi oosenna adheende me'iteen.

47 «Yaane kinni udumi uduma,

Mo'aabixxa booji'o hiisannon,»

hiyya'neen Duuchchi Woddiki Gootti.

Mo'aabi'ni murendeexxi murte tenneten.