1 Yihudaki moyanj, Iyyosiyaasik belti Iyyo'aaqemi moyeexxe woggake ke'ito'n Duuchchi Woddike Goottik hiyyichchi dageexxi,✝ 2 anee'e «Duuchchi Woddike Goottike minnixxe baxxe'n uurritettexxi, magenooffatto'a Duuchchi Woddike Goottike miniba'a Yihudake qachchuwwanaa'n daga'neeke arda duuchcha'n haaso'i; mitte hiyyichcho giddii'n gatissebexxong ani atee'e ajajaannexxa duuchcha insa'ne'ni kuli. 3 Akimagaada mitti mitting laqeexxi fuggoke ifike oranaa'n higaaxxe hexxeen; aninna assinemmaxxe fuggo'a insa'ne'n iyyedagonna'a hedennexxa ba'ne waalannon. 4 Insa'nee hitattoqic, ‹Duuchchi Woddiki Gootti ani hiyyaannexxa laqa gibbinoolenna uwweennaka seera hordofa gophphinoole, 5 ha'noba'a higgeggeenn ergennexxe anxe raagole erganjuwwika hiyyichcho laqa gibbinoole, 6 konne mine Seelo assenneshsha assannon; konne qachchanna buttatike gosa gosake ardi duuchchi edo yowwemeeke assannon hiyyi› » hiyye.✝

7 Qeese, wabeekkoletinna ardi duuchchi konne hiyyichcho Ermiyaasi Duuchchi Woddike Goottike min giddo haaso'aa wodda laqe. 8 Yaane kinni Duuchchi Woddiki Gootti ardake'n haso'aashsha ajajemmaxxa duuchcha Ermiyaasi haaso'e bireeshshanni qeesole, wabeekkoletinna ardi duuchchi iso'o abideexxi, «Ati shiyendatton! 9 Kunni mini Seeloshsha kadaan; kunni qachchinna giddo hedhaak gophemee'na'a one gataan hite'e raagaa Duuchchi Woddike Goottike summinn mayee'e raaggette?» hiyyeexxi ardi duuchchi Duuchchi Woddike Goottike mini giddo Eermiyaasike qarqara'n bukki hiyye.

10 Yihudak ja'laabuwwi tenne'e kaddeexxa yaane duuchcha laqee wodda, mootomatike minenaa'n alalle Duuchchi Woddike Goottike miniba mareexxi, Haaroxxe hula hiyyendaaxxe Duuchchi Woddike Goottike minixxe hulaba ofo'le. 11 Qeesoletinna wabeekko ja'laabuwwake'ninna arda duuchcha'n, «Mansha ha'noxxen laqqinemmashshanni kunni manjichchi konne qachcha'n wabeekkumma haaso'emmaxxe'e shiyemuun» hine.

12 Okkonechinni udmi'a Ermiyaasi, ja'laabuwwake'inna arda duuchcha'n, «Hiyyaa'na'a laqqineexxa duuchcha Duuchchi Woddik Gootti konne mine'ninna konne qachcha'ni raaga raagonna'a anee'e ergeen. 13 Ta'anna me'a ha'noxxanna huje ha'noxxa jijjiidhdhitineexxi, Duuchchi Woddike Gootta ha'noke Mageni'a ajajemme; Duuchchi Woddik Goottinna ha'no'n iyedago'a haaso'emmaxxa fuggoxxa yaane walaan. 14 Ante kadonnole kinni kunnise anga ha'noxxe'n hedhennen, eloxxenna seerinxe hitinaaxxa duuchcha ane'n asse. 15 Yaane kinni haaso'a'na'a laqqineeka konnee hiyyichcho duuchcha ha'no'n haaso'onna'a Duuchchi Woddik Gootti anee'e ergemmaxxe'e anee shiltine'e, balleessa afebaake manjixxa munde dunati ifi, konne qachchanna giddo hedheeka duuchcha balleessanjoke assitinabaashsha heqqedhdhe» hiyye.

16 Ookkonechinni udumi'a ja'laabuwwikinna ardi duuchchi qeesoletenna wabeekko, «Kunni manjichchi Duuchchi Woddike Gootta no'oke Mageninke summinni no'o'n haaso'emmaxxe'e shiyemabaan» hiyye.

17 Bogi giddo hexxemmaxxe geedhuwwanaa'n mitte mitte ke'eexxi bukki hiyye'eke manna duuchcha'n, 18 «Moreesheetike qachchiki Mikiyaasi, Hiziqiyaasi Yihudake mowajo kade'emmake baro'n. Yihudake manni duuchcha'n, ‹Lumok Duuchchi Woddik Gootti hiyyee qici:

« ‹Tsiyooni fichchishsha ko'insaan;

Iyyerusaaleminna oletixxe tuulo kaddaan;

galmi hedhemmaxxe kooba'inna, badda'a daggaldaan kadaan.›✝

19 «Moyanji Yihudaki Hiziqiaasinna Yihudak ardi duuchchi, Mikiyaasi'i shine'eemmata'a? Hiziqiyaasi Duuchchi Woddika Gootta sodaatiyyoti gattowwaal hiyyo'a kadhate'emmabaata? Duuchchi woddiki Gottinna kinni insa'ne'n iyyedago'a hede'emmaxxa ba'ne waalebaata? No'oqqa, no'oxxe anganninni jabaxxa ba'ne ifi'ni iyyedaqqinonna'aate!»

20 Okkone baro'n Qiriyatiyi'aarimike bogik manji Shemayaak belti Uuriya Duuchchi Woddike Goottike summinni konne qachcha'inna konne boga'n Ermiyaasishshanni wabeekkumma haaso'eemman. 21 Moyanji Iyyo'aaqemi, isika lolinka manna ajajammakirinna isik jalqaabuwwi duuchchi Ooriyo hiyyeexxa lanqee wodda, moyanji Uuriya shiyemo'a hede; Ooriyonna tenne laqee wodda alayyeexxi Gibtse'a baaje. 22 Kaddo malee moyanji Iyyo'aaqemi Akiboorika belto Elinataanii'i wele manninn welti Gibtsee'a erge: 23 Insa'ne'nna Uuriya'a Gibtsee'n aa'ne dangeexxi, moyanjo Iyyo'aaqemiba iyyemarre; moyanjikinna wolaantichik isoo shiyeexxi rensha isikanna tuffatemeek manni moogemaake hirreesi booncho'n hunsiisse.

24 Yaane kinn Saafaanik belti Ahiqaami, Ermiyaasi'a baassemmaxxe'e, Ermiyaasi shiyemo'a ardiinxe anga'n sa'isseme uwwemeba'a.