1 Koo Isira'eelike ardaa; Duuchchi Woddiki Gootti ha'no'a hiyya'neexxa laqqe; 2 Duuchchi Woddiki Gootti hiyya'nee qici:

«Wele gosa gosake ardika galduma hordofinoqqe'e;

insa'ne iimatika beessisuwwa sodaantaan;

ha'no kinni weekendinoqqe.

3 Wele ardiki galdumi toliinken;

haqqe gongomakenaa'ni wonxaan;

haqqe boce giissammaki manni seesa giisaan;

4 Insa'nenna biretike siblininna woriqeti itti hana seesa giissinaan;

ibabaashsha,

misimaare faaseti ganne abidinsaan.

5 Fakkuwwa insa'nexxi baaquluwwinke fichchi giddo ci'a sodaachchissatee giissinne uurrissa'nemman;

insa'nennaa haaso'atik dande'a anfebaan;

Me'a dande'a gonphammaxxee,

utuphi insa'ne'a hasisaan;

Manjo miidha yookaani la'o uwwachchuwwa kadagophphemmaxxee

konnechchuwwa haranga sodatinoqqe'e» hiyye.

6 Ee Duuchchi Woddike Goottaa: atishsha hedheek ijje hedhebaan;

ati lumoken;

atiki summik baalomi lumoken.

7 Koo gosa gosa duuchchike moyanjoo;

ata'e sodatabaaki ayyete?

Ulfinni ati'a hasisaammaxxee.

Buttatixxe beekkole duuchchina'ni

insa'nek moyanjuwwi duuchchi giddo

atishsha hedheek hedhebaan.✝

8 Woyi fulabaaxxe haqichchiinxi fakkexxa baranno barataak duuchchi;

insa'ne gowwooletenna hawwawwaken.

9 Ganganne giissineexxi birretik sibilji Terseesii'ni

worqetinna Afeezii'ni daggaan.

Angatixe ogekinna baqise giissammak hunjeemmachcho,

beetto giissitemmachcho duuchcha,

cuqullitenna baddeessitte seemma fuganteen.

10 Duuchchi Woddiki Gootti dhugaatike Magenon;

Isi hedhaake Mageno, duuchchi woddike moyanjon;

Mufataa wodda butta shekesheke hitaan,

mootummuwwatinna mufe isixxa hoyya dandeettabaan.

11 «Ha'noonna, ‹Kunniir iimuwwatanna butta dadebaak dharichchi magenuwwi buttatenaa'ninna iimaatenaa'n ba'aan› hitinaan» hiyye.

12 Duuchchi Woddik Gootti kinn boga hunna ifixxinna dade;

butta duuchcha beekkumi ifikenni ofo'lishshe

iimuwwatanna ege'na ifixenni dhise.

13 Hafuur isiki dindimaa wodda

iimuwwate'ni hedheeki bukki hiyyaan;

hurre buttatixxe gabalabaa'ni iimi'a me'itaashsha assaan;

Bange xeenixxa duuka ibbaashsha assaan;

diidallotanna tuulemmabaa'ni fulchaan.

14 Mitti mitting gowwooletenna ege'na afebaakeran.

Worqe baqise giissammakir hujammaxxe fakkuwa'ni shooke'en;

Bonce giissinemmaxxi fakkuwwa dhariinxen;

hafuurakanna afeerabaan.

15 Kunnichuwwi la'o afebaake mi'uwwan

murte insa'ne'ni murendaa wodda ba'naani.

16 Ya'iqoobik Magen kinni konneechuwwishatebaan;

Isi duuchhcingechcho dadeeken.

Isira'eeliki ardinna geego isiken.

Summi isikinna Duuchchi Woddike Gootta Magenon.

17 Ati erqe kayyii'ni buqendeexxi;

hexxemmabaa'ni karra atixxa bukki asse'dhi.

18 Duuchchi Woddiki Gootti hiyya'nee qici:

«Konne boga'ni hedha'neeka

ta'a tennee gadhi'a fugussannon;

Miidhensha insa'ne'ni laqendaashsha,

rakkote'ni insa'nee ibisannon»

19 Aane enqensha anxe;

mada anxinna fayyitaaxxebaan

Kaddo malee'e ani ifi'an

«tinni anixxe dhibeen

dande'a ani'a hasissaan»

20 Dunkaanna ankanna oltatee;

goluwwi anki duuchcha kukkutendeen;

Oose ane'e waalde me'ite'en, higgabaan;

dunkaan anka oltonnaa;

goluwwa anka gollatee mittikinna midde gateeki hedhebaan.

21 Allalisano wodana affeexxebaan;

Duuchchi Woddika Gootta laqennabaan

Tennexxee insa'ne'a qajeeldebaan

bobba'ikinninna xeereme'en.

22 Middi boganaa'ni lummoxxi weekensha

kadda'neexxe oodhishshatixxa odo caqasse

Yihudiink qachchuwwi urumme

jeedaluwwinke galduma assaan.

23 Ee Duuchchi Woddike Goottaa manjiinxi hedho ifixxe anga'ni hexxemmabaashsha,

ora ifika ifixxe hunnan qajeelcha

dande'abaaxxa ege'ne'ennen.

24 Ee, Duuchchi Woddike Goottaa; ane'ni mura ibisi; heenoo qicinni anee xixi malee'e

ijje ba'abe'noshsha,

mufe atixxenni ane'ni daggoxxe'e.

25 Mufe atixxa ate ege'nebaakenna,

gibaake gosa gosake arda'n lolaasi;

Kunni ardi atika arda bire'eken;

no'o duuchchingi bakka ba'nanoshsha asseexxi boga'no'oka duwwi gatise'en.